郁郁貢的爆牙

其實一路都有幫狗狗貼肉剪短肚毛，手、腳、側邊同胸前就夏天時剪短少少。不過自從搵到間溝通到又信得過嘅狗酒店之後，為咗方便 P 哥哥照顧打理，我再整體地剪短啲～ 之但係冇剪到游水裝咁短囉......

雖然剪北京狗毛剪咗唔少次，不過技術依然係好差，仍然勁 "湯碗 feel"..... 好彩狗狗信我話佢靚靚，真係識得屙督尿照吓就知我呃佢，呵呵～

藥性 shampoo 同埋抗生素藥片

唔係我有事（雖然寧願係自己），係狗狗～

麻煩：阿媽媽，我眼瞓，你可唔可以唔影我呢？你中午舞咗我兩粒鐘都仲未夠咩？去打攪燒賣喇，佢冇我咁晌花園趁，冇咁攰，你去佢床仔度喇～ 唔好煩我喇，唔該晒！
媽媽：好快啫，影幾張之嘛....... 燒賣打餅瞓睇唔到肚仔嘛，你至乖架嘞，就得嘞～

Mel S 失蹤咗個幾禮拜，Mel R 頓失玩伴  呢排更多時間晌我門口打躉，我覺得佢可憐，周不時都出門口坐一陣陪佢玩下，有時叫埋麻煩一齊，睇佢兩個幾咁和平共存  Mel R 其實係一隻好乖好馴好信人/狗嘅貓，奈何主人唔俾佢入屋又唔多同佢親近，攪到佢成日走過嚟我哋度尋求慰藉...... 唉～

希望 Mel S 係如老公講：六、七個月大貓貓春天時係會出去「闖蕩江湖」一段短時間，跟住會自自動動返屋企～ Mel R 冇咗姊妹真係有啲落寞呀！

媽媽話什麼颱風 Emma 襲歐，吹跌大樹、屋頂、鐵皮...... 佢話驚俾樹幹扑頭，今個週末唔去樹林暴走呀  今日淨係俾我同燒賣落花園八咋，仲成日看住我哋

無得出去，好彩都有朋友仔嚟探我哋

冬日陽光好珍貴，出現親我都將兩盆大啲放唔到晌窗邊嘅蕙蘭搬去晒到嘅位～ 有得趁點少得燒賣嗰份......

呢排冇乜爆牙 posts，並唔係冇帶狗狗去樹林，相反地，聖誕新年期間，我哋去咗暴走幾次～～ 不過景物冇咩特別，我冇意欲寫啫  但係爆牙都要久不久出下鏡嘛

麻煩坐大脾瞓覺覺，不過坐一陣就熱辣辣要落地     只要有嘢食，燒賣一定眼仔精精

爆牙兩個幾月大開始就一齊晌我屋企生活，自從佢哋分咗大細之後（麻煩係 alpha），冇乜開片，除咗偶然為零食打十幾秒交，感情都算唔錯，不過就未至於糖黐豆形影不離嗰隻，大部份時間佢哋都晌自己喜歡嘅角落打躉。