──改寫 石川欽一郎的囡仔古《熊佮豹》

◎有聲唸讀

古早古早，有一隻熊佮一隻豹，滯佇屬於原住民土地的山裡，怹是足好足好的朋友，定定做伙四界蹉跎。彼當陣的熊佮豹，佮咱今仔日的無相款，熊的毛完全是白色的，豹生做若像麥仔茶的色緻，而且攏無花點。

有一工載起，怹行到溪仔邊的山崁頂koân，遠遠siòng對下面去，看著溪埔有一個阿姨，ku佇大鼎下跤咧添火，若像當咧煮物件，火鬚嗶啵跳，怹想講：「你看，遐一定有好食物，咱若去遐，應該會受著款待吧！」「會使吧！安呢咱趕緊來去！」三步做兩步，怹走若飛咧，唯山崁衝落去煮食的阿姨遐。阿姨一看著怹chông過來，驚甲隨phiu一下無看人。

結果，熊佮豹將鼎仔內底芳貢貢的芋仔，掃甲空空空，開始坐咧遐罔開講，消磨時間。無意無意，熊突然發現家己的手，去kô著鼎仔外ue烏嚕嚕的煙塵（ian-thûn）。熊pún-chiâⁿ就足愛亂畫，即時雄雄去想著，伊講：「豹、豹！……我用鼎的煙塵踮你的跤脊腁畫圖好無？你斡對彼爿去，mái振動，我一定會共你畫甲足好看è！」豹講：「好啊！請裁你畫吧！」身軀隨斡過，坐咧，跤脊腁向熊。熊pîn-thàu用手指頭仔去kô鼎仔的煙塵，輕輕仔佇豹的跤脊腁佮跤手，畫甲遮一點、遐一點，逐位花貓貓。豹的花點就是安呢來的。

因為安呢，豹足歡喜，向熊說多謝，伊講：「即馬，我嘛欲佇你的白毛畫尪仔，換你歇一時仔，坐好mái動。」熊宛那斡過去，坐咧。豹共大鼎徙來伊身軀邊，仝款用手指頭仔揾煙塵，開始唯熊的跤脊腁畫啊畫，畫對跤手去。本來，豹就無像熊遐gâu畫遐的有的無的，所以擱較安怎畫就袂對擔。豹畫了擱hú，hú了擱畫，路尾，熊歸個跤脊腁攏變烏的。因為豹畫相久，熊煞tú龜，開始齁齁叫。豹歸身軀汗，畫甲足認真，但是烏去的所在攏拭袂起來，無法度，只好兩肢手ko·p 煙塵，共熊的跤脊腁抹甲烏烏烏。干旦存頷仔頸的部位，因為熊咧睏就準拄煞。自安呢，熊除了嚨喉的毛是白色的以外，歸身軀攏變烏的。

熊醒起來了後，看著家己全身變做烏的，驚一大下，非常非常受氣，自安呢佮豹絕交。雖然豹對不起熊，是無法度挽回的代誌。但是伊一直到旦猶後悔甲。所以每一擺若是豹有掠著啥物好料的，攏會踮土跤掘一空先tâi咧，予熊一chhiau就有通phián出來。這是因為豹欲向熊謝罪的緣故。 ...繼續閱讀

◎有聲唸讀

即張相片，是舊年《天下雜誌》做〈微笑台灣319鄉〉專題的時，介紹阮潮州彼頁所配的圖，而且，嘛有hông選起來做「微笑明信片」。

雜誌我無買，但是佇冊店徛有一下矣──非常特殊的感受：我佇台北東區，忠孝東路四段的金石堂，歸店面花哩落貓的冊，歸店面生份的人，我欲掀即本專輯，料想內面一定有一篇會寫潮州，我想欲看māi，「微笑」的潮州生做啥款，掀啊掀，結果，就看著即張相片。

啊，竟然……

竟然安怎？竟然，竟然有一種秘密去hông發現的意外。

潮州毋是一個觀光的小鎮，我佇遐生活十八年，我離開遐嘛已經欲十八年，因為伊完全會當活伊家己，毋免靠梳妝打扮討生活，伊是遐呢仔自然，自然甲，根本袂予人想講，伊需要啥物有代表性的Image，需要怎樣吸引人──伊就是伊。

