南話樂園

Guan' hauxsenn i'kingf 6 kor gwe̍h, khaifsi' tsiaq hur-sidphín. Tsit'má ef pexbú long' khahr tshaufhuanf ū --e bô --e, so'í behr hōo tsia̍h --ex max air kingfkwer inf bú --ax ef kamrtīng.

阮後生已經6個月，開始食副食品。今嘛个父母攏卡操煩有个無个，所以卜食个，嘛愛經過姻老母个鑑定。

Infuix guan' bóo six thag kwerbin'-ha̍k tshut'sin, if jinxuix guan' tau ux kwerbín ef kifin, soo'í tsingx uxsin khaifsí, if tox tsid-tuaxtuif mi̍h kìm --leq mx tsia̍h, tigpiad six hai'sán, gufni kap' thooftāu. If kong' ux gian'kiù tsingrbinf uxsin ef sî tsiaq tsiahref mi̍h ef lauxbú, inf senn ef kiánn tix i'āu tsinf gauf in'huat' kwerbín ef tsingrthâu, tshinftshiunnx phīn-á tshngxtshńg, khi'-tshinrnah tsiahrê, siongx giamftiōng ef six hefku. Jixtshiann' ennf-á tshut'sì 6 kor gweq lāi, siongxhó six tshix bo'ling, koofput'tshiong tox hōo limf "tsui'kai'-tanrpe̍h" ef ennf-a' gufling, mx thangf limf it'puann --e.

因為阮某是讀過敏學出身，伊認為阮兜有過敏个基因，所以tsingx有身開始，伊tox一大堆物禁leq毋食，特別是海產，牛奶甲土豆。伊講有研究證明有身个時食tsiahr个物个老母，姻生个囝佇以後真爻引發過敏个症頭，親像鼻仔tshngxtshńg，khi'-tshinrnah這些，上嚴重个是哮龜。而且嬰仔出世6個月內，上好是飼母奶，姑不終tox互limf「水解蛋白」个嬰仔牛奶，毋通limf一般个。

Ux tsid tsām ennf-á ef uixtn̂g khahr bái, gua' khih' bwe' tsid tsiong' ux kaf lefbong'-sng ef ennf-a' gufling lamx hōo tsia̍h, bof hōo tsai. Langf kong' ah'nn̄g khahr ba̍t max ux phāng, hoox if huat'kak --tioq, taixtsì tuā --loox, hau' tsid mê hoox gua' khuànn. Āu --laix gua' khih' tshuex tsufliāu, ux kong' tioq ennf-á ef uixtn̂g iau' bwex huat'iog hó, lim --jibkhix ef mi̍h hunfkái i'āu wex siap' uir the'lāi, so'í max wex in'huat' kiftha ef so'tsāi khaifsi' kwerbín. Nax tsiaur an'ni, mx six uixtn̂g tuir "tuax hunftsú tanrpeqtsit" kwerbín --ex tsiahr air tsiaq "tsui'kai'-tanrpe̍h" ef ennf-a' gufling. Tongfjiân, bo'ling six tex it' hó --ex. Tanxsix tshixling ef lauxbú max air tsuri' limftsia̍h, air khiunnftshuì, bwex sai' tsiaq hê, tsîm, thooftāu ting'tíng.

有一暫嬰仔个胃腸卡bái，我去買一種有加檸檬酸个嬰仔牛奶濫互食，無互知。儂講鴨卵卡密嘛有縫，互伊發覺著，代誌大了，嚎一暝互我看。後來我去揣資料，有講著嬰仔个胃腸猶未發育好，lim入去个物分解以後，會滲uir體內，所以嘛會引發其它个所在開始過敏。若照安呢，毋是胃腸對「大分子蛋白質」過敏个纔愛食「水解蛋白」个嬰仔牛奶。當然，母奶是第一好个。但是飼奶个老母嘛愛注意limf食，愛khiunnf喙，袂使食蝦，蟹，土豆等等。

6 kor gwe̍h kaur 1 hwer lāi ef gin'-á six tsiaq bi'-a'-hu khahr hó, mx thangf tsiaq beq-af-hu. Tshixbinx siōng ux [雀巢] kap' [桂格] nngx tsióng. Tanxsix [雀巢] six tix [HeLongJiang, China] tsertsō, [桂格] six tix Taifuân tsertsō. Guán suan' [桂格], kef kuir 100 khoo. Infuix guan' bof siongfsinr [HeLongJiang, China] ef phin'kuán. Iufkif tsûn --nix (2005) ux tsui'guân ef urjiám.

六個月到一歲个囝仔是食米仔麩卡好，毋通食麥仔麩。市面上有「雀巢」甲「桂格」兩種。但是「雀巢」是佇「HeLongJiang, China」製造，「桂格」是佇台灣製造。阮選「桂格」，加貴100箍。因為阮無相信「HeLongJiang, China」个品管。尤其前年（2005）有水源个污染。
BBC：中國東北松花江水源污染