追尋天使

佇新冊發表會遇到黃晴美，真正是想beh到的歡喜。

想起2001年佇瑞典與她熟識，心靈的交流的溫暖，互北國的雲天攏變清爽。

貼出彼時所寫的長文，紀念此段相遇的故事。

真可惜，台灣在變，故事中的人物的命運嘛已經有真大的變遷。當作是古早故事，紀念親像山內雲霧變化多端的，台灣人的命運。

船khi5一旁

海湧兇煞煞灌落來

滿船e5水

想欲(beh)扈亦扈袂離

著掠著方向

耐心等待

慇慇勤勤操作

人生e5小帆船

風颱若過

猶有長長e5海路要行

１. 看tioh真濟野草莓

    北歐熱天e5天真正藍，罩佇廣闊e5平野，互人e5心嘛開闊起來。日頭e5腳步慢，無要落山，一直到十點﹑十一點，日光猶斜斜照踮羊群e5身上，歸大片e5草場，無什麼人影，只有鳥隻啼叫e5聲。日頭照袂到e5樹林內，雖然暗暝e5氣味一直罄起來，樹腳一點一點白色e5野草莓花，猶發出清淡e5﹑溫暖e5甜芳。

    我猶毋曾看過發甲這呢密e5野草莓。野草莓e5葉仔比田內e5草莓幼秀，花蕊只有尾指栽e5指甲遐呢細。我佇德國去學校e5路- -ni3，有幾叢仔野草莓，發佇樹林間，真希罕，就是有看著紅紅e5果子匿佇葉仔腳，我嘛毋甘伸手去挽，想講，著留著互它擱繼續生湠。

    來到瑞典，遂看著四界e5樹林攏有發野草莓。我想起柏格曼(Ingmar Bergmann)e5電影「野草莓」，對消逝e5青春e5眷戀。智慧e5老人穿插整齊，滿面風霜，互滿面青春e5查某囡仔幼白e5手牽leh，行過少年時代e5草埔。

    我好奇來到瑞典，來拜訪少年時有夢e5台灣人：一九七ｏ年，四二四刺蔣案了後，來到瑞典e5黃晴美與張文祺。

    九十年代，刺蔣案e5兩位主角鄭自財﹑黃文雄與一寡有關e5人，陸續轉去台灣，這兩冬嘛一直有關係這個案件e5歷史定位e5討論。對阮此輩e5人來講，無論這個事件e5歷史定位是安怎，佇這個完全失落理想e5世代，看前一輩e5人e5至情﹑行動力與犧牲，在阮心內漸漸枯乾e5心泉，就會擱罄出活水。

    三十冬啊，是毋是壯志會消磨去？是毋是心會冷去？是毋是人會變現實？是毋是眠望會消失？

    三十冬啊，留佇海外，冷靜觀看台灣e5人，心情安怎變化？

    我用不安e5心，期待kap　in　熟識。

２. 少年阿婆黃晴美

黃晴美e5腳步輕快，導我到山頂會當看到峽灣e5所在，彎彎越越e5小路通過大石，石壁邊發甲青青翠翠e5，是野草莓。「野草莓開花e5所在，」她輕輕講：「在瑞典文內底有真浪漫e5意義，是人心內欣慕e5所在。」

她已經超過六十歲，長頭鬃烏森森，猶充滿活氣。細漢幼骨e5身材，活潑e5行動，圓圓e5面笑起來，有少女e5純真。她穿插真樸素，無抹粉e5面，互日頭晒甲紅紅。

她一直講她老啊，記智bai2，做代誌慢吞吞。她講話慢，想代誌真正斟酌。總是，她有好奇﹑開放e5目神，輕輕﹑好聽e5聲音，在表達一粒活跳跳e5心。過敏症e5病痛來糾纏，過去geng5-sim﹑chau2-chong5e5日子佇她身上刻落痕跡，她因為身體欠安，已經離開她所心愛e5教冊頭路。不過，na7-si3講著她ti-leh準備語言教學所用e5心，所運用e5方法，以及學生e5反應，她e5目睛就光起來，她是一位認真e5老師。雖然是退休啊，猶是參與師資訓練的工作。

