幾仔工無出門，按算去補一罐枇杷膏。

Êng時八點外，風有夠透，無戴帽仔，頭殼吹著略仔袂堪得。本來想欲當做食飽散步，看、抑是緊去緊來轉較條直。

頭前一間文具行，遠遠一看，就知生理誠好，門跤口，人客的oo-to-bái鎮幾仔台，即個時段，大概攏是家長tshuā囡仔出來買物件。我是過路人niā-niā，毋拘，suah看頭家人無佇內底無閒，徛佇店門邊偎外口佮一個囡仔人咧蹉跎。 ...繼續閱讀

東北風一陣一陣，天頂的厚雲烏lu烏lu歸大phiàn，連日頭to kiu佇棉襀被內。

載起七八點仔過，學生囡仔攏tsiâu關入籠仔內，賣早頓的店仔開始略仔清閒，趕上課、趕上班的氣氛一散去，「載起」若親像嘛做一下結束，攏袂拖棚，隨人各行各業士農工商，無人佇街仔路賴賴sô。

我一個人行佇路裡，淡薄仔有成是彼款好命的家庭主婦：先生收入穩定、翁仔某重視教育、囡仔自細漢家己tshuā、我拄共送到校門口、那散步那培養阮的「親子關係」、即馬一個人欲來轉去、那用行的那減肥、我有可能是學校的故事媽媽、雞婆熱心閣厚意見的家長……實在毋是食飽愛想想遮個有空無榫的，抑無，即個時間無咧上班，即個年歲雙手lang-lang，戲無安呢搬是欲安怎辦？ ...繼續閱讀

去看「四月望雨」音樂劇加演場，台北，大樓頂仔報時佮報溫度的看板，數字顯示21度。

有夠好聽、好看的劇，逐條歌的詞佮曲攏suí--kah8……

轉來淡水，尾班車猶未發，拜六êng，蹉跎了無夠氣的暗光鳥特別濟。佮黃小傲約好欲錄Demo，朋友的紀錄片趕欲用──拄食過一頓phōng-phài的tsheng-tshau，隨就閣愛準備家己的手路菜，菜色佮煮食工夫差人hiah濟，哎！一枝草一點露呀！ ...繼續閱讀

佮朋友約食飯，向伊借DVD、借冊。大路邊的巷仔口，三角窗的餐廳拜一無開，亭仔跤暗挲挲，對面另外一間西餐廳光hiánn-hiànn，就去彼間食吧！──落崎的點仔膠路，車一台比一台縱較雄，擋仔lap心酸的，無啥效……逐擺沿即tsūa路路邊行，攏有一種「欲死煞無介快」的感覺，這實在是咧考驗行路人的技術，若無才調行一條直線，若神經無拄好行一下小括歪tshuah，後壁面的車，特別是歸隻縱落崎的公車，袂輸就會唯耳空後共歸粒頭殼削半爿去。

朋友猶未到，徛三角窗的亭仔跤等。才歇睏一日無做生理，店口土跤看著煞若幾仔工無拼掃，紙、罐仔、管仔，突然間，足向望會使徛佇一條么壽清氣的街仔路邊，煞想袂起來，頂一擺，佇佗享受過彼種「么壽」。雖然誠想欲改變家己一向的慣性：看有通養成較好過日的習慣無，凡事「khioh紅點」，毋通一四界都咧共人「khioh烏點」──毋拘，難啊，佇清幽美麗的古蹟園區散步，突然間，牆仔頂毋是一隻咧展輕功的貓行過來，是一罐飲無完的飲料罐仔tshāi佇遐，這閣好，suah手共提落來tàn就好；若是去到沙崙仔海邊，看著彼歸海沙埔有的無的pún-sò，一世人看khioh會了袂，真笑詼，心肝隨pèng爿超脫對宗教的意境去，「恆河沙數」的pún-sò啊，需要大慈大悲發願行願的「南無撿破爛菩薩」啊，抑無抑是欲嘴笑目平安喜樂，唱「耶和華祝福滿滿，親像海邊土沙……」

坐落來，點菜，服務生行轉去櫃檯。朋友講我拄tsiā khà電話予伊的時，伊拄仔佇怹社區的法會現場，即陣頭猶略仔會炫──頂禮拜，一個淡江的學生囡仔唯七樓跳落來，今仔日做頭七。 ...繼續閱讀

──月琴仙陳達，佮伊的歌

「牛尾絆」抑（啊）「牛母伴」

恆春民謠主要五種調：「思想起」、「四季春」、「五孔小調」、「平埔調」佮「牛尾絆」。即當中，「牛尾絆」的發展最特殊，伊是上古早的調，有排灣古調的風格；可能也因為排灣族婚禮有唱歌的風俗，伊變做恆春人嫁查某囝咧唱的歌；伊的名嘛猶無定論，有人講是「牛尾絆」、抑有人講是「牛母伴」。

