二月底填的詞，一直猶未將背後的想法記落來。
對我來講，填詞完全是一種練習，就若像做囡仔讀冊咧做數學題目仝款，會使享受激頭腦的挑戰佮趣味。在即重意義上，伊是「習作」，毋是「創作」，人大漢矣就是有即個好處，頂頭無一個修理報告佮改考試單仔的老師，只要無惜面皮，安怎tshàng鬚攏無要。
今年過年，是我離開故鄉遮濟年以來，轉去滯上久的一擺，足足個半月的時間，載起睏醒開電腦開始寫稿，下晡騎oo-too-bái出去跎，盈暗陪阿母，幫伊關廟門。連家己嘛意外，竟然「黏」會tiâu呢！……我的意思是，哪，像阮即款佇台北蹓遮久的人，佮故鄉的關係（其實，感覺干若是佮「後頭」的關係，但是，明明就猶未嫁咧……）變甲袂輸是「魔鬼粘」安呢，轉去彼片土地，黏幾工矣，「唰！」一聲拆開，回返原來若干碌叩叩踅的生活，無時間黏thi-thi——當然，在有的人的心肝內，回鄉無定猶是「沙隆巴斯」或者是「三陽辣椒膏」，搭著毋知是毋是有療效，但是咧拆的時皮是一定會痛的……
...繼續閱讀
