十幾年前初初來到淡水，「平洋底的」的動物，一下佇有海有山崙的好所在來放生，一切攏有夠新鮮，對滬尾街仔、大屯山區到規个北海岸，若新來的管區的四界去探。淡水欲往三芝的淡金公路（台2線），有一支車牌仔，站名叫做「下奎柔山」，掀開淡水鎮地圖，彼帶的地名有「下圭柔山」、「頂圭柔山」、「圭柔山溪」──「圭柔」，毋知是啥物意思？
後來，袂記兮是聽啥人講的抑是家己讀著的資料，講「圭柔」是一種樹仔的名，嘛有人寫做「雞柔」，「圭柔山」就是有蓋濟圭柔樹的山。「下圭柔山」彼附近，上早是平埔族「圭柔山社」的地頭，確實，佇《康熙皇輿全覽圖》裡（康熙58年，1719），淡水城後壁面的山，就有一支寫「圭柔山 至淡水城陸拾里」。
三百外冬前，郁永河來台灣揣硫磺，佇伊寫的冊《稗海紀遊》裡（康熙36年，1697），淡水河口附近的番社，有一社就叫「雞洲山社」；康熙朝佮乾隆朝所完成的地圖，攏有畫著「圭柔山社」；《諸羅縣志》（康熙56年，1717）所附的山川總圖，嘛有標出「雞柔山」、「雞柔社」，「雞」、「圭」是仝的音。
佇淡水街裡蹛遮久，有一回，真正拄著一位現代的「圭柔山人」：
「阿姐，請借問兮，『下圭柔山』恁遐在地人攏按怎唸？」
「Ē-kue-lōo-san」
「啥物？我聽無清楚，請妳閣唸--一遍......」
「Ē-kue-lōo-san」
面膜仔佮體格攏闊闊，予我會想著夏川里美抑是琉球小姐的這位阿姐，兩支手全sat-bûn-phué當咧幫我洗頭，佇我頭殼頂遮抓遐抓（jiàu）、遮lut遐thut，雄雄嘴裡彼句「Ē-kue-lōo-san」，煞若一句知音毋知意、有法力的神咒相仝。
「啊恁敢知影，恁遐是安怎叫『Ē-kue-lōo-san』？」
「啊知，人就攏講『Ē-kue-lōo-san』啊......」
「『圭柔』，台語毋是讀做『kui-jiû』抑是『kue-jiû』喔？」
彼擺，去予正港的下圭柔山的人笑，人根本毋捌聽過「kue-jiû」。坦白講，會按呢問，我是希望聽著佮文史資料裡一模一樣的講法吧──著啊著啊，阮下圭柔山乎，永過仔就是有足濟圭柔樹，清朝的時陣阮叫做圭柔社，後來佮北投社、大屯社kap做「圭北屯社」......
佇本土歷史研究好親像誠發達、「認識家己的家鄉」假若逐間小學攏真重視、欲掠資料網路google一下手隨有的時代，僥倖，那會逐家知影的攏差不多差不多，毋知到底siáng抄siáng。我拄著一个在地鄉親，心內煞已經tiâu一个歹習慣，有一sut仔希望家己佇現場聽著的，是進前就知的知識──是毋是安呢，才算有「印證」、較袂感覺「冊讀去尻脊胼去」足嚥氣？......佳哉家己猶無遐白目，會雞婆想欲「先覺覺後覺」：啊，恁遐會叫做「下圭柔山」乎，就是古早有足濟圭柔樹，啊這圭柔樹乎，是一種足碇、足好的柴，啊這冊有寫、學者有人研究、學校老師嘛有教......
彼工，邊仔一个目尾尖尖、頭毛電khiû-khiû的阿姐，對這个話題宛那有趣味：
「『ㄍㄨㄟ ㄖㄡˊ』，台語煞毋是就變『ㄍㄨㄟ ㄌㄡˇ』......」
無聲口白：呃，這位姐仔，啊咱台語是有「粿模」啦（kué-bôo，做紅龜粿咧khap的模仔），啊無「粿爐」（kué-lôo）這項物呢（炊粿的叫做「籠sn̂g」）──有影啦，這咱台灣人舌捲袂贏人，「台灣國語」，「ㄖ」定定會「ㄌ」去......
