November 6,2007
群峰頂面的雲天
Photo by Judie35
那是阮厝內光景thong7壞的一段日子：阮老爸受到一位生理伴的牽連，欠銀行眛少債，甚至與阮作夥成長的厝，也雄雄受到法院的查封、最後拍賣去。
本來已經準備退休的阿母，著擱再一擺將家庭的經濟擔負起來，她繼續在女中教冊。我的父母離開in少年時作夥起造夢想與家庭的舊厝，搬去到嘉義的郊區，暫時住佇一個新的社區大樓，一間小公寓內。
阿母一直無法度恰意市郊新社區冷淡、陰暗大樓。在寬闊吵鬧的公路邊的大樓公寓，與她所成長的市區熟悉的細條街仔、學校與菜市場離甲遠遠遠，很難互她去感受到家鄉的溫暖。
故鄉的感覺，是佇另外的所在。那段時期，in時常騎著oo5-to7-bai2，往山邊去，在青翠的山谷裡，行佇爬崎的山路。層層疊疊山嶺親像老母，將他們抱佇胸崁前。漸漸，in發現了一個互in的心靈得著平安的地方，彼就是嘉義郊區的仁義潭水庫大壩。
消失的家園
當初時，為了起造這個供應嘉義地區民生用水的大水庫，著將一個叫做「內甕」的莊頭歸個遷走。
會記得這個計劃正在進行的時陣，我曾與一位高中的同學作夥去到她在內甕的老家。那時，我真好奇心。我想欲看那個將來完全會消失在水底的所在。
巴士慢慢啊駛出市區，彎彎oat-oat路，通向山內，路真隘，爬崎起哩，入去到內甕，眼前才出現一片較開闊的山谷。莫怪叫作內甕，山嶺包圍的莊頭，親像佇甕仔底。山谷內猶有幾畝水田，有青翠的竹仔與深綠的相思仔。山坪大部份已經開發作果子園與檳榔園。莊內大部份是黑厝瓦的農舍，只有幾間仔紅毛土所造的兩層樓。雖然這只不過是嘉南地區很普通的一個農村，總是山內的安靜與平和的氣氛，對來自市區的我，有一股獨特的吸引力。我彼位靈秀聰慧、數學第一的同學，就是佇這款美麗的環境長大的！她給我講，她已經這片家園會消失的事實。提到補償，就會當支持她與她的妹妹去讀大學，比守佇舊家園擱較好！
總是啊，我的目珠猶是戀慕、愛惜這一片山谷。
濟濟冬後，我站在水庫的壩頂，看歸片幽幽的湖水時，猶是會想起昔時許濟人在這辛苦，所開闢的果園，砌的厝，猶有那彎曲爬崎的山路。Chia2-e5一切，在大壩造好了後，攏沉落在幽幽的湖底，互水蓋去。只有過去在山頂一間舊竹仔厝，今成為孤島上寂寞的孤厝，吸引好奇者的眼光。有足濟年，佇那個島頂面，有人giu2白布條仔抗爭，罵政府徵收土地無照公義。彼條白布條一直佇提醒人，chia bat是人兜。日子慢慢仔過去，不知什麼時陣，布條也無去了。
Judie35
大壩頂的風吹
大壩砌好的時，我早就已經離開故鄉，讀書，工作，將流浪當作常態。
佇一個秋天的拜六下晡，我第一擺與老爸踏上壩頂。彼時，我與阮爸的生命裡底，攏有足濟壓力，阮無法度講起自己的煩惱，總是會當作夥騎機車出去旋。
爸導我去到他和阿母所發現的新避難所，就是此個寬闊的大壩。壩頂人足濟，濟濟人在放風吹。我已經不記得那是阮所帶來的紅色的厲鷂風吹，抑是別人在放的風吹，甘單會記得紅色的風吹慢慢仔掙扎，飛去到到半空中，它一直沒法度親像別人的風吹飛到遐呢高，風吹頂的鳥仔毛的花色一直攏看會明。我和父親坐在大壩邊，看下面一粒一粒大粒圓石所砌出來的長坡，嘛舉目來看遠遠的溪與歸排的山嶺，佇山的包圍中，阮才慢慢仔講起幾冬來來這個城市和我們自己生命的變遷。
