──哀泣，足無尊嚴的阿緱城朝陽門

◎圖片來源 阿猴新聞網記者 王榮岸


今仔日，影著聯合報這篇〈找出特色 許屏市鮮明未來〉，一時來想起舊年熱天踅屏東市的感覺，心肝內一直想著阿緱城門。

「城門城門雞卵糕，三十六支刀......」翻做台語唸著有順閣會押韻。城門城門，台北市的北門、景福門、小南門；台南市的大東門、大南門、小西門；舊年上紅的「海角七號」恆春西門──遮个城門，大部分攏徛佇車河中央，家己鎮守一塊孤島：欲講伊無伴，四箍lê仔逐日是車輛來來去去；欲講伊有伴，論真閣有影罕兮有人食飽閒閒去共行踏。

屏東市的阿緱城門佇佗位？

感謝歌友Amo遐呢慷慨，共家己加出來的一套《臺灣音樂百科辭書》送我。

昨昏，冷霜霜的後母面，19度、烏陰天，佮Amo約佇竹圍仔「面交」。載起送稿去關渡，就順煞按自強路、「新天母」彼箍笠仔lu 落來，規山坪樓仔厝密密密，落崎就是竹圍仔。

老歌「淡水暮色」，歌詞一句「埔頂燈光真希微」，這位「埔頂」，是咧講淡江中學彼跡，其實，淡水鎮猶有另外一个「埔頂」，就是自強路這帶──足濟年前有一回佇路裡，無意中目尾去影著，一台機車後輦的「土tsa̍h仔」，面頂除了機車行的店名以外，閣特別加細細字仔註明「埔頂 自強路」──咦？！原來「埔頂」毋是干礁有「真理街」爾矣。

埔頂自強路，會當算是淡水鎮上南爿的一條長街，佮伊相交接的「學園路」（台北藝術大學校外彼條）已經屬台北市北投區，算關渡的額。毋拘，伊真pih-suh，攏「守」佇埔頂咧「自強」。咱一般人按台北彼方向開車、騎車來到關渡大橋頭，nǹg過橋頭的涵空，路斡一大彎，若像大門一爿慢慢仔搡開，遠遠的淡水河口忽然出現，共人siânn一下、洗一下目睭，隨就進入「竹圍仔」民權路，車輛、店面，e-e-kheh-kheh，鬧熱的「淡水」，按遮開始起鼓。

今仔，新專輯第一擺錄唱歌的部份，錄音室佇板橋。我像一个庄跤人入縣城，遠遠一tsuā路，對淡水坐捷運到板橋。

出板橋站，順縣民大道慢慢仔行，十幾度的寒流天，冷風一港一港khau過來，一爿是車輛咻咻叫的大路，一爿是樹仔無幾欉的縣民廣場，攏無通tsà風，無通匿寒。

行到縣民大道、新站路口，徛佇遐等青紅燈的時，一揭頭，正手爿對面幾仔棟當咧起的大樓──照講，淡水嘛有袂少懸樓仔，實在無啥物值得大驚小怪，毋拘，可能是一種類似看著「傳說中的地王」的心情吧！板橋新站對面、台北縣政府邊仔，若台北市的信義計畫區仝款，遮是台北縣的「新板特區」，框金閣包銀呀。

一二十樓頂，吊車的手骨tshun對半空中，攑有夠懸，好親像科幻片的情景。我青燈過一半，誠躊躇，想想兮也是閣斡轉去，徛佇路口共簿仔提出來，將彼个畫面草草畫落來。

我想著頂日仔去朋友的畫室，窗仔拍開，下爿就是信義路，捷運新莊線當咧施工，唯十樓看落去，地面上過路人看袂著的，圍籬仔內的工地，等於是一幅長長長長的精采的畫卷。朋友講，伊畫室的囡仔逐家攏足愛看兮，看工人做工，看thoo-la-kuh車土，大人感覺無啥物好看兮，怹逐擺攏趴佇窗仔邊看甲足趣味足歡喜。

今仔日會特別停落來畫圖，有一半仔是心肝內的囡仔性giáunn起來──想著家己，細漢嘛是足愛看人起茨，有時囡仔伴相招「行，咱來看人KISS！」，彼个販茨一疊起的時代，看人起茨，看有石仔通khioh無，四界收集石仔，足興也。

猴囡仔，毋知對佗學來的台語腔英語「KISS」（khi-suh），聽起來佮「起茨」的音欲仝仔欲仝，莫名其妙變作流行，調故意「起茨」講做「KISS」，「KISS」講做「起茨」，無聊的發明，三八囡仔也講甲歡喜甲，毋捌代誌無禁無忌──「啊、啊，開始矣、開始矣，怹兩个欲『起茨』矣！......」

山產海產名產 有鮮上介讚〜
國產黨產校產 無討錢消瘦！

催討 真理大學前校長宿舍
收復埔頂「小白宮」Orz

講來這是茨邊兜的家內事，佮我實在無治代。

我蹛佇真理大學附近，行一塊仔路就到淡江中學，閣隔壁就是真理大學。安呢講，外埠頭的朋友一定sa無。各位敢有看過周董的的電影「袂當講的秘密」？......葉湘倫去佮意著路小雨，怹學校校門口彼tsuā路就是真理街，校門出來正斡行無幾步路，倒手爿，就是真理大學前校長宿舍，真理街1巷1號，嘛是叫「小白宮」的深幽大別莊，咱過路人干旦看會著車庫氣派的紅色大門。

