填 德國童謠Guter Mond, du gehst so stille

詞 演唱 鍵盤 王昭華│錄音 楊邦昊│台文顧問 林裕凱

◎歌聲下載


月娘姐姐 妳會綴佗出來呢？（月亮姐姐 妳會從哪裡出來呢？）
Gueh8-nîu tsé-tsé, lí ē tòe-tó tshut-lâi--neh？

蚊母 毋知食飽袂？（蚊母鳥啊 不知吃飽沒？）
Bang-bó, m7 tsai tsiah8-pá bē？

月娘姐姐 妳那赫暗出來呢？（月亮姐姐 妳怎麼那麼晚出來呢？）
Gueh8-nîu tsé-tsé, lí ná hiah-àm tshut-lâi nè？

貓頭鳥 早就睏醒了（貓頭鷹 早就睡醒了）
Niau-thâu-tsiáu, tsá tīo khùn-tshínn--liàu

荒郊野外 暗眠摸啊（荒郊野外 暗蒙蒙啊）
Hong-kau-iá-gūa, àm-bîn-bong ah

水雞ap-ap夯頭khok-khok等（青蛙呱呱抬頭一直等）
Tsúi-ke ap-ap gîa-thâu khok-khok-tán

月娘姐姐 等妳梳粧擱打扮（月亮姐姐 等妳梳粧又打扮）
Gueh8-nîu tsé-tsé, tán lí se-tsng koh tánn-pān

浮上山 四界光hiánn-hiánn（浮上山 四處光顯顯）
Phû-tsīunn-suann, sì-kè kng-hiánn-hiánn


月娘姐姐 你的面仔那花花？（月亮姐姐 妳的臉怎麼會花花？）
Gueh8-nîu tsé-tsé, lí-ê bīn-á ná hue-hue？

敢是床母共妳做記號？（是床母把妳做記號嗎？）
Kám-sī tshng5-bó kā-lí tsò-kì-hō？

月娘姐姐 妳那攏家己一個？（月亮姐姐 妳怎麼都自己一個？）
Gueh8-nîu tsé-tsé, lí ná lóng ka-kī tsit8-ê

無要緊 我tshūa妳來蹉跎（不要緊 我帶妳來玩耍）
Bô-iàu-kín, góa tshūa-lí lâi tshit-thô

大街小巷 ng國雞呀（大街小巷 捉迷藏呀）
Tōa-ke-sío-hāng, ng-kok8-ke iah

若阮媽媽一路khok-khok綴（像我媽媽一路一直跟）
Na gún má-má tsit8-lōo khok-khok tòe

月娘姐姐 綴我跳舞免歹勢（月亮姐姐 隨我跳舞別害羞）
Gueh8-nîu tsé-tsé, tòe góa thiàu-bú bián-pháinn-sè

笑一下 人就足水的（笑一個 人就很美）
Tshìo--tsit8-ê, lâng tīo tsiok-súi-è








【填詞說明】

歌友Heruler寄一塊德國囡仔歌的片仔送我，非常多謝伊。

其實，我家己嘛有一塊，兩塊的氣味真無仝，內底攏有收即條「Guter Mond, du gehst so stille」，我袂曉德文，干旦知也這是一條月娘的歌，因為小學學鋼琴的時，有一本《鋼琴小曲集》的譜，內底就有即條「月亮」，彼當陣的我，足愜意德國的「月亮」、日本的「荒城之月」、美國的「科羅拉多之月」，三個國家的月娘，感覺攏無相仝！

遙遠的記持若月光照過來，真濟感覺浮起，想講試看māi，填一個台語版。

即擺的錄音器材無好，彈佮唱家己嘛攏無滿意，但是無想欲擱一直lu落去，有一個粗胚就好，就安呢，先掛佇遮。



句1──「姐姐」是華語的稱呼，台語應當叫「阿姐」、「姐仔」，毋拘，佇即條歌裡唱「姐姐」比「阿姐」較順。我聽講，徳語的「月」是陽性的、「日」是陰性的，佮法語、西班牙語倒反。台語攏講「月娘」、「月娘」，概念中，月是女性吧。

