追尋天使

一本小說辛辛苦苦印出來，m7知著安怎來宣傳，少年輩的朋友講：簡單！設chit8-e5　blog，透過部落客中間的串連來宣傳。若無blog，in就m7知會當安怎為我來推冊。

所以我就得到阿鯉e5幫助，佇網路頂，設一個自己的岫。

有人問我部落格的意思到底著安怎來講較好？網誌？罔記？他講：一個開放的私人空間？

一個開放的私人空間。真好的講法！阿鯉是將它比喻作客廳，人客歡喜就來坐。無法度時常見面的朋友，透過blog的寫作分享自己的心情，是私人的分享，m7-si7公共的論壇。總是因為是開放的空間，大家自由行踏，互相傳播，新的朋友與氣噗噗的冤仇人嘛也出現來看你所寫的。將自己的私人心靈空間公開化，是值得興奮的分享，同（kang5）時陣嘛是需要有較粗的神經線的冒險。

不過，成作部落客，該成就會有一個力佇遐在搡，逼人去創作與發表，經驗著人客禮貌的拜會了，就會感覺：m7-thang互即個客廳傷過安靜寂寞啊！第一步踏出去，就甘願來冒險。

阿鯉笑講，即馬換我骨力在寫blog，即馬我會當了解她逐日歙相，在blog發表有圖有文的觀察與日記的心情啦!

阿鯉發現部落格的世界已經冬外，她的部落真豐富，真趣味，由政治的關懷、人權論題到細細的草葉花蕊，小小的空間親像有無比的寬闊。

自從阿鯉開始她的blog，她的目睛愈來愈尖，生活中間細項代誌，變ka2真趣味：路邊的一欉樹，菜市仔邊人綁酒矸仔的方法，朋友佇路邊攤坐落來品味的一幕，隴通過相機的記錄與趣味的報導，成作佇她所架設的，茄苳樹頂的岫的話題。

自從開始寫blog，阿鯉的生活裡底開始有熱情，有盼望。無論是盼望會當捉著一滴清早的露水反射出日光奇妙的光，是認識一欉新的草，抑是佇對話中，發現一粒敏感充滿美感的心，為一場熱烈趣味的辯論、一句精采的話來笑。

我曾責備阿鯉沉迷佇部落客的身份，總是嘛是在享受她利利的眼光，與她用此個身份所結連的，友情與信息的網。阿鯉通過部落格，認識幾位新的朋友，蕃薯牽藤牽牽咧就有一綰心思感受攏較接近的人。漸漸，in無擱是一個假名，一個代號，in是活跳跳，受命運拘束的人：佇分享音樂的時透露貓仔過身的悲傷，佇貼出旅行的相片的時講出自己流浪的心情，佇辯論理念的時，顯出受傷的心的脆弱。

部落客是m7是一款將自己放逐的人？逃避人所規定的生產路線，只有欲佇自己公開的私密空間，享受創作的喜樂？

我想著我所意愛的流浪者Herman Hesse，當他年老的時，他蹛佇Tessin的內山莊舍，逐日出去，用水彩來繪此山內的景緻。他寫講：「佇此款黃昏的時刻，佇莊頭頂面的山坪暫時停落來、盡力繪圖的我，並m7是teh觀察別人的生命，嘛m7是在欣羨抑是在批判別人的生命的旁觀者。我愛我的遊戲，親像別人愛in的遊戲相款，是真貪心的，是帶著囝仔性的，是勇敢的。我用全精神投入我的娛樂。」

我所歡喜拜訪的部落格的部落客，看起來攏一點親像蹛佇Tessin時陣的Hermann Hesse。今我亦隨in來到我的山坪，成作部落客。