小迪小米生活雜誌

估唔到二少 - 小米咁..... 癡纏既.....

2006 年 2 月 4 日星期六晚, 迪米爸同小迪入浴室沖涼, 而迪米媽又係裏面, 霎時間剩番小米係廳度, 咁佢就係度 woo woo 喊, 又爪門, 又吠, 初時只係以為佢係諗住又剩番佢自己係屋企先吠同喊o者 !! 因為得佢 1 個係屋企, 佢真係會喊架.....

跟住 2 分鐘左右迪米媽出返廳, 但係小米依然係繼續 woo , 爪門, 喊... 仲要四圍走, 要搵返哥哥小迪, 當時迪米媽見到好好笑, 咁唯有就係安慰小米 : 哥哥沖涼咋, 沖完涼出返黎架喇... 但係小米仲係好似聽唔明咁, 望住迪米媽, 仲要加埋好慘, 好可憐既眼神, 最要命既就係佢真係成眶眼淚, 迪米媽仲望住佢眨下眨下眼, d 眼淚就係眼角度流出黎啦 ~.~"

過左冇幾耐, 小迪洗完白白豬, 小米見到就好開心喇, 即刻唔喊, 唔吠, 仲係咁癡住哥哥, 哥哥行去邊, 小米就跟住去邊, 但係小迪要吹毛毛, 而小米又癡住佢攪到吹唔到, 唯有將小米困籠一陣 (其實成個鐘架, 冇計啦, 迪米媽吹得慢嘛) , 係小米隔離同小迪吹毛毛, 比小米見到哥哥係佢視線範圍之內, 咁就唔再 we 嘩鬼叫喇 !!!!

而迪米爸同迪米媽都係到 2006 年 2 月 4 日先知道, 小米原來係咁跟小迪架....

之但係, 掉轉頭諗下, 究竟佢係以為小迪哥哥去左玩唔預佢, 定係真係咁癡哥哥呢? 真係要問過小米先知喇....

但係小米又會投訴架喎, 話說早幾晚, 小迪無啦啦衝埋小米度咬佢, 查實都唔係無啦啦既, 係小米企正係小迪面前擺尾, 而佢條尾成把扇咁, 咁咪 fing 到小迪個面囉, 跟住迪米爸就捉住小米, 迪米媽就幫佢抹尿 (無錯, 係抹尿, 佢比哥哥咬親都賴尿既 ~_~!! ), 迪米爸就問佢, 係咪曳曳撩哥哥呀? 點知小米就隨即 ng ng 聲, 係咁咿咿哦哦, 好似係度話 : 冇呀, 我冇曳呀, 係哥哥無啦啦走埋黎咬我咋 !! 迪米爸就話 : 係喇, 得喇, 冇曳喇 ! 呵呵 ~ 小米又隨即收聲, 唔再 ng 喇 !! 當時個情形真係好好笑, 迪米爸同迪米媽即刻對望一齊笑 !

小米真係大個仔喇, 已經學識左投訴喇.....