知也即條巷仔的人，會使算是巷仔內的。 ...繼續閱讀

──亦賀！「綠的海平線」得第6屆 南方影展 最佳紀錄片獎

◎有聲唸讀

頂頂禮拜，佇阮社區我彼棟一樓，電梯門欲關矣，雄雄一個阿伯唯門縫擠入來。

電梯內底干旦我一個：又擱拄著矣！──歸身軀菸味的怪老子阿伯！

阮社區管理算袂bái，各樓層的公共空間講袂當囥鞋廚仔、袂當停跤踏車、袂當tún物件，告示貼出來，時間一到，管委會有影該拆的照拆，無咧予住戶假痟……足久無感受著「公權力」，令人不止仔爽快。

第一擺佮即個怪老子阿伯仝電梯，袂通風的空間內底攏是菸味。 ...繼續閱讀

◎有聲唸讀

從我有記持以來，唯鎮公所後壁欲thàng潮州國中的彼chūa路，會經過一片空地，大人攏共遐叫做蔗埕。

聽講，永過仔潮州國中彼歸phiàn，攏是墓仔埔──所以，啥物粉筆會飛啦、掃手會家己掃地、科學館的地下室有人唱歌……有的無的，傳甲若真的。毋拘，我連國校就猶未入學，「臭國中」的鬼離相遠矣，háⁿ我袂著。（註：「臭國中」佮華語「潮國中」倚音）

彼個年紀，我上ke是行路行到蔗埕。毋知唯當時開始，遐有人用竹管仔搭寮仔，開始賣thian-put-lah、賣菜粿，菜粿嘛有人叫做阿婆粿，平底的鼎一熱，有牽蕃薯粉的米漿lâm落去（蕃薯粉的量無像煎蚵仔煎hiáng濟），白米漿煎猶袂赤進前，就愛iā豆菜佮一寡青菜落去，下晡時仔做點心食，足讚。

我以為，蔗埕就是有人削甘蔗咧賣的所在，因為路邊彼幾叢粿葉樹下面，正經有一擔專門咧削甘蔗啊……後來，聽大人講正知，蔗埕彼跡，是較早人咧交甘蔗的：妳無看，土跤擱有鐵枝路，永過糖廠的火車會駛唯遮過。

hiàu，擱有影，路中央一chūa鐵枝路畫坦橫，毋知伊按佗thàng來，欲thàng對佗去，我足希望有一工會使親目睭看著五分仔車駛入來鎮內，經過蔗埕，予我坐蹉跎。

蔗埕的彼chūa鐵枝路，佇我猶是細漢囡仔的心內所引起的殷望，毋若是安呢nīa。 ...繼續閱讀

◎有聲唸讀

落南的車班唯竹田車站起行，khok-lok、khok-lok，檳榔樹漸漸退後去，無偌久，正手爿的窗仔外，一塊藍色的大塊牌仔寫白字，雙跤徛直thuh佇護岸邊：「主要河川 東港溪」，若無特別注意，咻一下就過去。

lòng-lòng-lòng-lòng、lòng-lòng-lòng-lòng，過橋──橋過，潮州到矣，好通準備欲落車。

黃克林的「倒退嚕」當流行的時，tīaⁿ會聽著朋友結詼諧，用hiâu-teh-teh的聲音學琴仔彼聲「過橋〜喔！」……拄解嚴彼幾年的抗爭場合，聽講逐家誠愛喊「國民黨！過橋！國民黨！過橋！」

毋知也為啥物，欲落地府進前太就愛有一板奈何橋，陰間陽世，為怎樣是用一條河為界？

真拄好，逐擺，我遙遠的歸鄉路，到上尾仔嘛是「過橋→轉茨」。過長長的高屏大橋，高屏溪，曠闊的沙埔地續接甘蔗園、芎蕉園，屯koân的鐵枝路現變做一條jiak-kuh，柴油車頭快速飛奔，直直向南thoah開、thoah開，風衣、外套、siak-chuh、內ka仔，一領一領tàn還他鄉；擱過潮州大橋，東港溪，燒熱的母土是愛褪腹澈，毋若，是愛脫光光去攬去chim的！──有溪、有橋、有最後的去向，一遭忝甲無話講的路途，煞也蘊含一份儀式性的意味。 ...繼續閱讀

