追尋天使

暗頭a2，風一直ti7-le7吹，就是佇日光充足的台南，嘛已經感受著冬天的氣味。此幾工，真正是小寒的時。

        頂擺轉去厝內，阿爸阿母協力teh背Der Lindenbaum (菩提樹)，in佇合唱團著用德文唱呢！阿母的發音標準，音韻的感覺抓了真好，她是認真的合唱團員，何況這是她自少女時代所愛聽的歌曲。

        我手頭有一本Schubert的歌曲集，收集他三部重要的連篇歌曲集。這是阿母少女時代儉腸勒肚買來的，精裝的歌本，綠色的封皮，因為時常互阮掀來掀去，已經磨壞去。我佇大學的時，將此本譜重新包裝過，用我自己的一幅簡單的水彩來作封面。

        阿母少女的時，佇廣播的中間聽著Schubert為Wilhelm Mueller的詩所譜的歌曲集 Winterreise，受到足深的感動。24首詩，24首歌曲，講起一個少年人失戀後流浪，走向異鄉的旅程。溪仔、樹木、結冰的目滓、欲倒的老厝、安靜的墓地，平凡的風景，受傷的靈魂的感受卻是遐呢強烈…

阿母雖然袂曉彈鋼琴，猶舊是歡喜珍藏這冊歌本。她無需要用足濟言詞，只有用大方的手，將她珍惜的歌本交互阮，就將彼款感動傳互阮。阮會曉彈琴了，就慢慢仔去摸此些歌曲，感受奇妙的合音與旋律，怎樣將情感逼出來。阮姊妹大家攏有興趣學德文，與此些詩句與音樂結合起來的美感，有足深的關係。

少年彼之時，對此些詩句中間所表現出來的「對人類命運的苦痛覺醒」(Weltschmerz)，無什麼特別的體會，總是，對一個人佇冬天孤孤單單走天涯的命運，有足深的同情。特別是佇彼個威權的時期，佇中學內面敢講幾句心內的話，就會受約談。感受到自己的價值觀與其他的同學無相款，嘛知影袂使大聲講出自己所愛講的話，只會當忍受佇人群中間的孤單。

彼時，天若暗落來，寒風若吹來，心內有時就會響起Winterreise裡孤單的旅行者沉重的腳步聲（用鋼琴彈出來的）。

有足濟冬無認真聽Winterreise。因為，這個世界是遐呢鬧熱，遐呢嫷！轉來台灣了後，熱心收集台灣的聲，聽這片土地充滿活力的聲，無論是理性的現代樂聲，充滿情感的土地原始的聲，或是傳統的歌謠，或是現代的創作，我在尋找台灣的聲。

總是，佇台灣擱一擺互一個威權威脅，新政府統治的手段擱倒轉去三十冬前的這段日子，冬天走天涯的不幸旅行者的腳步，擱一擺互我的心結歸球啊！

我擱開始認真聽Winterreise.