她謙卑講：刺蔣案籌備e5時，她扮演e5是傳統查某人e5角色，全心te7照顧兩個囡仔。我想，佇hia3-e5情緒緊張e5日子，下決心將照顧囡仔e5責任擔起來，迎至可能發生e5一切狀況，所需要e5勇氣﹑耐力與智慧，無比站去一線行動e5查甫人較少。

黃晴美有傳統台灣婦女堅毅勇敢，無論環境是啥款攏為囝仔活落去e5活力。她e5政治理念，與翁婿鄭自財﹑阿兄黃文雄是同款e5，就是相信台灣人一定要把握時機，拼命來爭取自由獨立。所以她全心支持此項行動。就是到今仔日，她猶深深相信，當時刺殺蔣經國e5行動，雖然無成功，總因為安呢，台灣人e5心覺醒，統治者嘛有真正有互台灣人堅定的心聲驚到，才有「蔣經國時代」漸漸重視本土菁英e5政策出現。

「阮毋是針對蔣經國此個人，嘛毋是要用暴力e5方式來建國，只不過彼時有此e5機會對全世界喝出台灣人e5心聲，所以阮著把握時機。阮毋是親像彼時報紙所講e5暴徒。」

她講，當初，她只是真單純，用「m7甘願」e5心來支持黃文雄與鄭自財e5行動。因為m7甘願台灣人e5聲受欺壓，m7甘願看著台灣人受獨裁政權e5控制。因為m7甘願，所以她支持黃文雄與鄭自財棄保逃亡，無愛看in去坐監。因為m7甘願，鄭自財佇瑞典獄中絕食抗爭，拒絕接受引渡，她嘛佇監獄外絕食抗爭，發新聞稿﹑爭取人權團體的注意。她感覺自己m7是什麼英豪，只不過有一股m7甘願e5奮鬥意志。

這呢濟冬過去，她猶舊是一位有自己e5個性﹑自己e5主張，外表溫柔，重義氣﹑意志強e5女性。

她有寫過一篇文章，回憶與她e5ni3-chiang3黃文雄鬥陣e5日子。講到兩個人分別28冬，1997春天黃文雄轉去台灣，in才擱見面。雖然分別chiah-ni3久，兩e5人猶會當親像少年時代，自由自在開講，作夥去故鄉新竹，細漢e5時thit-to5e5頭前溪邊散步，她講起「少年阿公」黃文雄將她這個「少年阿婆」揹起來，潦過水窟，親像轉去到囡仔時代。

當我讀著此篇文章e5時，我已經轉來到自己寫論文﹑上課e5日常生活，總是，頭前溪e5彼幕少年阿公與少年阿婆e5情景活跳跳出現佇我e5面前，與另外一幕「有丁香花e5風景」相疊(tha2)：

我與晴美姊佇她所住e5小島散步，紫色e5丁香四界開，人兜e5花園內有大蕊白牡丹。阮行啊行，來到開闊e5野地，草仔自在青，草仔花自在開。晴美姊不時tioh8互草埔頂趣味e5細蕊花蕊所迷，用輕快e5腳步，行過去看花。簡單的草花佇她認真e5目光中，變作珍貴奇妙。她挽幾蕊花，準備來裝飾中晝頓e5桌。

有一蕊磚仔色，毛毛蓬蓬e5花孤單企佇路邊。她伸手準備欲挽，手伸一半，擱停落來，講：「這甘乾一蕊nia5，ia-si mai3挽較好。」她越頭，笑笑對我講：「其實無人規定講袂當挽，總是我就是會有一寡自己對自己e5規定。」直到欲入去樹林啊，遐有發真濟蕊共款e5草花，她才歡歡喜喜伸手去挽一蕊，加入去她手中e5彼把花。