親像朱丁順阿公，就一再強調愛叫「牛尾絆」才著，因為眾人即個唱兩句、彼個唱兩句，煞接對唱的形式，就若牛尾趕蠓仔安呢，絆來絆去絆無停。毋拘，嘛有在地人主張「牛母伴」較正確，大家偎來hām新娘仔對唱「牛母伴」，即個儀式號做「唱曲」，唱曲的場面，就若像一大陣牛陪伴一隻牛母。

嚮時農業社會，水牛犁田、赤牛運貨，先民的生活中，牛就若家己茨內人仝款，雖罔咧共趕的時會共tiap8，但平常時仔攏是惜命命咧共顧。清朝時代，來到恆春的廣西桂林人胡澂，就曾經將安呢的情景寫入《恆春竹枝詞》：「義塾番童四處收，蓬頭跣足語啁啾；也知三五團圞坐，放學歸來又牧牛。」即篇詞收佇《恆春縣誌》，誠無拄好，縣誌猶未依出版，就換日本人的朝代。 ...繼續閱讀

──響應【紙風車319鄉村兒童藝術工程】

◎屏東縣潮州鎮目前的捐款金額115,355元，猶需要234,645元就可以前往演出。

囡仔，即禮拜，雨落有夠大，電視新聞有咧報，因為林仔邊溪的溪水漲甲強欲淹過鐵枝路，火車落南干旦會當駛到咱潮州。

聽講雨一疊落，歸日攏無雨phāng仔，雷公的聲嗽嘛好驚人。你予雨關佇茨裡，應該像糖仔kâm佇嘴裡的暑假，tshun八月即細塊仔，煞現lak佇水裡iûnn去──無通出去蹉跎，作業寫了也袂？佇茨攏咧變啥蚊？顧電視，驚去hông扛去？耍電動，耍攏袂siān嗎？……

前幾工仔，「紙風車劇團」來淡水的鄧公國校演出，「紙風車」是台北一個搬「兒童劇」的劇團，就是有一綰愛做夢的大人，專門咧搬戲予囡仔人看。你一定毋捌看過即種足趣味的「囡仔戲」hoonnh？！無的確你較幸福，捌佇台北、高雄抑是屏東看過，但是一定毋捌佇咱潮州、佮你的好朋友做伙看。 ...繼續閱讀

──月琴仙陳達，佮伊的歌

日人時代 會社工

1945年台灣光復，陳達阿祖拄仔四十歲人，按伊一世人食七十六歲來算，「日本時代」佇伊的人生佔一半較ke。即塊專輯內底，會當反映伊的「日本經驗」的歌，就是第四條的《四季春》佮第五條的《五孔小調》。佇遮，《四季春》雖然有四葩歌詞，毋拘前兩tsat佮後兩tsat的內容欲仝仔欲仝，因為當年錄音的時，第一遍，陳達阿祖無滿意，要求閣重頭唱一擺。

「會社」即個詞，是日本統治台灣，佇台語所留落來的見證──戰後到旦，已經罕得聽著少年輩講「會社」，其實，「會社」就是現在所講的「公司」，是對日語的「株式會社」轉過來的。「彼陣欲做會社工」，意思就是彼當陣若去共「會社」做工，情形是如何如何……為著一日六角銀，逐家就安呢曝甲毋成人。即當中，第三tsat開始重覆的時，陳達阿祖將歌詞換唱做「日人咧做會社工」──咱毋捌半項，抑以為那會變做是「日本人咧做會社工」？！

讀做文言音的「日人」（jit-jîn），所指稱的，毋若是白話音「日本人」（jit-pún-lâng）的意思，台語「日人」兩字所代表的，是整個受日本統治的時代：「『日人』咧做會社工」，就是「『日本時代』咧做會社工」；「講著『日人』上苦情」，等於是「講著『日本時代』上介苦情」，並毋是「講著『日本人』上苦情」……阿祖怹彼輩的台語，攏是用「日人」、「日人時代」來表示即段過去。讀冊人較會用有立場的「日據時代」，解嚴以後則有強調中立性的「日治時代」，比較起來，「日人」、「日人時代」算是被統治者、講福佬話的台灣人本身，對家己被統治的時代、上介素樸的一種講法。 ...繼續閱讀

