因為專輯欲發行，無一個Blog那像無一個門窗仝款——幫馬拉音樂做網頁的saba，志願幫我做一個窗仔門，就是大家即陣看著的「花埕照日」。
名是我號的。
是按怎，欲號做「花埕照日」呢？……

即幾工仔淡水當冷，八九度、十通度，雖然早就慣習，毋拘，一直非常懷念南台灣的冬天，燒熱的日頭。
阮厝早就已經無咧做穡，但是門腳口擱有一片空地，較早是「花埕」——頂頭人講是「稻埕」，客話號做「禾埕」，但是我嘛毋知也為什麼，從我有記智以來，即塊曝粟仔、曝豆仔、曝菜乾、曝有的無的的空地，就叫做「花埕」，到底是毋是寫做「花」，嘛毋知。
續落去的「照日」，是無意中想著「無米樂」內面的煌明伯仔，伊講，伊即代食到六七十歲矣，就擱愛做甲…無像怹爸矣彼代，「四五十歲就咧照日矣，就閒閒佇亭仔腳咧照日矣……」
佇台北生活遮濟年，一四界挨挨客客，欲去佗找一位曠闊的花埕通好照日？錢歹賺，時機醜，飼袂起的未來一直來——是講，日頭照好人，嘛照歹人（馬太福音五章45），只不過，毋知當時正通一無掛慮，閒仙仙來照日……中年黏膩到的我，按呢想。


…………………………………………………………………………………………
【華語對譯】

因為專輯要發行，沒有一個Bolg就像沒有一扇窗——幫馬拉音樂做網頁的saba，志願幫我做一個窗子，就是大家現在看到的「花埕照日」。
名字是我取的。
為什麼，要做叫「花埕照日」呢？……
這幾天淡水正冷，八九度、十來度，雖然早就習慣，不過，一直非常懷念南台灣的冬天，暖熱的太陽。
我家早就已經不務農，但是門前仍有一片空地，從前是「花埕」——北部人說是「稻埕」，客家話叫「禾埕」，但是我並不知道為什麼，從我有記憶以來，這塊曬榖子、曬豆子、曬菜乾、曬有的沒的的空地，就叫做「花埕」，究竟是不是寫成「花」，也不知道。
接下去的「照日」，是無意中想到「無米樂」裡的煌明伯仔，他說，他這一代到六七十歲了，還是辛勞得很…不像他父親那一代，「四五十歲就在曬太陽了，就在騎樓下享清福了……」（無米樂字幕以「享清福」意譯「照日」）
在台北生活這麼多年，到處擁擠不堪，到哪裡去找一處開闊的「花埕」來照日？錢難賺，時機壞，養不起的未來一直來——話是這麼說，日頭照好人，也照壞人（馬太福音第五章45），只不過，不知何時才能夠一無掛慮，清閒的曬曬太陽……馬上就要中年的我，如此想。