這款對大自然好奇﹑欣賞﹑尊重e5心，互我感覺親像有清風吹過來。我無見著一位女豪傑，（雖然她有可能仍真有當年e5豪傑氣概），無看著一個「恐怖份子」，是看著一個對大自然e5生命充滿愛惜e5心，活甲真有原則e5女性。

我甲她講，我無想欲替她作傳，總是真意愛用她作原型，去發展一個小說人物。其實冬外來，我已經有構想一篇小說，總是其中e5人物無夠立體，我真意愛知影她安怎生活，通替我e5小說人物添枝添葉，添皮添骨。

她笑起來，講她e5囡仔時代與阿母e5故事互我聽。她e5信賴與友情，互我心內真正溫暖。

３. 張文祺滿bak-too2故事

    會當與黃晴美連絡﹑見面，張文祺先生是橋樑。張文祺六十年代尾去美國讀政治學，後來捲入去1970年e5槍擊蔣經國e5案件，奇妙e5因緣將他e5人生帶到瑞典。Chit幾冬，他真打拼寫文章介紹他所讀著e5世界文學，佇我所參與e5文學雜誌發表。我因為讀著他所寫e5文章，讀著與人對他e5訪問，稍可知影他佇瑞典樸素簡單﹑心靈充足的生活。曾想欲揣機會拜訪他，攏無tioh8時。

    欲去瑞典晉前，拄好「台灣e5文藝」e5胡長松總編將張文祺寫e5一首詩貼落去「台灣新本土社」e5討論網頁，我趕緊向胡長松討地址，然後通過國際查號台查到電話號碼，敲電話過去，竟然就安呢聯絡著他。

張文祺佇佇刺蔣案發生e5時，是台獨聯盟佇美國e5執行秘書，與鄭自財﹑黃文雄私下真有交陪。他講：讀冊只有讀一學期，續落去就一直無閒組織e5工作。刺蔣案發生了，他已經辭去台獨聯盟e5工作，總是熱心出面負責募保金e5，因為安呢，會當講是佇彼擺「海外台灣人空前大團結」e5募款運動中一個真重要e5見證者。佇風暴與熱情e5中心，他看著互人真感動e5赤誠，看著真濟人單純e5付出，嘛看著權力鬥爭，看著自私﹑心肝eh8-tu3-tu3 e5領導者。他滿bak-too2是故事，看代誌有他自己一套，總是只有肯講出較光明互人會感動e5部份，對無建設性e5「內幕」，他無siaN願意去講。

張文祺toa3-ti3歐洲有名e5大學城Uppsala，太太Elisabet佇大學醫學院工作。這是佇廣闊平野頂面e5古城。坐巴士由公路過來，遠遠就看著哥德式老禮拜堂兩座尖尖e5鐘塔。熱天，平原真青翠，入城了，看著真濟腳踏車，雖然是暑假，路裡e5腳踏車與路邊e5冊店，猶是有大學城e5氣氛。我一路互挨擠e5人群逼甲真躁(chak)e5心情，到此才安靜落來。

張文祺是六十歲人啊，總是一頭厚厚e5頭毛猶烏森森，穿插簡單若少年囡仔，行動言語活潑，嘛若少年囡仔。只有嘴唇頂白去e5嘴鬚，透露他e5歲數。此歸冬以來，他有歸擺轉去台灣協助一寡台灣本土文化工作，替一寡政治人物紡(phang2)基金會，做執行e5工作，無計較金錢名聲，嘛m7-bat激chit-e5 pan7，時常穿牛仔褲與義工鬥做粗工，tiaN7-tiaN7互人看無，互人喝來喝去。慣習活佇講究平等﹑人權e5瑞典社會，張文祺對台灣社會的貪慾橫霸﹑歧視弱者﹑心肝礙﹑意氣雄e5等等現象，真歹適應。

