追尋天使

（為神學生所寫的啟應文）

        啟：1947的一場變局，留落傷痕到佇今日。

        應：醫治復和的路上，莿帕、石頭滿滿是。

啟：平安路是十字架的路，咱著背十字架隨主來行。

應：平安路是十字架的路，咱知主會與咱相同行。

啟：著拭去受傷害的人的目滓，盡心來聽隱密心底的故事。

應：著趕除台灣人心頭的驚惶，好膽來疼這片土地。

啟：基督為咱揹十字架，經過暴力、死亡的深淵。

應：基督復活賞賜勇氣，小膽心靈變勇壯。

啟：著跟隨救主，抬十字架。

應：用咱青春的血汗，代替二二八無辜的血。

啟：為公義，為真理，付出愛的代價。

應：咱的行動，欲成做一首勇敢的歌。

啟：唱互全世界的人來聽，

應：顯明上帝公義愛痛。

          *                  *                              *

啟：二十冬久公義和平運動來醫治，

應：著互二二八成做咱的逾越節！

應：咱有對奴隸的心態得解放，用自由的腳步向前行！

啟：親像以色列百姓出埃及，著互二二八成做咱的逾越節！

應：自由的路途無好行，腳步錯亂閣沉重。

啟：總是上帝搡咱行，祂欲導咱入平安。

應：著互二二八成做咱的逾越節，

應：記念得解放的日子。

啟：著互二二八成做咱的逾越節！

應：苦難的記憶成做盼望的氣力。

啟：平安的異象在引導，

應：基督的愛助咱來行。

啟：衝突攏欲息，利刀打做犁頭，

應：此國無舉刀攻擊彼國；in也無閣學習交戰。

啟：上主的永遠的平安臨到，

應：人人安然坐佇自己的葡萄樹腳，

應：無擱有驚惶與死失。

啟：上主親嘴來應允，

應：公義平安今相親。