阮回想起我在幼稚園的時候，第一次看到浮佇厝尾頂，活活潑潑在甩飄帶的普通四角風吹，就快樂興奮，教示彼就是天使的往事。阿爸想起他和學生一起為阮所糊的蝴蝶風吹，猶舊有，後來在樓尾頂所放的紙風吹。阮生命內的風吹一直攏無飛到無法度到的所在，就是有時斷了線，旋一箍輪轉栽落來，猶是會當撿轉來。
阿爸與阿母佇失落原來的厝了後，開始佇此找到安寧。In日日去遐散步，坐佇大壩邊唱歌，在失落中，in猶有能力去眠夢，猶會當心懷感激，享受廣闊的天。in的愛如堅軔的幼線，揪著我chih-e5在風中掙扎的風吹，in對上帝的的信心，與信仰中的喜樂化為風，承載我反悖的翅。我曾為著失落充滿童年回憶的厝，受氣、驚惶。佇失落舊厝了後，彼一擺的歸鄉，對我來說，已經無擱是轉去到故鄉，只不過是去探訪父母而已。總是，在大壩頂看著風吹在飛，算看由囝仔時代到現在，在我的生命中，有偌濟美好的時刻，或是流目滓，或是歡喜來笑，一切攏充滿上帝的恩典。
我無擱為自己失落的家吐氣，我嘛無擱為著沉落在湖底的農村感到憂傷了。
Photo by Judie35
燦爛的鳳凰花
仁義潭水壩的壩下跤有一條路，路邊有一排鳳凰木。這款高大壯觀的樹木，通常是要人由下面舉頭來看那片若大枝傘撐開遮蔭的青翠，欣賞in伸向四方的長長樹枝。總是，站佇壩頂，大樹變作是在阮的腳下。Chia2-e5樹有濟濟無相款的面貌：春天是一片幼秀的青，在熱人滿樹攏是火紅的，燦爛花蕊，秋冬葉子稍寡落，種子莢如刀掛佇遐。
一個熱天的早起時，我陪父母去壩頂散步。in慣習在早時四點多，連魚肚仔白攏猶未現出來的時候，就上路，駛車前往仁義潭。到壩頂時，天才漸漸現出一點白色，往往是在行到壩的盡頭，旋轉頭行的時候，日頭才會出來。
走轉來到壩的這邊時，榕樹頂的厝鳥仔一睏突然間攏醒起來，歸樹攏是鳥仔在唱歌，真正鬧熱。一個開始，壩頂真安靜，散步的人雖然會互相點頭招呼，總是行路才是最重要的，我嘛專心大步來行。在昏矇的光與薄薄的霧中，我無注意到火紅的花樹。直到旋轉頭來行的時，光線變強了，親像野火的花樹啪一下，跳入我的眼簾，真是燦爛啊！美kah互我的目滓滴下來。
我愛這排鳳凰木。以後敲電話給父母的時，我就會問起那排鳳凰木有開花啊否。若知影有風雨，我會問起那些花，有受風雨的傷害否。
阿母講，鳳凰花一冬不若開一擺花呢！整樹的花攏謝去了後，還會擱再開一輪。這是我過去唔曾想過的。從小所學到的知識是：鳳凰木開花的時刻，就是畢業的時刻，是告別童年，與熟識的朋友別離，離開原來的環境，踏入無可知的新階段的時刻。所有離別的悲傷，和新開始的興奮，毋是攏親像鳳凰花相款，雄雄開甲美無比，然後就結束？
總是，阿母講，那猶不是結束，還有一輪花開。
有時在花蕊通美的時，花互暴風打落，樹枝斷去。總是，樹仔猶舊有氣力，會當開出第二輪的花。第二輪的花，無親像熱天拄開始的時的花遐呢仔豔，色調較含蓄，不擱親像一把野火，是親像蠟燭的火燄。
這些樹讓我想起泰戈爾的兩首短詩：「我的靈啊，你當安靜！因為樹木在祈禱。」「我向樹仔請教：給我講上帝的代誌。用滿樹的花，樹來回答。」仁義潭大壩下面的鳳凰木，佇南國的日光與風颱中，祈禱，講起上帝的奧妙。