我佇張文祺兜toa3兩工，聽他講真濟故事，由他父母彼代阮此代，他講：「蕃薯仔牽藤牽牽e5歸大貫(koaN7)。」台南安平望族出身e5張文祺（他自己真不愛互人稱作是望族e5子弟），所識老一輩e5親戚朋友，真濟是台灣工商﹑醫界﹑藝術界有貢獻e5人，美國e5台灣人運動又是另外一大攤故事，九十年代台灣新氣象，海外為自決運動打拼e5人回國了e5遭遇﹑改變，擱有真濟通講e5。他對人名e5記智好，講人e5故事，揀好e5一面來講。有e5人，他只有會講：「我想無，in是安怎會變安呢？」

民進黨e5新政府內底，充滿互張文祺感覺：「是安怎會變安呢？」e5代誌。「變天」了後，原本時常來刁難他e5中華民國駐瑞典辦事處e5人員，突然間對他客氣起來，甲他當作是「僑領」。新任e5政府官員，若是對海外e5台僑與華僑演講，口口聲聲是「咱中國文化」，講台灣是「中國文化圈內面尚民主e5所在」。他聽著這款講法，心內真是痛苦，講台灣奈會chiah-ni7欠缺主體性與主體意識！

            ４．Elisabet

    張文祺e5太太Elisabet (無h)是一位幼秀可愛，充滿智慧與勇氣e5女性。她甲咱一般人心目中高強大漢e5北歐美女造形無共款，細細漢幼骨e5身材，靈秀e5面，金色e5頭毛剪甲短短，講話輕聲細嘴，總是內容真有份量。

    Elisabete5父母兜ti7-le2離Uppsala一千公里外e5北邊，是真寒冷e5地帶。總是由寒冷地帶來e5Elisabet是一個真溫暖e5人。她歡喜講起細漢飼羊仔e5代誌互我聽：雙生仔e5羊仔囝有一隻互老母放sat，因為羊乳無夠飼兩隻羊咩仔。她就用牛奶罐仔將彼隻細隻羊飼到肥唧唧，擱將伊飼到老，毋甘互人捉去thai5。

    即款對動物e5愛心，她一直攏維持落來。張家即馬飼一隻白色虯毛e5狗，叫作loo7-te2，嘛是一隻「孤兒狗」，本來e5主人自殺過身去，loo7-te2無位通去，Elisabet就收容伊。Loo7-te2佇張家e5日子看起來真好，「爸爸」﹑「媽媽」攏愛伊愛命命，不時有通好出去耍，人客（親像我）若看著伊兩蕊烏蕊蕊e5目珠與發出祈求e5聲e5細粒滑稽鼻仔，心就會軟，就會挈葡萄﹑香瓜，丟入去伊一直流涎e5嘴。

    Elisabet雖然對大家下「禁止飼狗」e5禁令。總是，她自己嘛是會將loo7-te抱踮腳頭窩頂懸，將自己e5暗頓分一兩嘴互伊，親像一個寵囝e5老母。

她自己e5兩位囡仔攏已經成年，讀冊打工，有自己e5世界。查某囡順麗不時敲電話轉來，母仔囡叮叮噹噹講話一講就是點外鐘。我欲離開e5彼日早起，她想欲去順麗打工e5咖啡店探chit- -e，總是她拄好值班值了，轉去休睏，Elisabet雖然失望，總是尊重查某囝e5作息，無欲去甲她吵。這呢尊重子兒e5老母，真是難得。

    Elisabet對人﹑對動物真慈愛，愛花愛草愛種作，總是對政治﹑社會公義等等議題，她e5目光是利利利，真有批判力。她出自文學e5﹑人性e5敏感與判斷力，互讀政治出身e5張文祺真佩服。張文祺曾設比喻講，他自己看代誌，就是只有黑白兩色，Elisabet會看著黑白中間e5灰，擱會詳細來辯明這款灰與彼款灰無相同e5的所在。她識真濟語言，心胸開闊，有世界觀，有文化情。她通大e5向望是退休了，會當住入去一棟古早作穡人e5厝，佇田園e5自然世界中，享受文學與大自然e5生活。

