追尋天使

文睿安捷組的作品，嗯—有專業水準，規規矩矩，手工幼路，親像一篇昔時，當新聞報紙猶甘乾是用來報代誌的時代，彼款清清楚楚，樸僕實實，無噴狗血的報導。

「苦瓜道人的唱片行」此個短片，替此間有特別風格的小店，留落一個簡潔的記錄。兩位少年人好奇的眼光，由鬧熱滾滾的中正路入來，爬上暗暗、礙礙的樓梯，停佇門腳口，然後，有一點仔歹勢歹勢，溜(soan)過惟因唱碟二樓細細的空間，內底大幅的圖、奇怪的古董，鏡頭貼倚佇苦桑放黑膠唱片的手，貼倚苦桑的目鏡，貼倚苦桑柔柔的長頭鬃，然後退出去，溜出去看精緻的唱片，看唱片架仔頂有個性的指示，溜出去看音響室內面的冊架仔，溜出去chhai7佇角落，看人客與老闆的互動。

            感覺上，與自己去惟因的儀式有相親像。

            鐘永豐出現佇鏡頭內底，講一寡對苦桑真尊敬的話，林生祥用憂鬱的面容，彈吉他唱歌，細聲感謝苦桑的啟發與教導。屏東的少年唱片行老闆，高雄市的咖啡廳老闆，大家攏用敬愛與歡喜的態度，講in所經驗過的苦桑—讀萬卷冊，若活字典的傳奇人物，堅持作一個反抗主流價值的人，一面打拚分享智識與美感，一面打拚玩的人。

            碟報與部落格頂面選落來的苦桑名言，用字卡的方式插佇片內，配合苦桑自己的講論。辛辛苦苦修理機器，溫溫柔柔放黑膠唱片的過程，將一段一段的訪問穿穿咧做一貫。此個片，佇講故事的能力上是真昧壞的。

             不過，片內的苦桑是有較平面啦！阿都攏無人講一寡較負面的話，攏是苦桑粉絲Club。主題嘛猶無夠清楚，較像一款給人講寡新鮮的代誌就息的電視報禱。兩位導演是溫柔人，歸個片有一款思古的情懷，雖然苦瓜道人並嘸是古人，惟因嘛嘸是過去式。手工的，類比的，相對於機械的，數位的，豈真正就會互人感覺這是“昔時”與“現今”的差別？明快的，電音的，反抗的，另類的，這個紀錄片其實猶會當用足無相款的調性來表達。

兩位導演對自己嘛無滿意，in想欲繼續拍，繼續剪，看主題會較明，探討會較深否。In 聽傳說講，惟因的樓頂猶有一個與二樓的音樂世界平行的冊的世界，足想欲去探奇咧。

            佇音樂產業頂面，堅持有自己特色，與佇全球化的趨勢中間的本土認同，有什麼款的關係？

台南的藝術生命與府城阿舍的關係是安怎的？

　　　若是我，我會用鏡頭與音樂繼續探討「巷仔內的府城」的奇妙世界。可能嘛會當套用彼日影展第一齣片的導演的手法，會當用時常出現佇此款巷仔內的府城阿舍吞吞吐的論述，長長長的無言無語，囉囉唆唆的獨白或是對話，一再出現的窄擱小的巷弄空間，一再出現的窗與圖，來表現一日擱一日，一冬擱一冬，看起來平凡無奇，總是自自在在的非主流的趣味人生。

        欲對抗全球化的壓迫？就是，心靈與肉體攏無受全球市場機制束縛，自在，樸素來活吧？