群峰頂面的雲天
當阿爸與阿母日日去佇壩頂散步，以感恩的目珠，看天漸漸光，地上萬物漸漸醒，in注神聽、注目看風與樹所講起的上帝，in開始發現屬於in自己的，講起上帝的方式。
我通愛阿爸講的：「上帝用祂的彩筆，日日為咱畫一幅新的圖。」
逐日，他們面向著一層又一層的山嶺來行，左手邊是平靜的湖水，正手邊是大壩下面路，路邊一排鳳凰木，擱再過去，就是寬闊的平野與溪埔。佇in頭前，山一層又一層，每一層的色調都無相款，由近近的深綠、灰綠，到較遠的淺紫、通遠的高山是與天同色調的灰藍、淺藍。因為光影在變化，群峰有時像平板的剪影，有時現出深深的皺痕，顯露出峭壁與深谷。天氣清爽的時，在群峰的頂面，會當看著高高的玉山。
群峰頂面的雲天，通會當表現出阿爸所講的「上帝的彩筆」的功力。互日光染作粉紅色的高積雲，一目暱就散作無數輕靈的羽毛。由群山中間湧出親像流水般的一道白雲，或是靜靜飄浮，親像船仔的雲，in不斷地用活潑的體態，在講起上帝。愛攝影的阿爸，曾用相機記錄過幾幅這款的壯麗，但是他講，上帝的畫是變化無窮，美麗到極，你只會當發出歡喜的讚嘆，在彼的時刻，好好仔享受祂的同在。
在上帝的彩筆揮灑下面，美麗的雲天之下，我的父母揣到in的故鄉，一個不斷佇變化的，充滿驚奇與新光景的家。故鄉無佇一個固定的所在，是佇一個信念內底。我的父母體驗到此點，所以in開始佇在多變的人生中，享受在上帝永遠的懷抱的平安與喜樂。
我嘛因為安呢，將手牽手行佇壩頂的父母的形影，列入去做我心中的聖境之一。
王貞文2007/9/1（台文戰線第八期）
引用URL
http://cgi.blog.roodo.com/trackback/4428511
回應文章 
Karla姊,
咱讀貴文，向來是用唸的，不免發現某些字詞受華文干擾了，比方第1段～
L2眛少債，甚至與阮作夥成長的 房子，也雄雄受到法院的查封、最後拍賣去。
L6公寓，與她所成長的市區熟悉的小街、學校與菜市場離甲遠遠遠，很 難互她感受到
咱讀貴文，向來是用唸的，不免發現某些字詞受華文干擾了，比方第1段～
L2眛少債，甚至與阮作夥成長的 房子，也雄雄受到法院的查封、最後拍賣去。
L6公寓，與她所成長的市區熟悉的小街、學校與菜市場離甲遠遠遠，很 難互她感受到
Posted by Kh`o
at November 6,2007 13:52
苦桑果然是真利害。
即篇是華文改寫的，有的所在就改無著，
”台文戰線”的編輯竟然無掠出來，
大概是想講文責著自己來負。
好佳哉，貼出來大家鬥檢查。
Posted by karla
at November 6,2007 17:59
![[Syndicate this site]](http://cdn.rimg.tw/images/blog/rss.gif "Syndicate RSS feed"){kind=small}
![[Syndicate this site]](http://cdn.rimg.tw/images/blog/atom.gif "Syndicate ATOM feed"){kind=small}
