6/23(六)20:00 竹北【草葉集】，我的場，開始電話預約！

竹北是即幾年歸個發展起來的……佮中永和仝款，欲講是一個「城市」嗎？並毋是啊，但是伊嘛絕對毋是一個小鎮。

我袂曉開車，所以像竹北安呢，雖然宛那「縱貫線」排有著的，實在罕得有機會去到遐行踏。閣較安怎講，新竹抑是凡事攏佔贏──隔一條頭前溪的竹北，就像隔一條淡水河的台北縣，佮人台北市的好命底袂比得。 ...繼續閱讀

今年熱天，兩個營隊攏佇淡水：

◎七月初六至初八（拜六至禮拜 ），兩暝三工，第12屆世界台語文化營

◎八月初二至初五（拜四至禮拜 ），三暝四工，第3屆海翁台灣文學營

營隊地點攏是佇淡水的真理大學……

頂禮拜佇「有河book」的演出，唱了誠滿足，我想，我的歌就是適合安呢啊！所在毋免大，毋免有台仔，人佮人離介近，相kheh嘛無要緊，無啥物其他的攪吵，我毋免像自助餐的一項菜，排佇遐，隨在人愛食毋食來來去去；毋免像遠遠就鼻有的芳水，開放的大空間裡hìu無夠額，查某人的芳水啊，予人偎近則鼻有，有擱若無咧，敢無較好？

佇「有河book」唱歌，彼個空間，干若是佇家己茨裡的客廳；換到「小小書房」，哇，若像唯客廳搬入去細間房間……莫怪，需要事先預約訂位。（訂位請連遮）

「小小書房」佇台北縣永和市，是一間舊年七月則新開的冊店。 ...繼續閱讀

──5/5(六)pm7:30 淡水---有河book

這大概是自出專輯以來，唱歌的地點離淡水河上近的一擺……

「有河book」，音讀著若像「有何不可」，是淡水河邊開無偌久的一間冊店，你唯捷運站後壁的河岸向渡船口的方向散步，沿路的店仔注意共看，有一擔「印度Q餅」（招牌寫「喇度的印度廚房」），現場不時有人會表演特技，猶袂烘的餅仔皮一塊圓圓，軟膏囉sîo，Q塊塊，當做飛盤射出去隨踅轉來，一支指頭仔thuh咧、共接咧，腳手有夠súi氣，繼續踅，餅仔皮若變魔術的白布仔，把戲變煞則甘願落鼎，操了有夠的餅仔皮，食著則有夠Q吧？！
...繼續閱讀

導演：郭亮吟
發行 / 經銷：智慧藏學習科技
總長：60分鐘
2 聲道：閩南語、客家語
3 字幕：中文、英文、日文
定價：480元 | 特惠價：390 元

電話：+886-2-23936968 按0轉客服中心（拜一到拜五，9:30am～6:00pm）
傳真：+886-2-23936877（24點鐘服務）
電郵：Service@wordpedia.com
地址：台北市100南昌路二段81號8樓

1.線頂購買，請按此進入智慧藏官方網站。2007年3月上旬開始出貨。

2.另外有提供DVD∕MOD的公開播映授權方案（公播版），請與智慧藏行銷部接洽。

3.幕後花絮 特別收錄：2003年台灣高座會留日歡迎大會、2005年台灣高座會第18屆聯誼大會、 少年讀書信的錄音實況、 歌曲～離開故鄉。

「注意！……假使你遐呢驚摃著家己的指頭仔，安呢，你是欲安怎摃破羅斯福和邱吉爾的頭殼？！……」

紀錄片【綠的海平線～台灣少年工的故事】電視首播
頻道～公共電視 紀錄觀點（第13台）
時間～2月2日 暗時10點
重播～半暝仔1點（2月3日）

花埕舊文【回望 綠的海平線】
相關信息請點入「綠的海平線 部落格」

──2006年「花埕照日」選文唸讀

chang 暗地動的時，人拄好佇淡水北新路的「咖啡8」咧修稿，因為khà手機仔向恆春兮請教幾個讀音，正知震央佇恆春。屏東的家用電話攏袂通，921的感覺，像烏雲罩霧khàm落來。

冷氣團擱欲來，聽講今夜會降到九度。

頂禮拜六禮拜，淡水出兩工充足的大日頭，若早春氣息的冬天，河邊攏是出來過節的人，聖誕節、平安暝，今年我佗就無去，從載起佇STARBUCKS的河岸門市佔著一個窗仔邊的位，佮觀音山相對，開始將即一年來所寫的文字，一篇仔一篇豆豆仔si-a-geh。我毋是用筆記型電腦修改，是前幾日仔選好印出來訂做歸本，膠裝白色銅板紙的封面。

