郁郁貢的爆牙

藥性 shampoo 同埋抗生素藥片

唔係我有事（雖然寧願係自己），係狗狗～

己經用咗兩次 shampoo 同食咗一日（兩次）藥，冇咁紅同埋應該唔再好痛

星期日下晝 BBQ 時完全正常，眼仔精精

話說星期一下晝兩點幾幫麻煩沖涼，四點幾吹乾梳好毛之後開飯佢哋食，兩個都好好胃口。不過食完大約兩個鐘，麻煩開始不停 fing 頭、用頭擂牆、又反轉身用個背脊起勢典地，我初時以為耳仔有事，不過 check 過又唔似；睇過背脊冇紅冇腫，皮膚顏色正常，但係佢不停典來典去幾個鐘，攪到自己熱辣辣伸晒脷又索氣，真係好唔妥！佢有抓頭，於是 check 頭頂，有個結咗痂但俾佢抓返開嘅傷口，附近都紅晒～ 我記起獸醫講過話可以用香草茶抹傷口，即刻煲水沖茶包，幫佢抹下。之後麻煩可能已經好攰，佢終於趴返定少少瞓覺。不過我決定第二日同佢睇醫生。

星期二朝早起身，已經見佢伸脷兼索氣，地下仲有幾小團毛，即係又抓頭喇，頭頂嗰笪抓到流咗少少血呀～抱起佢摸到左後腿濕晒，佢應該係咬甩毛兼且咬損咗大脾，又係紅色一大笪。晌老公未開完會返嚟車去診所之前，我惟有看住兼氹住麻煩。去到診所，好彩地唔駛等～獸醫聽完我講一睇頭頂同左脾就已經話係 dermatitis（皮膚炎），話呢排濕熱，好易發生，佢即刻叫助手拎電剷剃晒傷口附近嘅毛，再打咗枝 pain killer，跟住講解 treatment：（一）內服：一日兩次每次四分一粒抗生素，要食足八日；（二）外洗：一 part shampoo 開十 part 水，sponge 上傷口，五分鐘之後用清水過淨，開頭一日兩次，情況有明顯改善改為一日一次至好返。

返到屋企即刻烚雞槌開飯食藥，好順利～ shampoo 嗰 part 就..... 麻煩 fing 頭要走（啲藥梗係「拿」到傷口痛，尤其頭頂），不過總算食一次藥同用一次 shampoo 之後已經見效。我原本就打算星期二同燒賣沖涼，有見麻煩攪成咁，同燒賣沖完普通 shampoo 之後，用麻煩嘅藥性 shampoo 沖多一過，買個保險先。

話時話，今個夏天熱同濕嘅日子多咗！假若歐洲天氣持續變熱的話，出年夏天要認真考慮同佢兩個剪個 puppy cut 先得嘞！