    若是in chit-e5眠夢會成。我想，in e5文學農莊，就會是一個野草莓開花e5所在。

            ５．女部長拜會張文祺　

    Elisabet真關心台灣。80年代，張文祺猶名列「黑名單」，無法度轉去台灣e5時，她就導查某囡﹑後生作夥轉去台灣見阿媽，熟識親戚朋友。對台灣e5社會現象，她真有自己e5意見與看法。這幾冬張文祺較捷轉去台灣，會將逐項變動與奇怪e5代誌一一說明互她聽，所以，她可能比我更較知影台北政壇與文化界e5一寡代誌。

    我拜訪張文祺e5時，拄好一位民進黨政府e5新閣員與隨員三十幾人來到北歐。這位女部長是台獨運動中真受尊敬e5人物，因為她是為台灣人e5自由與尊嚴來付出生命e5自焚者e5寡婦，做代誌認真，立場堅定。總是她擔任部長以來，與歸e5新政府拄著e5問題共款，就是用人e5策略互舊日同志sa無，真受批評。她猶是立委e5時，導查某囝出國渡假e5時，張文祺曾招待她與查某囝。

    Elisabet對女部長真有意見。照她e5看法，無論是毋是受政治考慮e5轄制，攏無應該對下手鬥相工e5人刻薄無情。她講女部長輕輕鬆鬆解除認真隨她e5忠心手下e5職務，起用佇國民黨內人面闊e5厲害女性作秘書，這是尚過現實啦！（＊張文祺先生請我毋通將這段發表出來，因為他感覺安呢互台灣人真無面子，該成台灣人攏真刻薄。我認為，一位部長e5佇特別處境e5作為，袂當代表所有e5台灣人。顛倒咱著互相批判求進步，所以我仍是照當日e5話題來寫。）

    此日，拄好我與黃晴美相約，佇張文祺e5厝內相見。張文祺才將黃晴美夫婦由驛頭接轉來厝，電話就響啦。女部長親身向張文祺請安，擱講，她與隨行e5人拄好來到佇Uppsala，問看會當與他見面否？

    張文祺是熱情e5人，隨時就應好，講欲去山頂古堡接in，人越頭就出門，無甲灶腳無閒e5Elisabet講一聲。

    我想起，若照台灣人e5規矩，可能大家就著等人客來，互相客氣請安，然後講寡無趣味e5代誌，黃晴美無閒歸早起，由斯德哥爾摩chhoan5來e5中晝頓就無味去啊！

因為Elisabet做人真親切好鬥陣，互我敢用對媽媽sai-naie5聲調講：「我無愛等人客來吃中晝。」

    Elisabet講：「in無受邀請。」她菜炒炒咧，阮就攏坐落來吃晝，無等男主人轉來。這呢有人權e5家庭，我真恰意！

    當張文祺導部長與代表處e5官員入來e5時，Elisabet並無起身甲in請安。女主人無振動，阮嘛攏靜靜坐佇hia。真敖看面色e5部長秘書，用北京話懸懸e5音調，不斷呵咾厝內布置有格調，呵咾阮桌頂e5菜色（炒米粉﹑山東白菜與鴨肉），擱過來蹣Elisabete5肩胛頭，呵咾她會曉煮台灣料理。Elisabet猶是冷冷，無講啥。使館e5少年官，與Elisabet有熟識，甘單問一句：「哦！吃中晝喔！歹勢，打擾。」就乖乖避去花園仔。過去，代表處時常刁難有台灣意識e5台僑，民進黨執政了，代表處e5人忽然變kah真客氣。總是Elisabet對in的態度猶是前後真一致。目前佇瑞典e5「代表」是過去國民黨典型e5「黨政兩棲」重要人物，雖然貪污受檢舉，猶是保留原職。總是，他與他真有pan7e5夫人，佇Elisabete5厝頂下嘛無膨椅通坐，與大家共款去坐踮外口花園仔。

