追尋天使

去一擺Czech此e5國家，感受一個佇壓迫的時代猶充滿勇氣，愛講笑詼的民族。
佇首都Praha一再看著滑稽e5「好兵帥克」圓圓e5面:酒店用他做店名，城堡頂賣傀儡尫仔e5，嘛有刻出他笑hai-hai e5面。此位文學中永遠互人數念e5「白癡英雄」是Jaroslav Hasek佇第一次世界大戰了後創作出來e5。

經過第二擺e5世界大戰，行過冷戰時期e5真濟壓迫，帥克行出捷克e5國界，為全世界e5人增加笑聲，佇笑聲中建立反抗e5勇氣。

得到Nobel文學獎e5詩人Jaroslav Seifert有寫過一篇散文，講起Hasek是佇什麼景況中來寫出此本冊。
我曾翻譯此篇。今貼出來分享。

穿淺拖仔liu-soan

   1872年7月7日，保羅維蘭(Paul Verlain)行出門，欲去藥局替她破病e5太太瑪希德(Mathilde)扯一帖藥。真不幸，他佇路裡遇著詩人藍波(Rimbaud)。藍波無費偌濟力，就通叫他與他作夥走路(chao2-lo7)來去比利時。維蘭to3真正無去藥局，隨時與藍波作陣行去車頭坐車，溜-soan去比利時。瑪希德揣in翁婿揣三日，遍訪親戚朋友與太平間無結果，直到她得到消息講，in翁已經隨「沉船」e5作者出亡到比利時啊！

買藥仔e5路--這是我頂面e5彼段故事與下面我欲講e5有相關聯e5所在，嘛是我對保羅維蘭唯一知影e5故事。看起來，有寡詩人，你通好毋通派他出去替in太太買藥仔。

即馬我著另外起一個頭：第一次世界大戰e5最後幾冬，阮兜徙到胡斯巷一間歹看e5公寓，佇一間醜醜e5厝內。彼間企佇彎角仔e5舊厝，只有一個好處，就是由灶腳e5窗仔會當看到聖唯督山。鐵路邊e5山坪有發真濟「黃金雨」，春天若到，樹木開花，此片山坪就是一片淺黃e5波浪，雖然無芳味，已經會當互阮心迷。等若「黃金雨」謝去，鐵支路邊e5槐樹就開花，甜甜e5芳味吹入窗。歸間厝攏是花芳，公寓與暗暗e5後埕嘛攏芳起來。後埕與鐵支路只有隔一道破破e5磚仔牆，四圍是放烏炭e5柴棚。佇此，阮實在真需要春天e5清香。後埕真隘真隱密，戰時此間厝e5住民用此個埕來飼雞。雞仔常常歸群企佇石板頂，絕望饑餓在啄磚仔角中間e5紅毛土，有時有鳥鼠來，與雞仔搶吃由公寓倒出來e5垃圾。暗頭仔，雞仔就歸陣擠到門口，耐心等待人來開門。然後in就跳去來樓梯，用滑稽e5腳步，一層樓一層樓跳去哩，親像夢遊e5人，in永遠有法度揣到正確e5門，正確e5雞岫。若是in欲生卵，嘛是會跳來樓梯間，吵ka2人會起受氣。全厝內攏是in在訶咾她所生產e5 細項寶貝e5歌聲。恁可能會問：公寓住民奈有位通飼雞？飼佇灶腳與囤糧食e5細間隔間，佇遐有窗仔，通向臭氣激人e5後街。橫直戰時根本就無人有糧通囤。

由改作雞寮e5糧倉e5窗看出去e5後街，是充滿活力e5所在。正對面就是一間叫作「金天使」e5樓仔厝，門口有一個金天使e5浮雕在歡迎大家入去樓腳e5餐館坐。樓頂e5房客就是有名e5無政府主義者昭阿(Frantisek Sauer 1882-1947)，他是集集可夫有名聲e5怪人，老來有寫一本書，來紀念他無安定e5一生。

第一次世界大戰拄結束，昭阿e5作家好友哈謝克(Jaroslav Hasek 1883-1923)＊就搬入來與他蹛。與哈謝克作伙e5，猶有他第二任太太，是他由露西亞娶來e5。哈謝克愛講罕故（ham3-koo2），將in太太講做是一位公主，總是她一點嘛攏無公主e5款。阮會當由阮e5窗仔，直接看著哈謝克與他e5舒拉夫人佇對面e5生活，in嘛真有趣味在觀看阮即條鬧熱e5街仔。

