製作單位辛苦、辛苦！負責採訪的毓雯、huānn攝影機佮剪接的秉寰、出嘴出聲的土豆仁、「號外」寫甲予人足感心的東牧，以及我無相捌的其他工作人員──佇遮一併說多謝。
我佮大家仝款，攏是到收著「號外」的電子批才知，這集有上台語字幕，若像收著特別禮物，真歡喜，想袂到製作單位遮有心、遮進步。（噗仔聲閣開一罐〜〜）
製作單位第一擺拍台語字幕，難免有出tshê，熱心的網友已經斟酌鬥掠，我個人對影片內容，干礁有兩个所在需要提出來更正一下：
一位是我講的「落米仔」（lak-bí-á），字幕拍做「落尾仔」（lak-bué-á），意思佮音攏毋著去矣（客語的「尾」讀「miˊ」，音略仔偎）。「落尾仔」是假若吊車尾仝款、輸人忝忝綴人袂著，是「線型」的詞，但是「落米仔」是「粒」狀詞。
講「落米仔」無人捌，若講「米勒」的「拾穗」逐家一定攏知──「拾穗」就是法國人咧抾「落米仔」啦！台語的「白米」、「秫米」是正港的「米」；「番麥米」、「柚仔米」、「蝦米」、「茶米」，是取怹一粒一粒幼幼仔的外形，來鬥詞號名。
...繼續閱讀對這張圖有興趣的朋友，歡迎來
王昭華的淡水面會 3/14(六) pm19:00-21:00
有河book純開講+原圖展覽(當日下午開展)
半個月前，生祥講伊瓦窯坑的石頭茨欲退租矣，歸茨間的物件整理理兮，全部欲搬轉去美濃。佇瓦窯坑的練團室，猶有剩一疊當年的「戀亂淡水」，伊感覺應該愛留佇淡水予我。
想袂到，算算兮，猶有100張──這最後的100張啊，賣了就真正無矣，連我家己原來嘛賰無幾張，原稿已經賣予朋友，我足想欲完全告別這張過期的青春。
最後的100張「戀亂淡水」，就安呢，交予有河book，作伙來拼經濟。為著刺激買氣，我想就針對這張手繪地圖的相關話題，來辦一場「面會」......（面會，就是，我關佇淡水，你來看我啦！）
雖然這張圖已經相過厚話，但我本人猶閣較厚話，這擺面會分享的主題，佮音樂無關，佮山川地理、人間風景有關，歡迎來交流。（本場次以華語為主）
教育部自2006年開始規劃台語認證之相關事宜並預定佇今（2009）年開始辦理認證考試。卻是「全國台語能力認證考試」試務工作之預算佇過年前遭國民黨立法委員洪秀柱等人在立法院提案刪除，致使無法如期在今年辦理台語能力認證考試。
因為原住民語認證佮客語認證攏已經實施多年，干單猶賰台語認證未辦理。如今預算遭刪除，無法檢驗國中小學台灣本土語言教師之語言能力，的確會影響國中小學的台灣母語師資品質以及現任母語支援人員的工作權。
立法院國民黨團毋若刪除台語認證預算，連二二八相關議題之預算亦全數遭刪除。國民黨不但對二二八政治事件無悔意，甚至閣意圖以刪除台語預算的方式對本土語言進行文化屠殺。咱在此表達嚴正的抗議！
台灣羅馬字協會以及相關本土社團欲佇2月27號拜五彼工起鼓來向立法院抗議，表達以下訴求：
1. 抗議立法院對台灣母語的文化屠殺。
2. 要求立法委員無應當以自身偏隘之意識形態阻礙台灣各族群母語的正常發展。
3. 要求立法院須遵守聯合國教科文組織所公布之《世界文化多樣性宣言》中對各弱勢語言族群之保障。
咱邀請關心台灣母語發展的本土社團以及各界有志之士一同參與、響應！
注意事項：
1. 本抗議活動以理性訴求為原則，請參加者千萬毋通tsah刀tsah棍仔等等危險物品。
2. 欲參與抗議活動的社團佮個人，請事先email或者傳真聯絡，以統計人數。
E-mail tlhemail@gmail.com Fax 049-2526-871
發起單位：社團法人台灣羅馬字協會(代表社團)、台文BONG報雜誌社、台文通訊台灣總聯絡處、台南市台灣語文學會、台灣母語教育學會、台灣東社、台灣南社、台灣海翁台語文教育協會、李江卻台語文教基金會、長老教會台灣族群母語推動委員會。
◎本案聯絡人 朱素枝小姐02-23112199 │陳豐惠小姐 0968246270
8/13(三)～15(五) 台灣母語文學創作營
(攝影 / Liong)