    Elisabet無講啥，箸舉teh，安靜吃飯。人客一個一個攏表現出真謙卑真客氣e5款，連討欲去便所嘛攏足謙卑客氣。

    女部長皮膚幼白，穿甲真典雅，講話溫柔，毋知她有感覺著Elisabet真有批判性e5「無合作」態度否？總是經過遐呢濟風湧e5部長，就是心內有無歡喜，嘛是猶顯出真有涵養e5款，過來與黃晴美﹑黃晴美e5丈夫﹑與我握手，聲甜甜講，她擱來著愛飛去巴黎。她是一位真有吸引力e5女性。不過，佇此e5新舊政府定位袂清，台灣人e5尊嚴與自我認同變無明去e5時，佇此個厝頂下，她肩胛頭揹著舊官僚的枷，她過去e5光環，她本身e5好氣質，攏退色去。

    黃晴美e5丈夫Percy Andersson拄好參加一個會議了，有結ne-ku2-tai2，他擱生做仙風道骨，會當甲人講他是某某教授，阮笑講，Percy互阮此桌bo5-pan7 e5莊腳人，看起來有「與國際友人文化交誼」e5款式。中華民國駐瑞典代表彼位舊官僚與他e5夫人，若是有什麼無歡喜，阮會當講：阮在做國民外交！

    等人客一一去便所了，拜會也就結束啦！女部長猶是用甜甜e5笑容向阮告辭，陪她來e5人面攏無表情，一個一個緊緊soan出去。張文祺等ine5車駛走啊，才會當坐落來吃米粉。

    我想，若是佇另外一個時空，有可能我會歡喜見著女部長，甚至會對她講鼓勵e5話，總是，她互國民黨e5舊官僚﹑安全人員與不斷講話e5秘書圍著著(tiau5-tiau5)，親像關佇懸懸城堡內e5女王，就是勇敢e5武士，嘛救她袂出來。我找無話通講。

    Elisabet態度真自然，她嘛無欲互人歹看，只不過清楚表明：「恁毋是我所邀請e5人客。」她即款用平淡e5心「見官」e5態度，互我真感動。我講，瑞典政治人物是毋是攏真自然無pan7，親像互人暗殺e5總理Olaf Palmer，是一位騎腳踏車，堅持無用衛兵與保鑣e5政治人物...

    Elisabet利利回答：「這是他所用心經營e5形像，啥人知他是毋是真正無欲顧自己e5安全？啥人知他受暗殺，是毋是因為攪入去國際軍火生理有關係。」

    這就是Elisabet，佇她利利e5眼內，無政治明星，無偉大e5殉道者，只有一個一個平凡e5，互慾望與情勢搡teh行e5人。

    　  ６．主教公署

    張文祺所toa3e5城市Uppsala毋若(m7-na)是一個有名e5大學城，嘛是重要e5宗教城，有一間大大間e5主教坐堂。瑞典e5國教屬於基督新教路德派，真重視儀式與制度，真講究表面工夫，過去是敬虔﹑嚴肅，現今是變甲真冷真無氣力。

    張文祺導狗仔出來散步，順遂陪我去參觀哥德式e5主教座堂。

    禮拜堂真大真高，邊仔有神學院與主教公署。對文藝生活真有趣味e5張文祺，認真報我知：這間大間e5主教公署，就是柏格曼(Ingmar Bergmann)拍「芬妮與亞歷山大」電視影片e5所在。他安呢講，引起我強烈e5好奇心，一直在躡腳尾，看互鐵欄與矮樹圍起來e5大間石頭厝。古典的大厝樸素總是真氣派，互人會敬畏，欠親切感。

