追尋天使

佇什麼所在會當真方便買到“天使”？

佇台南就是“新樓冊房”（青年路），”府城舊冊店”(前鋒路，台南後驛對面)，以及”貧乏物語”(育樂街179號)。

府城舊冊店是阮真愛去的所在。第一擺去就發現有真濟遠景出版社與前衛出版社的新冊，是新冊neh!一口氣就買千外箍的冊。因為阿鯉買一本紀念遠景出版社老闆沈登恩的冊，老闆看著真興奮，自我介紹他自己與遠景的淵源，掀出冊內他與沈登恩的合影，看會出他嘛是一個為著出版與推廣好冊打拚夠底的人。此擺復較深談，知影老闆的名是潘勝夫，出身烏牛瀾巴宰族，真正是一位為冊癡狂的人。

第二擺去府城舊冊店，看著有囥一隻紅色的膨椅，看起來真溫暖可愛，門口兩塊桌仔，用彩色的細塊瓷仔裝飾，擺一寡藝術作品。原來加一位共同的經營者，老闆的妹妹用二樓經營“天使書屋”，是一個藝術工作室。她泡真好飲的藥草茶互阮飲，鼓舞阮去樓頂看日頭落山。這位將後驛的舊冊店增加浪漫與舒適氣味的潘靜竹小姐，此擺我佇鹽份地帶文學營有相遇。是因為安呢，才會想著會當將“天使”囥來此賣。

“貧乏物語”：看店名就知是有社會主義精神的所在。一張足大張的革命英雄“Che”的海報貼佇門口。除了賣舊冊，chia嘛是越南青年學生聚集的所在，是會當學著越南文化的所在。老闆有收袂少珍本的日文冊，以及早期台灣的經濟研究等等。店內有真濟椅古頭仔(小板凳)通坐leh看冊。

猶舊有足濟間真有特色的舊冊店：有賣黑膠曲盤的“珍古書坊”，嘛是佇後驛，有成大大門口的“墨林”（in有台灣文藝與美麗島雜誌），有北門路巷仔內真清幽的“水祭草又”，每一擺去攏是一款享受。老牌的“金萬字”，有愛講話的大隻鸚哥。有閒來去台南舊冊店行行leh，會感受著與一般冊店真無相款的一點：用心經營的舊冊店，真正是充滿對冊的敬重與愛的所在。