日本時代的學者國分直一（1908-2006）佇〈淡水河的民船〉這篇調查報告內面有講起，淡水河頂一半擺仔看會著竹簰仔，攏是專門行內河的，用麻竹做的，闊度十九管，疊雙重，造型佮討海的簰仔頭尾翹翹無相仝。一般人the簰仔入淡水河，攏是欲phā網掠魚，無像台灣南部，過溪全靠竹簰仔the渡、載貨──佇淡水河，木造的船誠發達；佇下港的溪，煞無啥看兮船，來來去去攏是kò簰仔。（國分直一另外一篇《濱海的民俗與民船》其中一節〈南台灣的竹簰仔〉主要是紀錄討海的簰仔）

「簰仔」一直是我心內的「殘念」。

自從溫州餛飩重新裝潢了後，我交關過無幾遍，就足少閣去矣。今仔中晝去老街的郵局寄物件，想講久久矣一擺，入去共坐--一下，食一碗仔餛飩。

淡水老街的三角公園仔頭前，角間的溫州餛飩二樓，窗仔看出去，對面就是一欉龍柏樹佮馬偕博士的頭像。透中晝時仔，日頭光直直曝佇街仔路，才閣若金針金箭倒射過來，刺對目睭仁裡。

規條老街，無樹無蔭，欲偎街尾的三角公園仔遮，才有一欉龍柏，瘦lò瘦lò，徛佇馬偕博士的面頭前，規年通天佮伊相對看。咱台灣的「銅像文化」，是偉大的領袖tshuā頭開始流行的，過去全台灣各鄉鎮差不多攏有「蔣兮」咧「罰徛」（阮潮州三角公園仔彼仙，徛到今年才落台），雖然往事如煙，如今賰無幾仙，毋過，煞造成一个不良後果──現此時看著銅像，心內第一个意念煞毋是「紀念」，嘛毋是「藝術」，竟然是「罰」！......（「蔣兮矣，那會閣佇遮『罰徛』啦？」）

透中晝，看著馬偕博士的頭像頭殼額仔光光光，雄雄閣真正會去想著無好笑的耍笑：「馬偕牧師啊，那會佇遮hông罰『曝』？！」

少年的揣無頭路，中年人轉去歇假食家己，濟濟人飯碗雄雄無去──這个年誠歹過，佳哉消費券iā--落-來，一人三千六買東買西，無「敗家」就會敗市啊！（「市」破家何在？！）全民拼經濟，愛「買」才會贏，這毋是咧khau洗「馬」政府爾定，咱這个時代，咱這粒溫度愈來愈懸的水球仔，逐个已經強「買」起痟矣。

美國人買茨，無夠gâu的共銀行借無錢，專門咧借錢予這款買主的公司有夠gâu，閣共債權變做債券予投資人來買，有通趁一手就趁，管太衰著啥物人，買會起、買袂起？到底是買著啥物？......攏是「明天過後」的代誌。

貸款公司喝破產就破產，無一目睨，tshū，倒，崩，引起全球性的「金融海嘯」。報紙是安呢寫，電視是安呢報，太平洋這岸的蕃薯島民我，我頭殼內的語言，「錢」是佮「水」kap做伙的：往過仔的人講「台灣錢，淹跤目」；有時會聽著人講「做生理，『錢水』較活」；阮大姨的話閣較直，「錢是人的血水，咱人若無血水，就活袂落去......」

正月初八，出大日頭，年假結束的拜一載仔，各行各業攏tsiâu開工，隨人無閒tshih-tshih，干若豆仔園的白粉蝶，iā-iā飛無時停。

我佇永樂巷口落車，按算來市仔買幾項菜。傳統的菜市仔，阮這少年的，一年罕得踏入來幾逝，我較捷去頂好，進前看著頂好彼支「阿好嬸的大新婦」廣告，家己會愛笑。笑啥？確實，佮「阿好嬸的大新婦」應該算仝輩的我，阮這沿的，無幾个人有彼種美國時間一載起去菜市仔泅，已經攏慣習去「物件好提閣好揣，買菜緊閣舒適」的超級市場。

徛佇市仔口，我感覺我就像礁料開始欲泡水、欲發──礁料（ta-liāu）：香菇、干貝、魚脯仔、魷魚干、金針、木耳、筍干、高麗菜干、磅皮、栗子、蓮子、麵輦......若較高級的，tah，燕窩佮魚翅，嘛是「礁料」。前年煞無綴人日本咧流行啥物「干物女」？！hông認定是「干物女」的女性，攏干若一尾一尾nê佇竹篙、礁khok-khoh閣鹹剁剁的魚干，實際上，咱台灣的「干物」（礁料）南北貨是風味百百種啊！

