Digital Anthology☆正在經驗

響公共交通工具：

有人將隻腳放響對面坐位度，超級唔衛生；
條友體味勁膿，卻不聞其臭（可能佢覺得自己矜貴似鮑魚）；
扮有型鐘意落雨特登唔關窗亦唔俾你關窗o既懶文藝青年；
買o左好多菜好多肉好多魚帶番屋企，唔理人死活，由得o的水係咁fer出黎，o的膠袋又霸佔哂原本人o地用黎坐o既位；
架車明明爆滿，仍然一個人坐兩個位，懶理你死活；
唔管朿靚仔，係咁由佢o地跪凳坐，又踢到人o地o的衫褲鞋污糟哂；
唔帶「馬屎」，又唔用紙巾，係咁響你面前咳過不停；
好似呢個世界無紙巾呢樣野咁，係咁將條鼻渧彷如想將恆指由低位扯到高位咁「雪啊、雪啊、雪啊」，不斷透過人力用鼻孔同地心吸力格鬥，發出陣陣怪聲。可想像該條鼻渧應該經已在不少地方散播過細菌；
同上，又係視紙巾呢個偉大發明如無物，不斷咁將界乎於氣管與食道中間的痰不斷玩弄，但係又唔吐出黎；
將鼻屎呢種咁有益身心o既野當係股息咁，周圍發佈......


響超級市場：

好似想試o下我個屁股係唔係搵Nip Tuck整過咁，響我俾錢o既時候係咁用架車仔響後面推撞我，貼實我。我行一吋，佢進一吋；
私自拆開o的packing黎睇都不特止，仲要唔幫人回復原狀；
特登多手整爛人o地o的fragile食品，例如薯片、即食麵；
插枝筒入去飲哂人家o的益力多再放回原位......

響網上面：

抄人o的野，完全搬紙過字係最蠢o既；做番少少editing，例如改名，改地點都叫做醒小小；懶高明果o的雖然乜都改哂，但又唔知點解會成日鐘意去番案發現場睇野（係《異常快樂殺人心理》教o既，變態殺手最鐘意回到事發現場，回味殺人過程）。於是結果都係斷正；
總係有人鐘意提出一o的反到九反o既反調，話自己係理性分析；個個行埋黎同佢拆招都只係識話人o地訴諸感性，但係又無乜野有力o既實際figure/論點支持己見；
有人有妄想被迫害症，同你意見不合係因為我唔鐘意你個人。好似連你是圓是扁是靚仔是好睇都唔知，點可以無啦啦話鐘意你？唔好傻啦！
就算今次同人o地意見相同，亦唔代下次大家會有相同o既意見傢喎。就係因為同佢係好朋友我就一定要同佢同一鼻孔出氣？又係果句，唔好傻啦！


基本上呢o的野，我都係唔鐘意傢啦，能夠盡力改變，以令到其他人/事o既情況有所改善，我會做囉（e.g. 我真係會出聲叫人讓位傢），但係改變唔到我亦唔會覺得get hurt，或者訓唔到覺咁戇居（除非轉移目標真係轉頭黎搞我就例外）。所以打算令自己囉到最後個roundup位就叫做勝利果o的行徑，響我身上係唔work o既，可以慳番啦。