話一下煞，隨看人攑過來一支......學校老師猶未教、毋知國語欲按怎講的傢俬。毋過，聽著塗水師喝「鉛筆」、「鉛筆」，原來如貓，師傅毋免讀冊嘛愛tsah「鉛筆」！──囡仔人有耳無嘴，學話攏是安呢烏白聽、凊采鬥。到今，塗水師彼支「iân-pit」欲按怎寫？正經是啥意思？研究心無夠，只好掀著辭典內底用「椽筆」兩字，就宛那綴咧寫。

透世人毋捌家己種菜過，雖然「假日農友」已經搵幾仔年的豆油，毋過，攏佇果子園學剪葳較大部分，剪到今嘛猶無通出師。一直無bak菜園仔的穡頭，主要是感覺彼就愛逐日看會著、顧會著較好，目前實在無彼个精神。但是今年春天，「指導教授」建議，伊認為我應該愛做一寡需要出力、會流汗的工課（是、是、是...），問看我敢欲試看覓，換來種菜，對翻土開始學，自頭到尾全套實習。

不得了的新課程啊！頭殼頂三尺懸隨tshìng一大蕾白雲出來，雲頂有我oom花仔布、戴瓜笠仔、踞佇市仔口咧賣家己種的「有機蔬菜」，歡頭喜面向鏡頭展出「嘿嘿」的笑容，完全是櫻桃小丸子看相濟的表情......

我的「實習菜園」──講是「園」，有膨風的嫌疑，實際上，不過是細細塊仔的「園仔」，已經分做三股，雙爿兩股的塗，「工友阿伯」早翻好勢矣，留中央彼股據在我踳踏。講「股」，到底偌大股？其實，差不多一仙人倒落來，長度、闊度有夠通「種」而已。頂禮拜將雜草khau清氣了，先鋪一重火灰（hué-hu）摻一寡àu柴箍。

「假日農校」的青菜，真濟攏是工友阿伯平常時仔種的，伊並毋是「假日」農友，所以阮罕得相拄。阿伯相信伊的經驗，袂愛變變（pìnn-pìnn）遐的有兮無兮，一般做穡人按怎種菜，伊的規矩就照安呢行，差別佇無下農藥佮化學肥。伊共一股闊闊的塗分做兩稜，用鋤頭掘，正爿這稜掘過倒爿，倒爿彼稜掘來正爿，當然，佇兩稜咧換爿的時，下底的塗會翻起來頂仔，頂仔的塗tshiau一下，tsuânn put對下底去。

指導教授教我挖橫的，短短一條溝安呢，深度差不多仝椽筆頭的懸度，闊度比椽筆頭較闊淡薄──先將第一節（tsat）的塗挖起來邊仔tún，溝仔底鋪一重狗屎干（假日農校兩隻烏狗貢獻的），才閣khàm厚厚一重爛葉仔，了，開始挖第二溝。按這个順序，等於是共第二溝的塗填入去第一溝，致使第二溝上頂仔有掺火灰的塗，put落去拄仔好khàm佇第一溝的爛葉仔頂面，而且，第二溝上下底的塗，會變第一溝上頂仔的塗。

安呢照起工照步來，一溝一溝挖過去，逐溝按溝仔底疊起：一重狗屎干、一重爛葉仔、一重火灰佮àu柴箍、一重隔壁溝翻過來的塗，沓沓仔挖、沓沓仔囤。嘴講是足快，手ńg pih咧，親身挖落去就知，重huáinn-huàinn的椽筆攑佇手裡，黏thi-thi的塗thuh袂行就是thuh袂行──咱這款食好做輕可、無咧勞動的阿娘仔，一溝thuh猶未透，早就大粒汗細粒汗，兩三溝挖未意煞，已經thiám甲彎腰......

天又閣開始sap雨，無聲、無重量的雨毛仔，渥著袂澹，徛久嘛會濕，輕便雨衫也是hiannh來long咧較tsiâu著，椽筆攑咧，繼續挖土。

前幾日今仔收著祖珺學姊出專輯的消息──因為安呢，挖土的時，心內的彼台ipad煞家己自動選曲，不時會放伊唱的「愚公移山」，這條李雙澤學長掠楊逵的詩來作曲的歌。誠拄好，菜園仔邊無偌遠的所在，一大欉薔薇開欲二三十蕊，足鬧熱，花開了淡薄仔過頭，粉紅色的花瓣略仔開始咧落（lak），雖然毋是壓袂扁的玫瑰，風輕輕仔huê一下，若酒味的花芳，鼻著煞欲仝仔欲仝。

歌一直咧唱：「土地是我們的，是祖先開墾的，土地是我們的，我們要團結的幹下去」「我們要好好學挖地，要深深的挖下去，好讓根群能紮實，從現在就要學挖地......愚公一代，愚公兩代，愚公三代，我們要永遠的幹下去──」

楊逵的原詩：「大肚似海洋，水清可見底，大度山不是臥龍崗，黃袍在故宮，龍種早已絕」，唱做歌了後，掛佇尾溜的「龍種早已絕」，煞咻一下無去，變成消失的「絕」句。楊逵前輩（1906-1985）佇民國六十五年教師節寫遮呢直的詩，這位可愛的老大人，伊心肝底咧想啥，眾人敢讀無？──民國六十六年，李雙澤無將「龍種早已絕」大聲唱出來，是旋律鬥袂媠，必須剪掉加出來的句，抑是敏感的龍種「絕」不得？......哪，隔轉年底，台美斷交，滿街仔路攏是「龍的傳人」，無絕種的絕症煞顛倒大流行。

好好仔學挖地，深深仔挖落去──愚公毋是頭殼歹去「知其不可而為之」，伊老貨仔人應該是「知其可」，佇無火藥、無山貓、無怪手、無「水土保持」問題的時代，就是實實在在攑椽筆憨憨仔thuh，攑鋤頭寬寬仔掘，提畚箕一畚箕、一畚箕put。跤手無夠，暗時轉去koo-tsiânn「愚媽」，看有通閣加生幾个抑是閣加娶幾个（啥物啊？閣有體力娶細姨？！），老的、少年的、細漢的，囝囝孫孫大隊接力，歸綰來車拼。

乖乖仔學挖土，淺淺仔加減挖──阿娘仔實在毋是做園的料，但是「知其不可而為之」，因為美女減肥有需要。咱無錢去予彼款用「妳希望五十歲猶有人掠狂愛著妳無？」的廣告詞共查某人siânn的「健康體重管理中心」趁，歇睏日來菜園仔流汗，挖！掘〜種寡家己食平安的菜，無bái。

（【華語對譯】另日補之）