「妳敢知影『下圭柔山』這个地名是按怎來的？」我毋死心，想欲問甲有一支柄。
夏川里美阿姐講伊毋知，顛倒是「ㄍㄨㄟ ㄌㄡˇ」阿姐足gâu發揮：
「......一定是遐有一條街（kue）閣有一支山（suann），才會叫做『下街路山』（Ē-kue-lōo-san）──我想一定是按呢！！」
乎！有夠天才，腦神經會牽對按呢來，而且，這个解說，毋是無可能喔！
淡水「下圭柔山」的地理，主要是一條淡金公路，雙爿面攏是樓仔厝，毋過，一爿的巷仔入去無偌遠就會通到海，另外一爿產業道路peh崎起去攏是山崙仔，「圭柔山人」活動的範圍，海拔差不多五十至七十公尺之間，這大phiàn崙仔一直懸起去，佮大屯山相連，大屯主峰懸度1,092米，佇海拔兩三百公尺之間，有一條縣道101橫過，是淡水到三芝的「沿山路」，淡金公路算「沿海路」。
我原在屬「平洋底的」，就像海裡有「搭底的」的魚類。來佇北海岸這角頭生活，「空間感」佮屏東平洋是完全無仝的。我交關的洗頭毛店佇「水碓仔」，怹講淡水老街彼帶叫「下街」（ē-kue，淡水偏泉腔），老街是淡水鎮地勢上kē、上「下（ē）」仔的所在。我捌有一擺聽三芝的朋友講起，三芝人共經過北新莊的山線101縣道叫「頂路」，偎海的淡金公路叫「下路」，雖然這條介紹是為著欲鬥笑話（「下路」的音若Eros），但是若共提來鬥佇「下街路山」、「頂街路山」、「街路山溪」，假若閣會合軀（ha̍h-su）。
「圭柔」兩字，兩百九十年前，是干礁負責共平埔話的音記落來的「火星文」？抑是來淡水的漢人攑頭一下看，真正發現規山頭攏是圭柔樹？（「媠啦！圭柔山！」佮葡萄牙人的「Ilha！ Formosa！」會比得喔）......
圭柔山社的語言，早就毋知轉對佗去、iûnn對佗去──「圭柔」這个名詞，煞閣像「搭底的」搭佇塗跤，繼續黏佇站牌仔、路標佮門牌，一代過一代，在人烏白臆，在人編故事。
......................................................................................................
【華語對譯】山上一棵圭柔樹（2）
平白無故，怎麼會去認識到「圭柔」這個詞？
十幾年前初初來到淡水，「平原底的」的動物，一下子在有海有山崙的好地方來放生，一切都好新鮮，從滬尾街、大屯山區到整個北海岸，像新來的管區人員到處去探。淡水要往三芝的淡金公路（台2線），有一支站牌，站名叫做「下奎柔山」，翻開淡水鎮地圖，那一帶的地名有「下圭柔山」、「頂圭柔山」、「圭柔山溪」──「圭柔」，不知是什麼意思？
後來，不記得是聽什麼人講的或是自己讀到的資料，說「圭柔」是一種樹木的名字，「圭柔山」就是有很多圭柔樹的山。「下圭柔山」那附近，最早是平埔族「圭柔山社」的地頭，確實，在《康熙皇輿全覽圖》裡（康熙58年，1719），淡水城後面的山，就有一座寫著「圭柔山 至淡水城陸拾里」。
三百多年前，郁永河來台灣找硫磺，在他寫的書《稗海紀遊》裡（康熙36年，1697），淡水河口附近的番社，有一社就叫「雞洲山社」；康熙朝與乾隆朝所完成的地圖，都有畫到「圭柔山社」；《諸羅縣志》（康熙56年，1717）所附的山川總圖，也有標出「雞柔山」、「雞柔社」，「雞」、「圭」是同樣的音。
為什麼被稱做「圭柔山社」（雞洲山社/雞柔山社）？歷史上的「圭柔山人」可能自己也霧煞煞，西班牙文、荷蘭文、漢文，對「本山人」來說，都是「火星文」──我們一個音，你們好幾種寫法，那哪有辦法？哪跟你們跟得上？（地契裡面也有寫「街柔山」的......）
在淡水街裡住這麼久，有一回，真的遇到一位現代的「圭柔山人」：
「阿姐，請借問，『下圭柔山』你們那裡的在地人都怎麼唸？」
「Ē-kue-lōo-san」
「什麼？我聽不清楚，請妳再唸一遍......」
「Ē-kue-lōo-san」
臉型和體格都寬寬，讓我會想到夏川里美或是琉球小姐的這位阿姐，兩支手全肥皂泡正在幫我洗頭，在我頭上這裡抓那裡抓、這裡搓那裡推，忽然嘴裡那句「Ē-kue-lōo-san」，卻彷彿一句知音不知意、有法力的神咒似的。
「啊你們知不知道，你們那邊為什麼叫『Ē-kue-lōo-san』？」
「哪知，人們就都說『Ē-kue-lōo-san』啊......」
「『圭柔』，台語不是讀做『kui-jiû』或是『kue-jiû』喔？」
那次，被真正的下圭柔山的人笑，人家根本不曾聽過「kue-jiû」。坦白說，會這麼問，我是希望聽到和文史資料裡一模一樣的說法吧──對呀對呀，我們下圭柔山啊，以前就是有很多圭柔樹，清朝的時候我們叫做圭柔社，後來和北投社、大屯社合併成「圭北屯社」......