    「芬妮與亞歷山大」是柏格曼晚年e5作品，用囡仔e5眼光，來看藝術e5世界與宗教e5世界﹑生與死e5交纏﹑衝突。芬妮與亞歷山大是佇演員世家大漢e5囡仔。老爸過身了，媽媽擱嫁互受人尊重e5Uppsala主教，芬妮與亞歷山大由充滿音樂﹑笑聲﹑遊戲﹑鬧熱﹑日光e5藝術家家庭，進入去灰色﹑禁慾﹑嚴肅﹑充滿驚惶與病痛e5主教公署e5生活，真袂適應。情感豐富擱敏感e5亞歷山大，用囡仔有限e5氣力與堅強e5意志，反抗主教e5嚴格教育。Ine5媽媽發現這個婚姻是一個真大e5錯誤，彼位互人尊敬e5宗教家其實是一個病態﹑無安全感﹑自私可怕e5人，總是她已經無法度逃脫。亞歷山大時常會看到已經過身e5爸爸，企佇遐，用憂愁無奈e5表情看in受苦。亞歷山大怨恨爸爸傷過早離開in，怨嘆爸爸無氣力拯救in。好佳哉有一位猶太古董商，藉口講欲向主教買一口古早e5橡木大櫃，將囡仔偷渡離開主教公署。彼晚，主教飲著太太e5安眠茶，睏甲無法度阻止太太出走，厝內一位發神精e5親戚擱拄好車倒火油燈，將自己與他攏燒死。芬妮與亞歷山大佇連續e5意外中，重新轉去溫暖有人性e5藝術世界。

    柏格曼本身是牧師囝，宗教與藝術世界e5衝突，佇他e5身上留落袂少e5痛苦痕跡。他e5作品中時常有深沉e5宗教意識，他e5電影對人內心幽暗e5世界有真利的解剖。

    行入去主教座堂，拄好神學院e5學生佇遐teh早禱，我坐落來聽in唱詩歌，中古世紀的歌調，神秘清幽，親像離現實真遠。學生唱了真沉重無力。基督教e5傳統佇瑞典漸漸失落氣力，神職人員親像公務員，照規矩舉行禮拜﹑聖禮，總是無什麼熱情。

    十八世紀﹑十九世紀瑞典有興起敬虔派e5宗教奮興運動，特別是莊腳所在，有砌真濟細間e5「宣教禮拜堂」。敬虔派e5信徒有e5無願意擱去國家教會禮拜，自己形成一個一個小團體，有e5留佇國家教會內底，總是堅持聖經逐字是聖神所寫，無願意接納啟蒙運動用文學批判e5方法來解釋聖經。即款e5宗教運動，其實佇全世界攏看會著，不過，毋知是毋是因為地荒寒﹑生活艱苦﹑收成壞，十九世紀e5瑞典敬虔派e5基督教徒變成是一個真冷酷e5小團體。

柏格曼就有描寫過他e5老父老母少年e5時，佇敬虔總是冷酷無情e5莊腳所在牧會e5悲劇。彼所在e5人，就是無愛接納由都市來e5少年牧師夫婦，雖然in盡力付出，甚至一再委屈自己，總是偏見與無信任e5氣氛親像利鋸，鋸傷ine5靈魂，兩人e5婚姻受創傷，囡仔e5心靈嘛承擔袂起。

佇此款e5傷害中長大e5囡仔，心內猶帶著對美e5事物e5欣慕，會當夢想野草莓開花e5所在，真是一e5奇蹟。芬妮與亞歷山大會當逃脫沉重﹑扭曲e5「主教公署」，轉去有色彩﹑有眠望﹑有笑聲﹑有希望e5「活人世界」，互觀看e5人，心頭嘛變輕鬆起來。雖然導演自己互憂鬱症包纏，常常失落生命意志，總是他互咱此e5觀看e5人，得到淡薄安慰與希望。

