追尋天使

Photo by Judie35

看著”茄苳樹窠”的一篇文章"不准講「台灣國」的民主"，想欲用此篇來回應：

佇南神校園內唱中華民國國歌

透早就互奇怪的歌聲吵起來。

位我的窗仔口看出去，是台南神學院thong7-sui2的一個所在--舊的院長宿舍，拆了留一個紅磚仔砌的台仔，發草仔發ka真正美。

一位掛目鏡的ojisang坐佇遐，在唱中華民國的國歌：

”三民。主義。吾黨。所宗。”每兩個字就停一下，足像蔣介石的演講風格。

這位ojisang時常出現佇校園，有時行來行去碎碎唸，有時目睛闔闔坐踮遐，有時會忽然叫過路的人著”立正站好！”，向巴克禮牧師的銅像行禮。

今仔日早起，他是來唱中華民國的國歌。總是他唱昧全，後壁幾句攏是自己編的：”中華民國，千秋萬世。”

看著"茄苳樹窠"部落格在討論”不准講台灣國的民主”，互我想起早起時的此幕。

若是我欲較情緒化捉狂咧，我實在應該衝出去給ojisang講：”請m7-thang侮辱此塊民主的聖地！這是黃彰輝牧師與國民黨政府的爪耙仔與調察局的人對抗的所在！是無奉中華民國正朔的所在！是台灣國的精神發展的源頭地！”

總是我無做什麼。因為知影ojisang是病人，他無活佇會當溝通的時空。

當我寫即篇文章的時，ojisang佇雨中擱在喝聽昧明的口號。真有可能他是欲與凱達格蘭大道靜坐的人作夥唱歌喝口號。

是安怎ojisang一直攏愛佇此出入呢？他位什麼時陣精神的狀態變到安呢？我真好奇，總是無膽去與他對話。

m7知是m7是他佇威權的年代是負責監視台南神學院的人，日久生情，精神有異狀了後，猶舊將此個所在當做是心靈的故鄉？抑是他一直攏是安呢，將台南神學院看做是他著來攻佔的耶利哥城？

清早無成調的中華民國國歌，佇一個絕對昧奉中華民國正朔的所在來唱起，這是2006年九月的台灣，一個起肖的世代，一幕奇怪的情景。

就當做是政治carnaval的一部份：台北的群眾拒絕被稱作台灣國公民的時，做”台灣國”的夢欲六十冬的安靜的台南神學院，安寧，平靜，ku3-chai7一隻受傷的三腳馬（借鄭清文的小說所提供的線民形像），唱出他破破碎碎的中華民國夢。