追尋天使

兇狂的大水已經退去，台南市猶因為風颱的緣故，全面停水。tu2-leh讀希臘文、希伯來文與英語的神學院學生，熱切想beh去災區幫忙。老師嘛願意鬥陣來去就災，就參詳好，停課三工，接受佳冬鄉的邀請，投入重建家園的第一步。

        歸個佳冬鄉埋佇厚厚一層的土內。本來的塭仔攏毀了了，魚攏已經沖走去。漉糊糜內，會看見尺外長的石斑死佇遐，嘛有歸片的鱸魚栽猶在phiat-a3、phiat-a3，利用土沙粉內最後的一點水份佇喘氣。魚塭仔邊一層樓高的籬仔頂，有足濟魚，一尾一尾掛佇遐，是大水將in沖起去的。

佳冬的養殖魚業完全破產lah，高密度的飼魚事業，投資遐爾濟金錢與人力，今完全毀掉去，看起來實在互人心會酸。這個莊頭，著到什麼時陣才會當重新企起來啊！

        南神的人力，真緊就加入台灣四界聚集過來的義工，受鄉公所調派，去鬥幫忙清理人的厝。逐日，大家由早起勞動到下昏時，搬傢俱，掃土，無坐落來的所在，無休睏的閒工。土該像永遠清boe7了，櫥仔內、箱仔底，有縫的所在，含水的土就浸到飽。水離開了，留落來的是teng7-khiauh-khiauh的土。只好用地下水來沖到軟，人才排歸排來掃。

        清到本來的地板出現，是一個足長的過程。拼命佇日頭光照中工作，汗若溪在流。若是一家伙人自己來做，可能早就腳軟手軟，總是，義工的熱情投入，互受災戶得到氣力。受損的傢俱攏堆到路邊去，土砂清好lah，koh有一間厝重新會當住人。生命慢慢會koh填滿即個空間。

        「一面掃土，一面會想起希伯來文的課，講上帝創造的動作，第一要緊的是『分開』。原來，這是真無簡單的動作，欲將厝與土分開，著用遐爾濟力，欲將水與土分開是遐爾困難！」暑期跑去聽希伯來文的課的梁哲懋牧師，事後向希伯來文的教授羅光喜牧師安呢講。此擺南神的學生與老師，真正是在經驗一個由混沌到新開始的創造過程，參與佇新創造。

        　願分開混沌，創造活命的大主宰，繼續用大氣力來安慰與醫治台灣。