◎有聲唸讀

第一擺聽著人講「梅仔」（bôe-á）、「梅仔」，雄雄以為是「襪仔」……「襪仔」足好食！那會安呢？

he是我已經來淡水讀冊，佇社團，聽著茨滯南投的社友講的，講，怹遐的山裡介濟人種「bôe-á」。

從細漢，阮攏是講「mûi-á」、「mûi-á」。可能是天氣相過燒熱，佇屏東，從來毋bat看過一叢真正的梅仔樹。做囡仔的時，我有一站足興食鹹梅仔，落袋仔若有一箍銀，就會走去店仔買。店仔的糖仔餅仔攏té佇玻璃罐仔內底，一罐一罐排歸排，看著足好食款，其中一定有一罐紅梅仔、一罐烏梅仔、一罐白梅仔。 ...繼續閱讀

◎有聲唸讀

「足久足久以前，漢人旦仔來開墾的時，遮原來就有滯一個『番王』，因為遮攏無其他的人，附近所有的土地攏是伊的。清朝時代，介濟人提銀兩來共伊買土地，無偌久以後，伊積甲歸厝間的銀兩，煞毋知欲安怎用，不時用一大堆銀兩，換換一寡無值錢的物件，逐家攏笑伊憨，尻川後攏叫伊『憨番』。

就因為『憨番』對銀兩無啥物概念，那來那濟人對伊的財產想孔想縫。佇怹兜做工的工人共騙講，銀兩囥久無曝會生菇，教伊固定一段時間就愛曝銀兩，而且逐擺曝攏會kiu一寡仔無去，he是正常的，若無就表示無曝好，擱舉sīⁿ 醃瓜仔的例予看。『番王』掠準是真的，就吩咐工人好好仔曝銀兩，工人也煞借即個機會，偷撥一寡仔轉去厝，擱袂輸偌有才調lè te共『番王』展，講真正共銀兩曝甲較kiu水去。 ...繼續閱讀

◎有聲唸讀

中秋前後，該是柚仔佮紅柿大出的時，今年，鼻頭崙頂的果子仔，袂意挽，就予膨鼠拂拂去。歸排柚仔樹，套的紙袋仔猶kat佇樹le ，suah拆甲存無幾個完整的。

幸福的膨鼠，咧拆紙袋仔的時，一定像咱細漢去「托」糖仔遐快樂吧……（柚仔屁是足臭è喔~~）

膨鼠，到底欲掠毋掠？若正經欲掠，安怎tng較好？ ...繼續閱讀

◎有聲唸讀

◎2006/10/21 (六) pm19:00-20:00 台北故事茶坊 秋季 海島微風 台灣原創音樂季

向朋友講起，即禮拜六暗我佇「台北故事館」有演出──茨內猶兩個囡仔未離跤手的伊，一聽著「故事館」，歡喜一下，以為是彼種會當將囡仔tàn入去聽故事，大人就會使閃邊仔去涼仙的好所在，對囡仔佮大人來講，攏是快樂天堂啊……

即個年齡，「已婚區」佮「不婚區」的代表，雙方對一個名詞的認定竟然一丈差九尺！我抑以為朋友會講：「是像『台灣故事館』彼種古早氣味的所在嗎？……」完全無想著，「故事館」三字，對囝兒擱細漢的父母來講，所需要的就是遐呢直接。 ...繼續閱讀

◎有聲唸讀

落去台南，無揣朋友，無借機車。乖乖仔騎共飯店借的鐵馬──籃仔頭前貼一塊四四角角的a-khu-lih，某某大飯店，mak-khuh佮名號看現現，可能是驚車去hông偷牽去，嘛可能是驚人毋知也我是觀光客。

青春不再，腳袂止力，無勇氣遠征安平港，自動放棄後驛的大學區，即chūa台南之旅，老市區幾條街仔罔踅就該滿足矣。雖然是安呢想，腳踏車正經共lap落去，正知逍遙宛那是愛付出代價……嘿咻！嘿咻！一方面是鐵鍊油沾無夠的款，一方面是台南市區的路，其實是略仔有koân kē的──著啊，鯤鯓，古早古早的大隻魚，佇伊跤脊胼騎腳踏車，出一寡力嘛應該吧。

佮台南市並無講介熟似，佇我的分類檔案內底，算是一個干旦「搵」過、毋bat「浸」過的城市，一直攏是安呢，知也伊的氣味、對伊印象真好，但總是一個「搵豆油」的外人。 ...繼續閱讀