追尋天使

1957年，是掙脫殖民地身份的希望與榮耀，將無相款的族群結連做夥。49年後，這份希望與榮光，看起來已經變成失去氣力的暗淡記號。在全球化的經濟體系浮沉的生理人，結合政治有力者的氣力，將首都裝飾起來，四界攏看會著國旗，七彩燈火將大樓與街路照甲光映映。

去吉隆坡參加一個研討會，負責來接我的是一位只會曉講英語的華人。他看著慶祝國慶的準備，滿面無歡喜，受氣，嘴內一直唸，政商勾結的政治現象互人會抓狂。政治無法度清明公平，只有看著大項的工程一項接一項，他講，這攏是垃圾錢糊出來的好看面，內面實在是爛糊糊啊！

車行過叫作『小印度』的城區，香料與香花的味隨鬧熱的音樂飄入來，是一條充滿活力的街仔。印度店面嘛有用幾字漢字寫店名，店員用台語講數字。榴槤當在大出，四界是賣榴槤的擔仔，頭毛包佇巾仔內的馬來太太嘛在揀榴槤，膚色真深的Tamil人舉刀破一粒榴槤，四界攏是笑聲。在遐，無相款的族群鬧鬧熱熱生活做陣。

論到佇此個國家求生存的法度，印度Tamil族的後裔溫溫吞吞講：『嘛是愛讓（niuN）in馬來族的人作頭，制度就是安呢嘛！只不過咱著堅持批判的能力，知影自己的氣力著用佇什麼所在。』

客家出身的老修女講：『只要大家平安過日，無互相挑戰，無暴亂就好，因為啊，若有種族衝突，親像阮即款人一定會尚悽慘。』基督徒，擱是華人血統，無論住在遐幾代，就是無法度得到親像馬來族伊斯蘭教徒的地位，出代誌in就是替罪羊。

        講「福建話」的馬來西亞華人，與台灣人佇語言上是會當溝通的，總是因為歷史經驗無相款，文化身份的認同真無相款。台灣人尚在盼望建立一個用台灣文化做主要的文化的國家，馬來西亞講「福建話」的台灣人，甘當會當去認同一個將不相款的語族統一做夥的「中華文化」。因為欲與馬來人、與印度人分割勢力，嘛為著無欲失去in自己特別的文化身份認同，in甘願受分配一個Chinese的身份，寫佇身份證頂面。

        我堅持我的台灣人身份，它m-na是一個地理名詞，它是我文化的身份認同。

用即個身份，我行佇吉隆坡，看身驅邊流動的多彩文化，看無相款的種族安怎互相吞忍來居起。因為我知我是台灣人，所以我會當安心欣賞逐款文化的對遇與變化。我無需要抓著無法度變化的老文化傳統，來證明自己屬佇某一個所在。

        獨立49年，願馬來西亞繼續成做無相款的種族與宗教會當和平居起的所在，嘛期待真正的自由與平安臨到。