──月琴仙陳達，佮伊的歌

合枝（kah-ki）的樹欉開花

現此時的恆春民謠，詞攏是用福佬話來唱，成做台灣福佬系民歌重要的一脈。實際上，恆春半島自早就是多族群地區，徛起上久、勢力上大的原住民斯卡羅族，是卑南族佮排灣族所融合；東海岸的阿美族、屏東平洋的平埔人道卡斯族，有一寡也落南遷徙到遮。唯明鄭時代到清朝建城，那來那濟漢人入墾，《恆春竹枝詞》有安呢的描寫：「漫說恆春太寂寥，城中街市兩三條，居民盡是他鄉客，一半漳泉一半潮」意思就是漳州府、泉州府來的人，佮廣東地區來的潮州人，佔恆春城人口一半一半。

歲月的thai仔thai呀thai，經過百偌冬的發展，恆春人的歌煞賰福佬話咧發聲──不而過，咱耳空開開共斟酌聽，遐个無話無句在人轉拗的曲調，半島其他族群的影跡，攏tsiâu化佇彼特殊的風味內底。

「柴城對東四重溪，生成地理足好勢......」陳達阿祖這兩句me-loo-tih，是咱真濟人攏聽過的「台東調」，伊講是「台東卑南八社番調」，伊的茨邊豬尾仔伯（吳知尾）講是「花蓮港加禮宛調」，無拘，滿州鄉的人卻認為是「平埔調」。誰講的較著？著毋著，歌猶原安呢照唱。豬尾仔伯向千里迢迢來錄音的許常惠紹介，這个調從怹較早做囡仔就聽人佇咧唱；若按1967年的時豬尾仔伯七十歲共算，「台東調」的流傳上無有百年以上。