在本土歷史研究好像很發達、「認識自己的家鄉」似乎每間小學都很重視、要抓資料網路google一下馬上有的時代，可憐，怎會大家知道的都差不多差不多，不知到底誰抄誰。我遇到一個在地鄉親，心裡卻已經染了一個壞習慣，有一些些希望自己在現場聽到的，是之前就知道的知識──是不是這樣，才算有「印證」、較不會感覺「書讀到背部去」很不光彩？......幸好自己還沒那麼白目，會雞婆想要「先覺覺後覺」：啊，你們那裡會叫做「下圭柔山」呀，就是古早時代有很多圭柔樹，啊這圭柔樹呀，是一種很硬、很好的柴，啊這書上有寫、學者有人研究、學校老師也有教......
那天，旁邊一位眼尾尖尖、頭髮燙捲捲的阿姐，對這個話題也有興趣：
「『ㄍㄨㄟ ㄖㄡˊ』，台語不是就變『ㄍㄨㄟ ㄌㄡˇ』......」
無聲口白：呃，這位姐仔，啊我們台語是有「粿模」啦（kué-bôo，做紅龜粿在蓋的模子），啊沒有「粿爐」（kué-lôo）這項東西呢（蒸粿的叫做「蒸籠」）──確實啦，這我們台灣人舌頭捲不贏人家，「台灣國語」，「ㄖ」常常會「ㄌ」去......
「妳知道『下圭柔山』這個地名是怎麼來的嗎？」我不死心，想要問到有一支柄。
夏川里美阿姐說她不知道，反而是「ㄍㄨㄟ ㄌㄡˇ」阿姐很會發揮：
「......一定是那裡有一條街（kue）還有一座山（suann），才會叫做『下街路山』（Ē-kue-lōo-san）──我想一定是這樣！！」
厚！有夠天才，腦神經會牽向這裡來，而且，這個解釋，不是沒有可能喔！
淡水「下圭柔山」的地理，主要是一條淡金公路，兩邊都是樓房，不過，一邊的巷子進去沒多遠就會通到海，另外一邊產業道路爬坡上去都是山崙仔，「圭柔山人」活動的範圍，海拔差不多五十至七十公尺之間，這一大片崙仔一直高上去，和大屯山相連，大屯主峰高度1,092米，在海拔兩三百公尺之間，有一條縣道101橫過，是淡水到三芝的「沿山路」，淡金公路算「沿海路」。
我原來屬「平原底的」，就像海裡有「底棲」的魚類。來到北海岸這角頭生活，「空間感」與屏東平原是完全不同的。我光顧的美髮店在「水碓仔」，她們說淡水老街那一帶叫「下街」（ē-kue，淡水偏泉腔），老街是淡水鎮地勢最低、最「下（ē）」的所在。我曾經有一次聽三芝的朋友說起，三芝人把經過北新莊的山線101縣道叫「頂路」，靠海的淡金公路叫「下路」，雖然這條介紹是為了要湊笑話（「下路」的台語音若Eros），但是如果把它拿來湊在「下街路山」、「頂街路山」、「街路山溪」，似乎還能合身。
「圭柔」兩字，兩百九十年前，是只光負責把平埔話的音記下來的「火星文」？還是來淡水的漢人抬頭一下看，真的發現滿山頭都是圭柔樹？（「水啦！圭柔山！」和葡萄牙人的「Ilha！ Formosa！」有得比喔）......
圭柔山社的語言，早就不知轉化到哪裡去、融化到哪裡去──「圭柔」這個名詞，卻還像「底棲的」貼在地上，繼續黏在站牌、路標和門牌，一代過一代，任人隨便猜，任人編故事。
◎ 給《台灣教會公報社》的稿
