追尋天使

            這是禮拜日早起，冬天的日頭溫溫純純，天真清，黃色的蝴蝶自由飛。

            行出病院大門，抬頭看見清清的天，心頭忽然互一陣溫暖的愛所包圍，足濟需要感謝的代誌，互我的目屎滴落來。

          我通親愛的姊姊Judie因為子宮腺瘤的手術入院。12月11日開刀。

  濟濟冬前，一位妹妹腹內生真大的瘤，接受真復雜的切除手術，復元中種種的艱苦，猶留佇厝內的人的記憶內。此回，大家擱緊張起來囉。

好佳哉真有照顧病人的經驗的小妹來鬥相工。佇青翠的中部山區擔任牧師的小妹，大家叫她「大船」，特別請假來台南。她腳手敏掠，勤快擱體貼，陪Judie度過tu2-tu2出手術房的時，身上攏是管仔phoaN-lai5-phoaN-ki3的困苦階段。

　　　尚艱苦的時，是佇手術房外面充滿未知的等待。手術時間拖長，情形好親像真複雜。已經緊張歸禮拜的我，在佇遐，目闔倚，祈禱，心平靜落來，親像進入另外一個世界，已經會當放鬆來睏。

總是，大聲叫家屬的聲kah我叫醒。護士小姐找「患者的先生」。

「她無結婚，」我講：「我是她的妹妹。」

「妳會當做決定否？妳會當見血否？」護士用一款我聽起來真輕視的口氣問。（「妹妹」此個身份好親像完全無受尊重。）

我換穿病院的衫，戴口罩，入去看。Judie躺佇遐。所有所在攏蓋著leh，只有手術的部位看會著—一個真大的孔，感覺上是深long2-long2。她已經變形的子宮已經受摘除，囥佇一個stainless的盆仔內底。這豈真正是Judie？

醫生向我說明，因為腺瘤有湠到別位，著互我知，嘛著決定欲直接進行較大的手術，抑是另日再講。護士真急欲知，醫生顛倒較安靜。忽然間，我真驚惶。十幾冬前妹妹的手術，一睏進行八、九點鐘，輸三千西西的血，彼個記憶猶是遐呢深…

醫生講：「若欲繼續，我著去揣另外一科的醫生作夥來。」

外口天已經欲暗。身軀邊攏無人。我小聲講：「今仔日做到此就好。」

「安呢才對！」醫生講。

我自己毋知安呢的決定是否是真正著。只不過知影，全家夥仔，包括Judie自己的心理準備，攏猶無準備好欲來接受koh-kah大的手術。

出來無joa7久，就擱互護士叫入去，為著止痛的藥劑批價。（In猶是欲揣「患者的先生」。）

醒過來的Judie，回答護士的吩咐攏用日本話。我猶未聽過她即溜的日語。大船妹妹與我攏笑出來。後來，Judie講，她感覺自己佇一個真生疏的所在，有一窾佇日本旅行的感覺。

佇我上課無閒的時，大船妹妹認真擱體貼照顧Judie。

隔日，媽咪嘛來，顧一暝。清早，護士將阮的可愛媽咪當作看護，叫她起來清尿袋。

（待續）