追尋天使

日光燦爛的下晡時，科隆（Cologne）大拜堂的兩座懸懸的尖塔佇金金的日光中，石仔所刻的十字花反射出日光，石頭仔若親像融佇日光內，變作溫暖的、流動的材質。

萊茵河的水氣親像霧，霧中有看見長長的青色鐵橋，兩台火車佇鐵橋頂sio-sut-loo7，一台向北，一台落南，in的輪仔用謹慎的速度運轉。佇車頭邊仔的海因里希寶廣場（Heinrich –Boell- Platz），少年人的直排輪鞋的輪仔顛倒是青狂勇敢。佇用紅磚仔角鋪的廣場，少年囝仔親像歸岫的蜂，用真緊的速度佇觀光客中間鑽來鑽去，好親像欲講：「這是阮的城市，阮的地盤！」

由此有紅磚仔砌的gim5-a2，會當通到河邊。我真愛坐佇遐，數念1985年過身去的海因里希寶（Heinrich Boell）先生，觀看他所愛寫的此個城市，與其中的人。

河邊的草仔樹木攏發甲真正青翠，樹仔跤有真濟人佇散步納涼。小漢囝仔chong5-lai5-chong5-kih，面互日光曝甲紅kong3-kong3，有囝仔食枝仔冰食甲真歡喜，有囝仔佇媽媽身驅邊吵欲吃餅，有互囝仔飢飽吵，吵到憂悶的大人的面，嘛有歡喜招呼囝仔做夥來飲食的媽媽的笑容。我看見一位老母擘餅的手。

佇海因里希寶的小說內面，時常出現擘餅的手。由戰場轉來的少年兵仔，身軀帶傷，心靈破碎，擘開好心的人互他的一塊粗phang2，用享受聖餐的敬虔態度，慢慢仔餔出生命的滋味；佇飢餓的日子，一位勞動的婦仁人用慷慨的手，將最後一塊phang2擘開，與喪鄉憂愁的人相與分享。

「聖經內底奈無一章特別來講起婦女的手？」寶先生的名著「小丑仔觀點」內面，彼位真有抗議精神的小丑仔安呢問。婦女的手，佇海因里希寶的筆下，好親像是困苦時代，上帝向人伸出的，愛疼的手：一雙互風霜浸透透的老太太的手，用油與酒溫溫柔柔清洗互暴力所傷害的，少年人的身驅；一雙互困苦的生活折磨的少年婦仁人的手，一日到晚無閒佇拼掃，與外在的eng-ia，與內在人性的污穢相對抗。婦女勞動的手，沉默的嘴，是寶先生的作品內底，光明與盼望的記號。我將in看作上帝國的兆頭。

海因里希寶，1917年出世佇科隆城南區。彼個城區，人用其中的禮拜堂的名，給它號作聖瑟夫林區（St. Severin），是一個謙卑、總有真有反抗精神的城區。遐有羅馬時代的舊墓，有小市民隘隘細細，總是清潔整齊的公寓。人由真遠就會當看見聖瑟夫林禮拜堂的尖塔幼秀的形影。

這只不過是一個平凡的都市一角落，總是寶先生一直用敬虔的，充滿情愛的筆來描寫他的故鄉，所以，我嘛會受感染，用慎重的心與敏感的耳目，行入烏石所砌的老城門，行過隘隘的巷仔，數念此位筆若刀，愛心若大海的作家。

海因里希寶佇第二次世界大戰的時做過六冬的大頭兵，其中大部份的時間攏是佇戰俘營。他寫in彼代的人的苦難，寫德國佇第二次世界大戰結束了心靈與道德的空虛，嘛寫佇苦悶與混亂的世代內面，親像小蕊光燈的人性之光。