「小姐，借問也，彼光明燈，若往生的，敢會使點？......」

「哎，啊妳問人小姐，人小姐太會捌，這个小姐是負責收錢的爾啦......」

問話的大姐，拜拜拜好行過來，我想伊是四年仔的，電大捲的的頭毛，肩胛頭長；烏色的目箍線畫甲誠明，尤其是下底彼sûn。熱心替我回答的oo-ba-sáng，是伊的茨邊。

「我是欲知也講，彼光明燈，若往生的人咱共點，敢有效？」

「唉，有效無效，啊道一个心意，妳問人小姐，人小姐者少年太會知？」

一目睨，已經是2008年年尾，想袂到，「花埕照日」這片園仔嘛種三冬久矣。三年前發新專輯，開這个blog做對外窗，自安呢寫啊寫到旦。這三年，因為花埕，熟似袂少好朋友，想著誠感心；家己寫台文的能力，嘛有較進步，毋拘，猶無夠積極。特別是今年，搭無幾篇文，若像放咧予發草仝款。

今年，我留介濟時間予家己，費介濟心神想想有的無的若痟也，嘛開介濟精神煮飯佮食飯，足滿足。煮食愛陣動著的頭腦，佮寫作寫歌完全無仝部位，一个姿勢睏相久，就愛píng爿才會舒服，我需要離開電腦，balance一下，無，是足濟下才有夠。我活佇家己的世界，若外星人偷看這粒地球。每一擺去家樂福，進入遐呢仔濟日用品、遐呢仔濟好食物的大賣場裡，每一擺攏也是會感覺不可思議，偉大的地球人啊，生產遮呢仔濟物件，銷袂去的是攏tàn對佗？...

一爿是遐呢仔濟哩哩硞硞的物仔，一爿是遐呢仔濟人無飯碗。我家己嘛危險危險。

目前，第二張專輯準備欲入錄音室，希望明年春天會當上市，開始走宣傳。我無家己寫新歌，是共無版權的老歌提來填新詞。講來毋驚見笑，我事實是文字人，音樂上猶愛精進，暫時就先交出這張成績單，後日仔第三張希望攏是家己的詞佮曲。

2008年賰無幾工，該感謝的人誠濟，佇遮先祝逐家新的一年平安順事──時機bái-bái，平安就好。

篇頭這張桃花，是機車之友恆春兮前幾工仔寄予我的，伊講伊頂日仔佮阮同鄉的上山，去霧台鄉的神山村食「神山愛玉」，食飽蹉跎看著這欉，花開甲誠媠，特別共翕落來。將近十年毋捌去霧台，攏毋知也這馬有這味「神山愛玉」。屏東山裡的桃花，嗯，我需要，我佮意。

這兩工共老朋友培慧解讀行政院版《農村再生條例》的文章翻做台語矣，猶剩幾个所在處理袂好勢，希望明仔後日會當定稿、完成錄音，當做是今年花埕收冬煞尾的一篇。

「『野草莓』台語欲安怎講？」

十一月初九暗，自由廣場靜坐的大學生，替怹的行動號名，喝出響亮的「野草莓學運」。

七年仔的少年家，怹出世佇台灣的時，戒嚴令的符仔已經欲搭袂牢矣，過海四十冬的殭屍，無入土嘛袂用得──天干若開始拍phù光，精神的人免閣再假睏，活人免閣tìnn啞狗、禁氣吞忍。一目睨，解嚴（1987）前後彼幾年出世的囡仔，已經徛出來矣，hông搭「草莓族」標籤的世代，台灣上少年的公民，祭出「戒嚴傳統，全新感受」的白聯，捍衛受thún-tá的人權。

「草莓」是溫帶地的作物，驚熱、驚風雨，紅紅媠媠好食款，khap袂著就khò傷。1934年，日本人佇草山試種草莓無成功；戰後，台北農改場閤引進，開始有小規模種作，加工做果醬。一直到1979年左右，苗栗的大湖試辦觀光草莓園，漸漸才較濟農友種，品種改良愈來愈大粒、愈甜。算來，台灣人有通將草莓做果子仔食蹉跎，是這二三十冬內的代誌，也莫怪，真罕得聽著人用台語講「草莓」。

攏是安呢，面對外來新事物，攏是先有一个華語的詞，才會去想著講「台語安怎講？」；攏是先有一項外來的物件，才翻頭去走揣「咱家己本來有啥？」

台語直接讀「野草莓」三字，是一个箍一輦才踅倒轉來的詞：伊愛借「草莓」的形象共人講，伊佮草莓生做足仝面，毋拘伊毋是草莓；伊愛用「野」來予別人理解，伊佮有人顧的、嬌té-teh的草莓性無siâng；伊想欲講出家己的名，可惜，予人聽著的是訊息niā-tiā，是伊佮「草莓」之間的定位參考值，並毋是伊本身。我徛伊隔壁，我佮伊無仝，但是，我是誰人？......