我e5同學蘇刻(Ivan Suk)蹛佇昭阿e5隔壁，他後來是真有才調e5詩人與跑法律線e5記者，為「捷克之語」日報寫稿。我干單需要跑去門口，kho一聲哨仔(si5-a2)，蘇刻就會出現佇對面e5陽台。阮時常作夥撞球。In 兜樓腳是一間細間酒館。無知是安怎，人攏叫它「石核果」。佇遐，真好鬥陣e5酒館老闆教阮撞球e5秘訣。

哈謝克有時嘛會落來酒館坐，總是坐無久，因為此間酒館離他e5「較好e5另外一半」猶是傷近。In太太用盡計智，就是欲將他留踮厝內。人曾問哈謝克，奈無愛來「金天使」坐一咧，他講，遐有太濟樓梯愛爬。其實，若是人欲行入去「金天使」只有區區三階石gim5-a2需要「克服」。

佇一個熱天下晡時，哈謝克出現佇「金天使」，身穿便衫，腳踏淺拖仔，一手將褲頭揪咧。他坦白講，舒拉夫人ka7他e5皮鞋皮帶與外衫攏鎖踮櫥仔內。他只不過是欲去藥局替舒拉夫人買藥仔，她破病啊，醫生有開藥方。他想講，既然出門啊，就順遂帶一個酒壺出來買寡bi3-luh。在等待酒館老闆替他ka7壺裝互滿e5時，他一面醊倒在玻璃杯仔內bi3-luh，一面與阮耍一場仔撞球。他撞球e5技術實在差。Bi3-luh乾三杯了，他講，他真正愛趕去藥局啊，太太在等咧！他講酒壺先寄踮此，他轉來e5時才順續來綰。總是他無擱出現。

兩日後有人大力拍阮兜e5門，氣噗噗e5舒拉夫人企佇門口問講：「哈謝克匿對何位去?」然後她靠踮阮阿母胸前盡情哭一陣了，才一面擦目屎，一面行轉去厝。

放心！哈謝克無去拄到藍波，嘛無隨人出走。一禮拜過去，他乖乖抱一壺酒轉來啊！不過無帶藥仔。好嘉哉病人早就無需要彼帖藥仔囉。她已經恢復囉！「她又擱傷過頭健康啦！」哈謝克附帶講一句。

佇此個禮拜內，哈謝克穿內衫與淺拖流浪於熱天e5布拉格，將大細間e5酒館攪擾ka2真不安，互飲燒酒醉厚話e5友仔包圍，佇此個禮拜，他完成歸冊e5「好兵帥克歷險記」＊。他是佇酒館e5桌頂寫，若完成幾頁，就有他e5友仔替他送去「新涅克出版社」，彼時「帥克」用細本薄冊e5方式，佇彼間出版社連續在出版。出版社收到稿，就隨時付稿費，一文無減，總是嘛無加。安呢，此位作家暗時一定將日時欠e5酒賬還互了。第二工，他就著擱認真寫作，若無，bi3-luh杯仔就會空空。

即款寫作e5方式互咱會想欲問：若是哈謝克平安舒適佇他自己厝內e5案頭寫，這本有名e5小說的面貌會是安怎樣咧？這是永遠e5謎。咱干單會當知，安呢哈謝克就毋是佇黏灕灕e5酒桌頂面寫作，就免受鬧熱滾滾e5酒館氣味干擾，毋免擠踮嘴乾e5友仔中間，毋免為著想欲有bi3-luh通飲，一頁一頁寫落去，安呢，真可能就無彼本冊e5誕生，哈謝克e5名聲嘛毋是今仔日咱所識e5-一位全歐洲，甚至全世界所識e5作家。

咱知，哈謝克真少年就過身去，舒拉夫人佇他過身了無偌久，嘛來別世。哈謝克忠實e5朋友昭阿，今嘛已經過身去。

只有帥克，這位肥肥可愛，放肆大膽e5查甫人，有法度將嚴酷e5現實看ka2清清楚楚，他繼續活。毋是干單佇前往普亭e5癲狂e5旅行，他活跳跳，他嘛活跳跳在行得勝e5腳步，行向他毋曾想欲去過e5世界逐國。

（選自Jaroslav Seifert : Alle Schoenheiten der Welt)