前校長嘛姓葉，毋拘，毋是葉湘倫的爸爸。葉校長自1971年做校長到今年才落台，任期比蔣介石做總統猶閣較長。我佇美麗的校園散步的時攏會安呢想：奇怪，這間學校上有條件、上應該有學運啊，那會學生攏hiah乖？！咱長老教會上關心台灣主權、對民主運動上熱，那會家己經營的學校遐呢無活力？！......行過牛津學堂頭前的水池仔邊、楓仔樹跤，或者是坐大禮拜堂的柱仔跤看粉鳥仔，敢從來無學生抑老師心內有安呢的疑問？！

這是一間毋知khā著啥物魔咒猶未破解的校園，我是外人，了解有限。最近聽講落台的葉校長猶毋肯搬出宿舍──彼也莫怪，假使我有遐呢媠的別莊通蹛，我嘛無想欲搬，遐呢四是的所在蹛三十幾冬，煞無通留落來養老，想著一定誠憂悶。這个「苦杯」呀，願主旨意得成。

俗語講：「乞食趕廟公」，旦廟公已經毋是廟公矣，煞顛倒歹趕？一九七○年代的紅毛城，嘛類似這个情形。英國人共紅毛城交予美國人「託管」，實際上，佇不平等條約廢除了後，英國人佮美國人根本攏已經無權利矣，咱政府佮老百姓嘛是閣驚驚，毋敢真正出手。有的代誌是真正愛驚：驚死、驚無頭路、驚無飯通食；毋拘，有的代誌是的確毋免驚，像催討宿舍這款例，就若茨主請茨跤搬茨仝款，茨主是「主」呢！

 (圖片提供 真理人)

◎相關連結 馬偕博士的故居和校長的小白宮

難得有一齣台灣人拍的電影，予咱正經會當符合工商服務定咧用的廣告詞：「樓頂招樓跤，阿母招阿爸」，後壁閣挺好加一句「乖孫招阿媽」，來去看電影！--這毋是干旦押韻鬥句咧趣味，嘛無歕雞規膨風的嫌疑，是真的。

是真的，真正就是有遐濟人，毋知偌久毋捌佮人排列相kheh，買一張電影票，專工踏入電影戲園，來去坐咧暗挲挲的觀眾席，佮歸茨間無相捌的父老兄弟姐妹，看仝一齣戀愛古，仝齊笑出聲，仝齊tsat鼻、流目油。「你有去看『海角七號』無？...」「你看『海角七號』也袂？...」變成過去這幾個月，全台灣上介「烘」的招呼語。

佇濟濟人心目中，若「天邊海角」遐呢遙遠的恆春，這十外冬來，那來那發展。古早人講，「人跤底有肥」--濟人行踏的所在，上無嘛較食市，較有機會、有底趁，較袂予餓著；是講，「肥」是好物無錯，毋拘，若有一日仔，屎屎尿尿過頭濟，無了時，煞變「人跤底臭齁齁」，強欲袂喘氣得。天然的美景，花貓貓的人工開發，閣安呢毀落去，台灣啊，較濟祖公仔屎嘛無夠開。歹勢，遮講的「屎」佮「肥」，攏是先民發明的比喻，毋是我調故意無衛生。

活佇愈來愈奧吸著新鮮空氣的時代，好佳哉咱猶有毋驚puá、puá毋驚的藝術家（puá=跋倒的「跋」=搏儌的「搏」），為咱這塊鼻屎粒仔大的海島，創造有血有目屎的故事（liâm-līn koh兩phû屎...）。想袂到，這130分鐘的故事，煞若發粉的效果，共恆春歸大碗變發粿：佮電影有關係的所在、佇電影內底有出現過的產品，攏做一下發。

國境之南的小鎮，山嘛是安呢，海嘛是安呢，佮「海角七號」猶袂搬進前，抑無加一塊肉，抑無減一塊肉。這馬，「海角七號」袂輸一頂超級的大「夢罩」。（「蠓罩」，若無蠓罩，蠓仔oonn-oonn叫咧空襲的時，是會去予釘甲走無路）「海角七號」這頂大「夢罩」，半爿天搭一條七彩的khîng，土跤釘一欉紅紅的野玫瑰，落山風袂當開相強速。有人誠實包袱仔款咧，一tsuā路thuh到墾丁揣夢；有人閣有影寫批寄去「恆春郡 海角七番地」的住址，註明「小島友子 收」，予恆春郵局足傷腦筋。

台灣話一句講：「做戲空，看戲憨」--套佇「海角七號」這支片共看，敢有合su？

有才調huānn頭做戲的導演，是頭腦非常優秀的巧人；有才情拍出好電影，一定是巧了相超過、拍拼甲偎盡磅的結果。安呢的人，佇猶袂成功進前，定hông看做空的、痟的。「做戲空」，按這「角」共看，宛那講會通。啊「看戲憨」咧？......「看戲憨，好利用」，tng-tang全台灣攏咧拼觀光、「文化創意產業」喝甲足甕聲的時，若是到恆春，無論啥時陣，陳達的歌若唱起，雄雄也叫是「思啊......商啊機......」



（予《台灣教會公報社》的稿）