──月琴仙陳達，佮伊的歌

堅心旦來離恆春

北緯22度的恆春，歸年thàng天日頭赤厭，熱人來蹉跎就知，曝甲予你人肉鹹鹹免挲鹽，現變做人乾一條──「恆春」，名敢有號毋著去？！明明四季常夏啊……

到底是「春」是「夏」，可能愛對沈葆楨的「恆春印象」來講起。「恆春」即個名，是清朝的欽差大臣沈葆楨（1820-1879）號的，牡丹社事件發生，伊奉命過烏水溝來處理，1874年六月（同治13年），踮台南安平上岸，坐鎮府城hūann事。唯俗語一句講「六月火燒埔」就知，農曆六月的節氣，大暑到立秋，日頭炎炎炎，台灣島袂輸一條pū熟的番薯燙嘴箍。彼年熱天過、秋天過，天氣較涼冷矣，偎年跤兜，日本退兵，沈葆楨起駕到恆春巡察──屬熱帶氣候的台灣尾，十二月天時，若人火辣的姑娘仔亦有溫純的一面：雖然落山風做伊khau罔khau，寒天平均二十度的氣溫，予沈葆楨安呢自福建北仔來的人感覺起來，確實是春天仝款。

台灣自清朝收去（1683年，康熙22年），隔轉年起就有《渡台禁令》，一直到沈葆楨則廢止（1875年二月），政策轉向鼓勵移民，不而過，有心經營二十年，就過手予日本人矣。有字的歷史，總是佇偉大的帝國、驕傲的民族、才情的將相……咧踅圓箍仔；無字的歷史攏是佇箍仔外，腹肚袂堪得枵的草民，揣食、討食的「走路史」，全靠一支嘴，看是講古抑是唸歌仔傳落去──「思想起，祖先堅心過台灣，毋知台灣生做啥款？……」毋捌字的陳達阿祖，月琴一奏，先民渡海的辛酸苦楚唱袂了。是講，有唱著唐山公，煞攏無唱著伊的平埔媽，真可惜。 ...繼續閱讀

──月琴仙陳達，佮伊的歌

林仔佮腰仔相娶走

陳達阿祖到台北，佇錄音室裡開始唱伊的「思想起」，四葩唱了，煞落去，閤唱四葩「五孔小調」，兩個調講的是仝一個故事，叫做《林仔佮腰仔相娶走》，聽講是當年佇恆春逐家相知也的傳奇。「相娶走」即個詞，就是華語講的「私奔」，但是用台語的講法，完全無「私」的概念，是毋是私底下相娶走、是毋是私情違背公理相娶走，即個詞攏無加鹽加味素，明明白白一個動詞而已。除了「相娶走」，佮華語的「私奔」對應的另外一個台語詞，就是「tòe人走」。「tòe人走」佮「相娶走」講的是仝一件代誌，精差佇角度佮立場無仝吧，「相娶走」的詞義誠中立，並無啥物人tòe啥物人走，就是兩個人相意愛、相娶走……走去無人捌怹的外地，過怹的新生活。

其實，陳達阿祖嘛毋是咧講故事，毋是咧講林仔佮腰仔相娶走的經過安怎香豔大膽刺激 ，伊是將家己當做故事內底的男主角林仔，唱出林仔即個查埔人，頭殼lâm落去矣、感情潦落去矣、雙人前途無拼袂使矣──多情男兒的真心實意。根據佇錄音室外面的史惟亮觀察，陳達即條《林仔佮腰仔相娶走》是伊唱幾十年久的老歌矣，所以佇錄音進前咧練習的時唱的，佮入錄音室正式錄的差不多，陳達用伊上熟的彼套「程式」落去套。 ...繼續閱讀

──月琴仙陳達，佮伊的歌 1971年，陳達六十六歲，即年的九月，拄好農曆七月時仔過八月，陳達接受史惟亮教授（1925-1977）的邀請，專程一tsūa工奔波到台北，入錄音室，頭一擺將伊佇恆春一四界去唱的遐的歌，佇一個無日頭光、無落山風，雜音予四邊壁吸了了的室內，向一支孤單的mái-khuh唱出來──彼年的錄音所留落來的歌聲，就是你佇即塊片仔所聽著的。

彼個年代其實離無偌遠，但是好親像已經足歹去回想：he是屏鵝公路未意hùn闊，雙園大橋、高速公路攏猶毋知佇佗的時代，陳達揹伊的月琴，欲唯台灣尾坐車khok到台灣頭，老大人的精神佮體力愛誠有夠。「來去台北唱歌」，這對阮下港閣下港的庄跤人，是一層偌呢仔不得了的大代誌。

朱丁順阿公咱若是叫一聲「阿公」，伊的前輩陳達，當然是愛叫一聲「阿祖」。 ...繼續閱讀