追尋天使

苦桑所歹勢看的片，我有去看lah！吳文睿、張安捷兩位南藝大的研究生所拍的「苦瓜道人的唱片行」，參加「烏山頭影展」，佇鄭成功家廟小小的內庭來放映，觀眾十幾人 ，散散坐咧，秋天的風真透。

佇看著此齣簡潔清楚的短片以前，先放另外一位少年人所拍的長片，是虛無混亂，有實驗性，總是無真濟內容的八十分鐘長片。片中的少年男女學生，一直pok薰，一直灌酒，一直行來行去，一直無有目的在坐車旅行，一直用足無清楚的字句，講一寡無法度表達in的內心的理論。真正是有寫實啦！不過，就是親像台灣即馬的報紙遐呢無聊歹看。若逢（「互人」的連音）看三十分鐘，是猶有寡趣味，會激人想物件，想即馬的少年人真歹溝通。總是，若逢看八十分鐘，就有一點點仔虐待觀眾，會激人受氣。我（=恁祖媽）也嘸是你的老師，也嘸是你的父母啊！是安怎著坐佇秋風的暗夜中，忍受你長長講昧息的，半成品的無聊論啊？

只不過是想欲等「苦瓜道人的唱片行」出場。

     
圖片by Judie35

    秋天的風，真正有吹到台南lah。清爽的拜六暗，聽講有一齣主題是「苦瓜道人的唱片行」的紀錄片欲放，刁工留時間欲去看。照資料認真揣去到古井邊的鄭成功家廟。時間猶早，佇巷仔內欣賞夜色中的老菜堂（一個名叫報恩堂的齋堂）與菜堂隔壁的「湛然寺」（名稱實在好聽）。

    可惜等我歡歡喜喜踏入去鄭成功家廟的庭裡，才聽到主辦單位講，今仔日是先欲放另外兩齣紀錄片，關係苦瓜道人的片是明仔載。

    明仔載我就無閒呢！我講。主辦單位一直會失禮。

    無要緊，我講，有緣就有機會看。

    出來，看著中正路「林百貨」的遺蹟互強烈的電火光照甲真有一款超現實的趣味，就向比彼位去，想講既然影片看昧到，寧可就沿中正路行去「惟因唱片行」，拜訪苦瓜道人本人。

暑假中有機會與父母去花蓮玉山神學院，去到in少年時做夥流落工作營的記憶的鯉魚潭邊。

佇路nih就先去知本滯chit8工，泡溫泉。想起濟濟冬前與阿母佇關仔嶺的情景。

佇此將我自己真愛的舊詩貼佇此。

（台文）

早起時聽Bavaria廣播電台，聽著演員Ulrich Muehe因為胃癌過身的消息。心頭受振盪。他最後的作品”竊聽風暴”（Das Leben der Anderen)，是一齣受人讚美koh一再討論的電影，我卻一直猶無機會看著。

元宵大家提鼓仔燈，Judie想起細漢e5時陣，姑丈替阮糊e5獅仔燈。我將過去寫的詩貼出來，互大家分享。

獅仔燈

足濟足濟冬前

姑丈為我糊一隻

獅仔燈

用幼幼輕輕e5竹篾仔

綁一粒圓圓e5頭

兩片尖尖e5耳仔

圓圓e5腹肚內

有機關

竹篾仔綁作腳

釘踮一塊柴板仔頂

柴板仔下腳

有紅色e5輪仔

我曾真固執去愛一個人，固執去享受我受傷的心情，直到我失落所有的氣力。彼時，讀到Rilke的一首詩，感覺真會當講出我的心境，嘛帶領我去學習“放”。

將天使放互走，佇互相纏伴的兩個人中間創造空間，這是藝術啊！

足久以前就想欲貼出此首詩，拖到今仔日才做。

因為足想欲飛。

“所以我將天還互我的天使

祂就飛到遠遠所在

為著欲將親近留互我

祂學習（hak8-sip8）安怎來飛

我學著（o2-tioh）安怎來活

阮慢慢啊

深深認識對方”

貞文

圖：Paul Klee

欲讀全詩，請繼續讀落去

在天使這本書出版了，美親一直真用心準備＂新冊發表會＂，實在m-chhai an-choaN來感謝她！

她寫一篇關係天使的文章，我真感動，討欄貼於此：

德國女畫家Paula Modersohn-Becker（1876-1907）,三十一歲就死於產褥熱。

我真愛她繪她自己有身的時的模樣，（就是在此擺生產了，她就過身去，）有寫一首詩：

日光燦爛的下晡時，科隆（Cologne）大拜堂的兩座懸懸的尖塔佇金金的日光中，石仔所刻的十字花反射出日光，石頭仔若親像融佇日光內，變作溫暖的、流動的材質。

萊茵河的水氣親像霧，霧中有看見長長的青色鐵橋，兩台火車佇鐵橋頂sio-sut-loo7，一台向北，一台落南，in的輪仔用謹慎的速度運轉。佇車頭邊仔的海因里希寶廣場（Heinrich –Boell- Platz），少年人的直排輪鞋的輪仔顛倒是青狂勇敢。佇用紅磚仔角鋪的廣場，少年囝仔親像歸岫的蜂，用真緊的速度佇觀光客中間鑽來鑽去，好親像欲講：「這是阮的城市，阮的地盤！」

由此有紅磚仔砌的gim5-a2，會當通到河邊。我真愛坐佇遐，數念1985年過身去的海因里希寶（Heinrich Boell）先生，觀看他所愛寫的此個城市，與其中的人。

此禮拜六欲佇府城舊冊店分享寫”天使”此本小說集的心情。

位第一篇”天使”到路尾的”門前有大樹的病院”中間，其實隔有欲十冬的時間。此十冬內，所想的代誌，所遇到的人群，實在變化袂少。

寫此些故事的時，我的心佇記憶中的台灣，與著認真參與的德國大學生活中來來去去。只有想欲練習，成作一個講故事的人。

德語m7-si7互人感覺音韻有sui2的語言，總是此個語言有真濟sui2的文學作品，是一個有故事的語言--位鄉土的經驗到佇都市內的漂流，位樸素的生活描寫到複雜的心理描寫，反覆辯證的哲學反省，深沉的悲劇，利利的笑詼，活佇彼個語言的境界，會感受到文字的氣力，會歡喜奔走佇故事的樹林內。

我是佇德語的世界內底，開始我的台語創作。

基本上，我相信台灣文學的創作會當真廣闊，真多元。脫出意識型態與寫作題材的束縛，互台灣話真正成作有豐富的故事的語言。

我的文學工作，基本上，就是一款的眠夢，向望台灣的文學有一日親像德語的文學遐呢豐富，多元，深沉，趣味。就是安呢若定。