郁郁貢的爆牙

唔相信自己已經完全豁然放開，不過默默流淚嘅時間大大減少。日常生活中實在有太多事物惹我傷心，每每眼淚將要湧出時就會吸啖氣忍住...... 經常晌街邊喊苦喊忽會嚇親街坊途人哩～

我覺得自己年紀愈大愈容易喊，亦愈不遮掩自己嘅情緒，可能唔再工作嘅緣故，唔需要太過顧慮影響身邊嘅其他人。不過..... 平常嘅我，過一般淡如開水嘅日子，根本好少大喜大悲～

喊對於現在嘅我，並冇宣洩哀愁嘅功用，大喊之後亦只會鼻塞疲累，圍住心頭嘅痛楚不會減褪......

我只有等.......等時間去慢慢一點一滴沖擦記憶～

p.s. 各位好朋友，一次過多謝你哋嘅關愛同留言，我唔逐一回覆嘞～

親愛嘅燒賣已經晌四月廿五日離開咗....... 病因係 IMHA （請自行去 google 一下，我唔想詳述）。我以為自己心情已經平復好多，但係其實心仍然非常痛，淚仍然默默流...... 一方面唔想繼續影晌老公同麻煩嘅情緒，但係亦冇法令自己真正釋懷.......

當年肥嘟嘟一舊飯咁嘅姨甥女，而家已經亭亭玉立，今年暑假之後就升中一嘞！唉～真係唔認「熟女」都唔得

近排同家人 Skype 傾偈，環繞住姨甥女要報中學，要做個 portfolio，非常有廣告業 pitching feel  好彩以前晌 agency 做嘅細細妹去咗 honeymoon，唔係佢實加把咀大大聲，幫手攪亂檔

每當到呢啲 milestone 位，我都不期然諗返姨甥女細個時啲攪鬼嘢

• 第一次同老公（當時嘅男友）兩個人帶當時一歲多啲嘅佢去飲茶，未到茶樓佢係瞓梗覺，到我哋坐低開好茶而叫嘅點心嚟到嗰剎那佢擘大眼起身，仲好開心咁「嘩」一聲，笑到我哋同拎點心嚟嘅阿姐吖.......
• 兩、三歲某段時間，夜晚見到月亮的話，佢唔肯行出屋外，佢話唔鍾意 moon 喎 .......
• 初初返幼稚園，佢唔肯排隊，話周圍咁多位點解要啲小朋友迫埋一齊......（老師話俾我家姐聽）
• 某次晌家姐屋企排排坐梳化睇電視，佢坐中間，一邊係我家姐，另一邊係我老公，佢先同媽咪講嘢，講完即刻同 uncle B 再講，雙語轉台一啲問題都冇......
• 2001年暑假時佢同媽咪過嚟意大利探我哋，再一齊去 Umbria 玩一個星期。睇佢教兩個唔係好曉英文嘅荷蘭男仔玩飛行棋，好鬼攪笑......

其實好多片段我已經唔記得，不過以上嗰啲應該到佢好大好大個我都仲會得閒回味下！

2000年攝 － 呢度係 Kimmy 最鍾意嘅山坡大草地，又係佢第一次遇見牛、馬嘅地方

四年嘞...... 爆牙都就快五歲，每次想起您，心仍然痛，淚繼續流；不過我知您安穩開心地晌彩虹橋蹦蹦跳跳，我寬心嘞～～

Puppy look， Kimmy 1992 - 2/12/2003

傷痛真係會隨時間而減少，起碼已經唔會再喊到收唔同掣，成個面蕃茄咁。

而且有爆牙兩個成日詐傻扮懵，唔開心都唔會好耐！

上星期日老公打電話俾比利時妹妹傾下去西班牙嘅嘢，電話成日飛去留言信箱，佢轉頭打俾阿媽睇下係咪兩母女雞啄唔斷~~ 奶奶電話通喎，仲爆咗個驚人消息：比利時妹妹、妹夫要離婚！！！唔係化 @_@

老公話佢阿媽周不時小事化大，信唔過，要親口問阿妹先信！不過我就有預感奶奶今次講真，因為老公打足一晚電話都係飛去留言信箱！星期一比利時妹妹自動打電話嚟：證實同妹夫分開，不過仍然住喺同一間屋。我老公係嗰種：人唔講，佢一定唔問，齋聽嘅人，所以都唔知點解佢兩個要離婚。至於西班牙之旅，有機會三個人一齊去亦有機會淨得比利時妹妹同個女。

星期日晚已經再次「鄭重」同老公講：有日如果佢發覺冇咁愛我，唔該第一時間講我知，等大家有得補救。咁我自己呢？嘿嘿~~ 郁記係炮仗頸有脾氣顛馬，有乜唔順就攤出嚟講，冇機會屈埋心度自己閉翳 ^+++++^

一向心思似筲箕嘅我偶然會有瞓醒萬事好清晰嘅感覺 ~_~'

一個識咗廿幾年（唔駛估同計數嘞，今年年尾我慶祝40大壽嚕 ^0^）嘅好朋友星期日會嚟到Plzeň探我，最近好多佢同我一齊嘅美好情景喺腦中不斷湧現：

• 中國語文會考前夕一齊喺喇沙利道路邊休憩處坐喺木凳上tip題目溫習（之後大家都攞到好成績 ^____^）
• 佢到Montreal做交換生，一年內書信溝通不斷（我收埋收埋所有佢寄俾我嘅信喺個寶盒度~~）
• 趁住秋高氣爽齊齊逃學去城門水塘石澗「畢」魚仔（非常過癮好玩有成功感）
• 雙雙在太子地鐵站唔舒服拍門入職員office抖氣休息 +︵+
• 我做伴娘到佢屋企過夜傾偈。。。。。。

您己遠去兩年了~~
在彩虹橋的另一端過得好嗎？
跟Betsy、仔仔相遇了嗎？
有沒結識到新朋友呢？

我活得好好，
您不用牽掛我；
就是還會時時想念您，
回憶與您一起經歷的旅程。

還記得在意大利那天早上我緊抱您看最後一次陽光時唱的那個歌嗎？
我現在仍常常哼......