追尋天使

　　上帝用話語來創造天地e5時，佇空虛混沌（tohu-wa-bohu）中間，祂先分開光與暗，然後，祂吩咐眾水著分開，水分做穹蒼e5頂面e5水與地面e5水，中間留出一個空間。第三日，祂koh吩咐天下e5水著聚集作夥，互乾地出現。對彼片地，才開始有青草、菜蔬、與結果子e5樹木，開始成做活命會當生湠e5所在。

        佇此擺e5大風颱中，讀到此段聖經中關係創造e5記載，實在互人有真深e5感觸。混沌e5世界啊！上帝為人所備辦e5「園」，今佇什麼所在？眾水今攏聚集作伙，用驚人e5、毀滅e5大氣力，將活命e5園，變做混沌e5狀態。

        拖到欲一禮拜久，風颱慢慢離開。佇濟濟憤怒e5、哀哭e5聲內底，雨停落來。水漸漸退去，雨聲無去，憂傷e5哭聲與大受氣e5聲愈來愈大聲。無法度體會百姓艱苦e5政府，驕傲、自我中心e5官員，看自己e5政治利益較贏過百姓e5苦痛e5人，佇混沌e5中間在so5來so5去，互咱e5腹內一直有一pha受氣e5火一直在 toh。

        總是咱無時間與in辯論，無時間教in行向正途，無氣力為著ine5無能與冷淡來受器。無中央政府e5領導與規劃，咱嘛著緊緊來，聚集咱e5氣力，由混沌e5中間，重新起造秩序。

        透過網路互相招呼，透過教會朋友鼓勵邀請，真濟少年人聚集起來。尖石來e5Tayal勇士，用in佇山內奔走練出來e5強壯腳手，搬過互土石流阻擋e5所在，為阿里山內e5Tsou族部路運送物資。Sirayae5族親，緊緊趕去山內，與失落家園e5人企作夥。是即款e5關心與愛e5行動，分開壓迫全台灣e5眾水，慢慢在起造chit8-e5會當互生命來繼續e5空間。

此擺有真濟受災e5所在，是原住民居起e5部落。但是，互本來e5風雨所帶來e5災害變到koh-ka2嚴重e5，是歸個台灣追求科技與經濟e5政策。淹沒台灣原住民e5，m7-na7是大風颱、土石流，koh-ka2是久長以來主流社會對原住民處境e5看輕與忽略，錯誤e5政策與無擔當e5政府，一層koh一層，將原住民壓著著。今原住民擔當大地e5受氣，m7是原住民e5罪過，是因為ine5痛苦，咱台灣beh看見得到醫治e5機會。

四散e5少年人轉去部落，將受困e5人救出來。無分種族與語言e5義工，用ine5雙腳雙手，一直在分送物資，一直在清理家園。In是在投入上帝e5創作e5工作啊！佇漉糊糜淹沒e5莊頭，義工親像飛出挪亞大船e5第一批鳥仔，飛來飛去，揣無通休e5所在。總是in 繼續清掃，繼續拚，直到焦地出現，直到一切完成。

未來猶有真長e5日子。挪亞e5時代，由大船停落來無復漂流，到天邊出現上帝應允e5虹，是koh經過半冬久啊！原來，由混沌e5中間欲重新起造生命e5秩序，是要用足濟足濟e5氣力e5。參與佇上帝新創造e5大家啊！著堅持落去，m7-thang失去奮鬥e5精神。因為，只有咱繼續拚落去，台灣e5土地與族群才會當得到醫治啊！