Elisabet甲我講，她嘛是出世佇真敬虔e5莊腳所在，所以她是真反對宗教e5。她看著真濟敬虔e5人，心肝礙闍闍，對無合佇ine5生活倫理e5人真殘忍，互她足受氣。敏感﹑體貼人擱真有正義感e5Elisabet，無法度接納即款e5宗教。我講，宗教e5面象誠闊，人會去追求一個超越世俗e5境界，會去追求心靈e5平安與一個外來e5氣力，來幫助咱面對世間e5怨恨﹑鬥爭﹑貪欲，以及真歹打破e5﹑不義e5結構。總是宗教猶是這個世間e5一部份，

人e5宗教行為有時是真正無愛心，顛倒是互別人受苦e5，是一個不幸e5事實。我猶是相信，有愛e5宗教心，會當成做對抗不義e5潮流e5大氣力，我e5使命就是去引導有宗教心e5人，去認識愛，去行公義，去體貼神e5心意，毋是用自己e5心意與倫理標準代替神。

    行出大教堂，擱再行過主教公署。透過鐵欄與神秘e5樹叢看過去，天藍kah親像是油畫內底e5天。總是空氣足冷，大厝宅猷是遐呢嚴肅，我佇冷冷e5氣氛中，稍可ka7-lun2-sun2起來。張文祺行過來，將狗仔抱佇手中，笑笑，講：「我用狗仔熨燒。」充滿活氣e5日常生活擱由阮四周圍向阮流來啦。

        ７．一台叫作「風颱」e5船

    晴美姊e5瑞典翁婿Percy Andersson是一位藝術家，拄好為著Uppsalae5一個社區完成一件裝置藝術作品，是一台叫作「風颱」e5船仔。張文祺夫婦﹑晴美夫婦與我做夥坐入去張家e5細台車，去看「風颱」。

    「風颱」是一台木造e5帆船，親像挪亞e5大船停佇小山崙仔頂，船碕一爿去，船身只有餘一半。駕駛艙內有會當駛e5舵輪，桅杆頂有一排彩色e5船旗，是Percy邀請社區e5囡仔作夥彩繪e5。

    我真欣賞這台船仔e5設計。晴美姊解釋Percye5構想互我聽：「這是希望囡仔會當盡量發揮ine5想像力，in所看著e5船已經沉一半，著去想像歸隻船是什麼款，想像風e5來向，想像安怎渡過危險。」

    我嘛發揮想像力，轉來厝內了，寫一首描寫Percye5作品e5詩：

風颱   

起風囉！

東北風掃過小船頭

雨水煞煞煞

若千萬支針

橫橫插入船旗

船khi5一旁

海湧兇煞煞灌落來

滿船e5水

想欲(beh)扈亦扈袂離

著掠著方向

耐心等待

慇慇勤勤操作

人生e5小帆船

風颱若過

猶有長長e5海路要行

一台號作「風颱」e5木船

裝設值Uppsala郊外

囡仔蹉跎(chhit4-tho5)e5沙崙仔頂

船邊

流浪天涯e5人徘徊

三十冬前政治e5風颱

將in掃來

自由開闊e5海面

冷風透

七彩e5船旗

佇風中抬頭

歡喜拍phok-a2

熱帶e5風颱

值萬里以外

將孤舟扶定

渡過風颱e5流浪者

彼此問講：今生今世

豈(kiam2)會擱駛入

故鄉e5風颱眼？

寫即首詩e5時是2001年六月，今張文祺擱衝轉去台灣e5風颱眼囉！他講真擔心台灣e5主體性會失落去，感覺一定愛替台灣做寡代誌，就是暫時無發揮e5空間嘛無要緊，與朋友作夥賣麵嘛好。他甲佇Uppsalae5菜園仔整理理e5，就轉去啊。他由台灣寫批來講：因為風颱，麵店淹水，連賣麵e5計劃攏無法度真順利進行。

新e5風颱擱再威脅台灣。我全心盼望：佇野草莓花e5芳味中所保存落來e5純真熱情，會當佇充滿風波e5台灣，帶來一點仔看會著藍天e5啟示。

王貞文2001/10/21