December 21,2013 08:33

不互驚惶較贏

 今日(2013.11.05)早起在南神帶領早禱。努力想欲kah最近的議題點明,想分享互人得著活ê信息。

指定經文是詩篇119:137-144,裡面充滿了對上帝的誡命與律法的熱情。我分享了自己得到生命與復活的經驗之後,繼續說: 

遵守上帝律法ê基本意義

今仔日,佇充滿恩典活命,復活ê光中,我想欲kap大家甘當就詩篇119篇144節此節來分享。
此節,巴克禮牧師是安呢翻譯:「祢干證ê話永遠是公義。求祢予我智慧,我就會活。」

上帝ê話,公義,智慧kap活命,是此節詩句重要ê詞。上帝公義ê話與智慧、活命,互相有什麼關連啊? 最近咱攏真關心上帝ê話語是毋是有受遵行?真關心上帝的命令與律法有法度佇此世界顯明出來否?真濟人親像此篇詩篇所描寫ê,為著「對敵」忘記上帝ê律例來憂傷受氣。

總是,彼個予人佇患難中所仰望、所記念ê,「上帝ê命令」與律法是什麼?是甘當律法中 ê一兩條嗎?咱是因為將其中ê某一條律法掠著著,用它來審判咱ê兄弟姊妹,用安呢來互咱 ê團體「得到活」嗎?

上帝予人活命ê方式可能毋是安呢。若咱詳細查考聖經,咱會看見律法的全部,是充滿故事ê五經,是人性與上帝ê恩典相演(摔角)先知書。咱會看見上帝與祂ê子民所立ê約,與祂與人同行ê歷程,是充滿憐憫與愛疼..ê。

全律法與先知ê總根頭,佇希伯來聖經安呢講,耶穌嘛koh一遍佇馬太福音中間提醒咱,就是咱攏會曉背--ê句:「你著盡心,盡性,盡意疼主你ê上帝。你著疼厝邊親像自己。」
咱本是受拒絕ê「外邦人」,今會當入佇此個約,成做上帝厝內ê人,會當用此個「上帝兒女」 ê身份來疼上帝,疼人。這是通大ê奧妙與智慧。

「深沈啊!上帝ê智慧與見識ê 富有啊!伊ê 判斷袂測度得,伊ê路途追揣袂著!」(羅馬書11:33)


著較贏驚惶

過去此幾個月,我倒佇病床,總是一再經驗上帝所賜ê復活,享受活命。
同時陣,台灣濟濟信徒與教會領袖遂一再看見敗壞與毀滅。予人著驚ê講法四界流傳,大家驚道德可能會毀滅去,驚聖經ê律法會失落氣力,驚家庭會崩去,族群會失去生命力。我敬重大家「做守望者」ê熱情,看見有ê人內心ê 爭戰。總是,我嘛看見互驚惶較贏ê 結果,是予人失落「看見真實」,「看見活命」ê能力,陷落去奉主ê名行自專自義ê 事ê危險。復活ê光,恩典ê光,無法度照入去此款集體ê驚惶中間。這予我感覺心真痛。

佇過去此段日子,與死亡爭戰ê 時,我一直平靜自在,因為深知,對咱基督徒來講,死亡袂當掌權。死ê權勢無能力敗壞受贖ê人,嘛無法度敗壞受贖ê團體。
總是,一旦互驚惶較贏,咱就有可能失落活命ê 喜樂與勇氣。驚惶無受束縛,驚惶養飼怨恨,會敗壞人,會互一個團體、族群失去愛ê能力,真正漸漸分裂、崩壞去。驚惶ê情緒,是魔鬼通好ê工具,是獨裁者用來掌權ê基礎。
只有基督佇十字架所顯明完全ê愛,以及上帝予基督由死復活ê 大能力,會當幫助咱,由此款ê驚惶中重新活起來,重新遵行上帝「全律法與先知ê總根頭」來活!

神學院ê 危機

佇此波驚惶ê大湧中,咱ê學院嘛受著攻擊,受著威脅,互人看作是部份律法ê威脅,是應該受教訓與管教ê團體。
咱一向毋是完美ê團體,有濟濟需要受調整。若是此個管教出自上帝,咱會當好好來將它看作是「拔出、拆毀」ê機會。為著將來欲經驗著上帝 ê 建立與栽種。若是此個「管教」是人ê意思,出自看見毀滅ê驚惶,出自權力ê計算,佇賜活命ê上帝ê面前,有一日咱會知,這是人自義與計謀若定,上帝親自會定奪。
所以,面對危機,咱無驚惶,嘛無逃避。此款ê危機予咱學習「敬畏」,敬畏尊趁上帝真實的、充滿活命ê全部律法,就是盡心、盡性、盡意愛咱ê上帝,無掠自己ê做萬物ê判準。此款ê危機予咱學會曉謙卑,予咱重新會當去學習怎樣「愛厝邊親像自己」。

若咱會當曉悟上帝欲愛咱做ê,攏是由祂賜人豐盛活命ê旨意來,咱就盡力、無驚惶、無憂悶,自在來行佇祂已經指出予咱ê活路。咱是祂所揀選ê,咱ê果子會「久長」,活命會生湠,此一切在於上帝,無在於人ê手。

願咱抱著此款ê 信心,來吟聖詩618首:
「咱著倚靠上帝,盡職向前無退。
 深信、向望,靠主來行,一切工作會成。
 驚惶咱著除去,向望,無得餒志,
 上帝知咱一切苦難,憐憫體貼幫助。」    

  • jenwen93 發表於樂多回應(0)引用(0)編輯本文
    樂多分類:文字創作切換閱讀版型 │昨日人次:0 │累計人次:333
    贊助商廣告
     

    引用URL

    http://cgi.blog.roodo.com/trackback/26173146

     
     


     
    -
    贊助商廣告