五十年代，他有機會到波蘭參加一個文學會議。彼時，戰爭佇兩個國家中間所扯開的傷猶佇滴血，波蘭的作家將他當作是納粹暴政的代表者，用真鹹的話，責問他是唔是嘛是一個殺死無辜百姓的德國兵？寶先生彼時猶佇處理自己做一個無奈的大頭兵的過去，猶著活佇一個戰敗國的喪鄉與混亂的環境，他無疑悟(gi5-goo7)會拄到即款的質疑，會互人當作是一暴政的一份子。他只有用誠懇的態度，打拚尋一寡字句，來講出他面對受德國侵略的國家的心情，講出他自己受戰爭傷害的經驗。

一位波蘭的猶太人文學評論家Marcel Reich-Reinicki回憶彼擺的文學會議，講：雖然佇彼個時機，猶無任何對話的可能性，寶先生所講的，嘛毋是什麼偉大的話語，總是，他無半滴仔虛假的誠懇態度，互在場的人留落真深的印象。Marcel Reich-Reinicki後來離開互共產主義所控制的波蘭，流亡去到西德，他就想著彼位真誠懇的作家，去尋他幫忙。寶先生對喪鄉的同事一向真慷慨，而且攏是：「正手所做的好事，無互倒手知。」m7-bat向別人講起他所行的好事，他過身了，人才知他有幫助過足濟其他國家的流亡作家。Marcel Reich-Reinicki若是批判人，是足利足鹹，總是對寶先生的人格，他無一句壞話通講。

寶先生對統治者，對掌權的人來講，一直攏是一個威脅。七十年代，他曾互捷克的反抗文學的作家匿佇他的車內，幫助他出亡；他盡力保護受極權政府所壓迫的作家朋友；他拒絕交教會稅互有錢的德國天主教會，講欲將此筆錢直接轉互南美洲受軍事政權壓迫的散赤人教會。八十年代，他拖著互病痛折磨的身軀，與他的太太牽手行佇反戰與反對核子武器的示威隊伍中，成做一個知識份子道德心的象徵。

保守派對他的攻擊m7-bat停過， in講，他寫的社會寫實的作品，雖然大家愛讀，總是無諾貝爾文學獎受獎者應該有的水準。In攻擊他，講他無愛國心。天主教會因為他拒絕交教會稅，驚他做歹模範，對他有真大的批判。他就與一群基督徒，無分天主教抑是新教，做夥辦「政治議題晚禱」。

他一世人所寫的，攏是他的故鄉，就是萊茵河下游的區域的風景與人，一世人，他用萊茵河區的腔口講話，他會通講是一位真有本土意識的作家。即款對自己的土地充滿批判的愛，遂感動真濟其他國家的人。他曾做過國際筆會的會長，真受愛戴。1972年，瑞典皇家學院將諾貝爾文學獎頒互他。得獎的作品是長篇小說「九點半的時撞球」，是一本穿越三代人的世界的史詩，結構複雜，人物特出，講起德國社會由威瑪共和，第三帝國到戰後的變遷。

「永遠的心，佇憐憫中猶原堅定。」此句德國詩人賀德林（Friedrich Hoelderlin）的詩，一再出現佇「九點半的時撞球」此本冊內底。冊內底的主要幾個人物，佇患難中保持憐憫的心，佇憐憫中抓著公義的原則，堅持無欲隨烏暗污穢的潮流來行，甘願為理想付出代價。通過此本冊，我忽然體會到，佇一個是非烏白顛倒，價值觀混亂衝突的世界，作上帝無瑕疵的子與查某子的意義。

海因里希寶會當一生堅持寫他故鄉的人與土地，總是充滿普世的關懷，他對人性深克的描寫，是有普世性的。他有真利的批判力與真誠的懷疑，總是他的信仰真深，信仰的根真chai7，實踐力真強。佇一個欠缺憐憫，甚至慈悲的心會受恥笑的時代，我發覺，佇憐憫中心堅定的彼位作家，已經過身beh二十冬lah。

王貞文2004/9/22