追尋天使

        Judie佇病院，我佇無閒，總是有媽媽與爸爸來照顧，人生kiam2有歸擺此款的幸福？

　　
        媽媽是恬靜的人，有她佇病人的身軀邊，實在真好。她kan-na7驚她自己腳手無夠敏掠，因為過去她照顧人的經驗並無真濟。她嘛驚佇病院會睏袂去，吃愛睏藥，一瞑好睏到天光。

        媽媽佇幾冬前，嘛有一擺佇聖誕節的期間入院手術。因為m7是大手術，厝內大家攏在無閒，聖誕暝並無人佇她的身軀邊。自細漢的時陣開始，媽媽逐冬聖誕節攏是佇教會，唱歌，讀聖經，報佳音。她m7-bat自己一個人過聖誕節。彼冬佇病院，後來她是將尿袋提leh，與探訪的人作陣去唱歌報佳音。

        阮圍佇病床邊，聽媽媽回想她彼冬佇病院過聖誕節的情景，一家夥仔此幾冬來，其實真罕得有此款的聚會。

Photo:Judie35

        阮通欣賞的表姊，bat佇一間大間病院工作真久，她聽著Judie開刀的代誌，就先吩咐過去bat與她同工過的關懷師過來探訪。手術了第三日，她嘛由竹山拚來與阮相會。足無閒的表姊藉此個機會稍寡休睏，會當大聲講話，大聲笑。大家坐佇病房內，無感覺是病房，顛倒有一款過年團圓的氣氛。表姊帶豆乾與土豆來，m7是互病人，是互顧病人的人通歡喜。

Judie其實真無愛一堆人客來，大船妹妹為她擋幾位熱心的人客。總是第三日，第四日攏有真可愛的人客來拜訪。病房的冰箱內面冰足濟粒蘋果與梨仔，是各位可愛的人客所帶來的。

等Judie會當呷物，我的同事就煮真好吃的魚仔湯來，隔日擱有鹹糜，足濟的疼痛（愛痛），足濟的祝福。實在互人滿心歡喜。

一個細細的奇蹟發生佇此段期間：當爸爸佇病房“值班”的時，彼位害阮兜著放棄原來的厝的人，忽然間出現。他已經有十幾冬無佇台灣，最近轉來，就是此幾日，他與爸爸連絡，約佇病院見面。

濟濟冬前，身體一向真lam2的君妹因為腹內一粒大瘤開刀的時，朋友勸她趁破病的經驗讀Thomas Mann的“魔山”。她住院21日，一直攏真艱苦，完全無精神通讀冊。此擺Judie住院，猶未赴體會永遠行袂出去的“魔山”，嘛猶袂開始“憂國憂民”，就出院啊！

Judie療養期間，世界是真正轉足濟轉了，有袂少代誌發生，不過，對我來講，會當打動我的心的代誌，就是一直用孤癖的態度過日的君妹，此回嘛再三敲電話來關心Judie。

      這款將世界的大變化先放佇一旁，用心聽自己心內的聲音，感受親人的存在，毋知是毋是一款匿佇“魔山”的情境？