追尋天使

記「虱目仔e滋味」與「天使」的新冊發表會

「虱目仔e滋味」與「天使」的新冊發表會結束，滿心感謝、感動，位台北倒轉來台南。手內抱一把用粉茄仔色的紙包ka2真正sui2的藍色蓮花，這把互人欣羨的、甜蜜的祝福，是位瑞典倒轉來的黃晴美姊所送的。她的出現，互我一個足大的surprise，因為並無料到她此時會佇台灣。

 　佇日日備課的壓力下面，koh經過一禮拜囉。藍色的蓮花度過thong7-sui2的時，今已經開始lian—ki3。總是佇新冊發表會所感受到的，所有文友交織出來的廣闊氣力，猶著搡我向前，真濟的話題，猶佇我的心內佇發酵。

此擺擱一擺看著台文的研究者與創作者的用心與努力。鳳珍姊有批判力，有氣勢；陳明仁先生一直無放棄他的堅持；陳恆嘉先生發言溫婉；勤岸兄猶是有厚厚的詩人氣質；廖瑞銘先生充滿熱情；豐惠姊做代誌實實在在，是有耐性與毅力的組織者、推動者。少年研究者呂美親的熱情促成這個發表會，認真寫作的劉承賢來鬥相工，罔報讀冊會的人事先讀過阮的小說，美親與謝一麟先生為阮訪問讀者，拍一個短片。多媒體的展現與用心，互我一方面感覺：「我的作品其實m7-tat-leh大家用chiah-che7心來宣傳。」一方面koh真正為著台文的發展來歡喜—台文的世界嘛是現代科技的世界，是少年人的語言，台文運動嘛是會運用新款式的媒體，新的傳播空間。

佇發表會的時，我koh再一擺欣羨清文姊遐呢活潑的台語，她筆下充滿生命力的台灣婦女，會互人感動。與她本人見面，真無法度了解是安怎足濟人講她是一位「平凡的婦仁人」。其實她有一對無平凡的、真敏醒的目睛，話少，總是有力、正確、充滿幽默的氣味。

　回想我自己開始用台文寫作的時，孤單、驚惶，只有用單純的熱情，看著前輩的文章，就學in的用字與用心，m7-知讀者佇什麼所在，m7-知安呢寫，會互逐派台文的運動者接納到什麼程度？我對自己的創作，一直是無真大的信心。TaN創作的人已經愈來愈濟，會當學習的對象變多元、趣味，共識嘛較明囉。此擺大家有機會做夥談論，嘛除去我過去對「罔報」的一點仔心結。

回顧「台文罔報」行過辛苦的十冬，照陳明仁先生的講法，是用「謙卑」的態度、「罔做」、「罔登」，無追求主流文藝界的注意，惦惦來做，無想到會當堅持十年。

編者謙卑講自己是「罔做」、「罔編」，總是作者用心全力來寫，會變ka2真kau7-khe5，無法度作夥來接受謙卑的訓練。六、七冬前，第一擺投稿互罔報，我看著自己用be7少的心血，磨足久才寫出來的文章，互人當作「chhin3-oe7 bong2-thng7」，心內實在真geng5。佇對自己真無信心，無法度接受此款的打擊的狀況下，我對罔報的投入就冷落來囉。彼時，koh是「台灣e文藝」開始招兵買馬的時，我就將精力投入「台灣e文藝」與「島鄉」這兩個真「小眾」的台文雜誌。

不過，我一直攏有在讀「罔報」，佇此學台語，佇此感受台文運動的生命力。

我一直認為，是「罔報」在寫台文運動的歷史。堅持十冬的罔報，是台灣文學界的一個奇蹟，嘛是一個盼望的記號。我只是一直驚自己的作品無合充滿戰鬥性的罔報的性格，驚我的語言是過時、無合宜、教會內的話。

        清文姊講她嘛有稿是互人當作「chhin3-oe7 bong2-thng7」，阿惠解釋講，這個專欄來刊用較古雅、或是已經失落的台語所寫的文章的，意思是beh互人慢慢仔品味。唉！總是阮一看，是會了解講：阮的文章是隔頓的chhin3-png7 sioh？

        經過阿惠溫柔的解釋、清文姊的同感，我的心結解開lah。我想，這是此擺參加佇新冊發表會其中一項通紀念的代誌。

        我將晴美姊所送的藍色蓮花moh轉來台南。其實，我真想beh將花留互辛苦籌備此擺的新冊發表會的「罔報」同工。總是，我嘛足想beh互晴美姊的祝福陪伴我佇台南的生活，嘛足愛用此把藍色的蓮花來紀念我自己佇無知與kau7-khe5的個性中，猶互人疼有餘（chhun）的幸福。

一枝蓮花送互美親，無她的堅持與熱情，我boe7來到台北。

        罔報的同工，文友，多謝恁的疼，恁親像一蕊一蕊奇妙、特別的藍色蓮花，互我看著希望，幫助我繼續來創作，來眠夢！

王貞文2006/10/21

攝影：Judie35

http://www.flickr.com/photos/chiaubun/sets/72157594335544156/