山光水影倒映唯目尾過來，我感覺家己若像佇一條金色的大河邊，提一個米笞仝款，那笞、那過lī，悠遠的手工業，文人，我想著「『字』笞目」即個詞，寫文字的人，心瓣膜好親像有肉眼所看袂著的一目一目，血液按遐出入，文字對遐的大細目斟酌笞出來。

真濟人問我，為啥物欲用台語寫作？──奇怪的問題，就佮你問一個日本人是安怎欲用日語寫作、一個英國人是安怎欲用英文寫作，仝款的意思。雖然，我認為家己毋是咧「寫作」，只是咧「寫話」，寫「想欲講的話」，我並無真正「作」出一個偌呢了不起的文學世界，只不過是較厚話。

真濟人嘛安呢問：台語毋是無字嗎？台語也有文學嗎？──台語有字無字，是一回事；我就是想欲安呢寫，是另外一回事。即幾工仔整理遮個文字，有一個感想，這那是「字」？這根本就是「譜」，雖然，是無通介精準的譜。 ...繼續閱讀

決定留佇樂多，因為版面看了較慣習。

感謝歌友捲毛仔魚幫我hip的像！這是陳達紀念音樂會（11/19台北紅樓）彼工會後，佮朱丁順阿伯開講的時hip ê。頂擺佇台南的國家文學館演出，就有拄著阿伯，伊知也我仝款屏東的、唱歌的，特別歡喜。佇紅樓即工，「好客樂隊」嘛有演出，我共阿伯報，講than-tu-á台仔頂摃鼓介厲害的彼個，彼個車城的哦！車城，是阿達佮小虎的爸爸的故鄉（歌廳大樂隊chhōa頭的呢！唯車城起來北投na-kha-sih拍拼的） 。我知也，王明哲嘛是車城人，奇怪，怹恆春半島的，那攏hiah有音樂細胞講…… ...繼續閱讀

台中的朋友，歡迎來面會！我有一點鐘的演出，八點以後換清原仙的場。

2006/12/1 (五) pm19:00-20:00 台中‧胡同飲集聚場│台中市精誠九街16巷3號│04-23198378

新曆十一月，像即幾工仔安呢，東北風唯北海岸khau過來，一陣過一陣，足猛。

佇來淡水以前，寒人從來毋bat吹過安呢的風。故鄉潮州佇屏東平洋的正中央，有三千偌公尺koân的大武山chá咧，逐年，東北風開始咧「khau 番薯」的時，即phiàn平洋根本無啥礙著，田裡tiām豆仔，蔗埕收甘蔗，田岸邊從來毋免種啥物「防風林」。

毋拘，平平攏是屏東縣，唯潮州欲到恆春猶有一tè-à咧。（差不多擱愛90公里！）

屏東平洋，袂輸一支跤的小腿，跤仔肚肉肥卒卒；來到恆春半島，已經若欲偎跤後teⁿ矣，跤骨其實無介大支。（阮屬幼骨的啦！）東北風吹來，kē山無檔頭，風咻一下翻過山隨跋落海，若雲霄飛車無咧檔車檔的。風颱的性是gīa一下就過，落山風是一jû jû幾仔個月，暗時窗仔門透暝khok-khok-khok，lòng甲天光；日時有旦仔強有旦仔弱，有旦仔雄雄一陣siàn過來，連人kòa機車chiâu摔對路邊to有。我若出世佇遐，命一定會像瓊麻hiah韌，上無嘛會像蔥頭，堪得囥久袂koa。

佇即個落山風的季節來紀念陳達，氣氛是上há的。是講，誠害，一想著彼個年代、即個季節的恆春半島，烘伯勞仔的氣味就家己走出來，無法度啊，彼當陣，唯楓港開始，公路邊就攏是鼻著人咧烘鳥仔巴……

【思想起遊唱詩人 陳達音樂會】

2006/11/19 (日) pm14：40 │紅樓劇場 台北市成都路10號 02-2311-9380 免費索票入場！！索票請洽 紅樓劇場，下晡兩點開放入場，坐滿為止。

由國立傳統藝術中心佮陳明章音樂工作室所策劃，邀請著國寶級的說唱藝人朱丁順先生，特別唯恆春網紗一chūa工奔波來台北，亦彈月琴亦唸歌，再現恆春民謠的風采。精采節目，包括有陳明章、胡德夫、許景淳、好客樂團的演出。

另外，現場會使買著即本猶燒燙燙、未上市先搶市的新冊：《恆春半島絕響：遊唱詩人──陳達生命之旅》，徐麗紗、林良哲撰稿，一本書加兩塊CD，一套正賣400，首版限量1000本！


...繼續閱讀