句2──「蚊母」是蚊母鳥，就是夜鷹，問過幾仔個先輩，攏無人聽過即個詞，毋拘，我家己感覺伊的名足趣味，所以想欲唱伊。佇咱台灣，夜鷹有「台灣夜鷹」佮「普通夜鷹」兩種，「台灣夜鷹」的台語名叫「石磯仔」（tsioh-ki-á），日時仔攏歇佇溪埔。夜鷹的名有一字「鷹」字，但是毋是猛禽，干旦愛食蚊仔、蛾……即種gâu hông誤會的名，就像鯊魚內底的大憨鯊仝款，平平攏是「鯊」，結果性地溫純甲。

句4──「貓頭鳥」，造型足奇妙的鳥，毋知是毋是貓仔無代誌愛掠鳥仔、創治鳥仔、食鳥仔……上帝愛怹和好，命怹成做一體，變做貓頭鳥？

句5──「暗眠摸」，阮從細漢就有一個講法，叫做「暗眠摸山貓」，後壁的「山貓」加強頭前「暗眠摸」的程度，足心色的用法。

句6──「khok-khok」欲安怎解說呢？聽著「khok-khok」即個詞，我就會想著一隻馬仔，khok-khok、khok-khok向前行，而且是báng-kah。即條詞有兩個所在用著「khok-khok」：「khok-khok等」、「khok-khok綴」，我干旦會使勉強翻做「一直等」、「一直跟」。即個「khok-khok」，上有名的一句例句就是「人講你毋聽，鬼牽khok-khok行」，哎，這嘛是愛báng-kah則畫會出來……

句9──「面仔花花」，阿凱兄建議我用「面仔貓貓」，其實，我嘛知也「貓貓」的意思較著，毋拘，為著欲押韻啊！我想，有人講，滿面全豆花，he嘛是「花」，就共「花」落去吧。即句「妳的面仔那花花」，是咧講咱看月娘的時，表面煞無攏有一寡烏影？月娘姐仔無保養，「黑色素沉澱」的意思啦。

句10──「床母做記號」，「床母」是台灣民間專門咧保庇紅嬰仔的神明，「床母做記號」就是胎記，因為床母愛保庇足濟紅嬰，逐家攏生了平古錐，有做記號較好認〜〜這是從阿媽的阿媽傳落來的故事佮解說。第一段有「蚊母」，第二段有「床母」，其實，台語擱有其他足濟「母」，譬如：「拳頭母」、「蝨母」……

句13──「ng嘓雞」就是匿相揣。因為即馬樓仔茨介濟，人行仔行，月娘有時去予tsá咧無khoàinn，有時tsá無著就擱出現，人佮月娘之間，若咧匿相揣。

句14──「一路khook-khook綴」，人行路，月娘真正會綴喔，毋拘，即馬可能無啥物機會感覺著即個現象。即馬寫物件，心內有時煞會有自動檢查機制：為啥物是「媽媽」咧綴、毋是「爸爸」？愛唱媽媽就媽媽，愛唱爸爸就爸爸，莫吵。

以上，「詞責自負」，擱一擺感謝阿凱兄撥工掠包掠漏、提意見，也感謝Herulet的CD。



…………………………………………………………………………………………

【華語對譯】月娘姐姐

歌友Heruler寄一塊德國兒歌的CD送我，非常多謝他。

其實，我自己也有一塊，兩塊的氣味很不同，裡面都有收這首「Guter Mond, du gehst so stille」，只知道這是一首月亮的歌，因為小學學鋼琴的時候，有一本《鋼琴小曲集》的譜，裡面就有這首「月亮」，那時候的我，很喜歡德國的「月亮」、日本的「荒城之月」、美國的「科羅拉多之月」，三個國家的月亮，感覺都不一樣！

遙遠的記憶像月光照過來，很多感覺浮起，心想試試看，填一個台語版。

這次的錄音器材不好，彈和唱自己也都不滿意，但是不想要再一直嚕下去，有一個粗胚就好，就這樣，先掛在這裡。



句1──「姐姐」是華語的稱呼，台語應當叫「阿姐」、「姐仔」，不過，在這首歌裡唱「姐姐」比「阿姐」順。我聽說，徳語的「月」是陽性的、「日」是陰性的，和法語、西班牙語相反。台語都稱「月娘」、「月娘」，概念中，月是女性吧。

句2──「蚊母」是蚊母鳥，就是夜鷹，問過好幾個先輩，都沒人聽過這個詞，不過，我自己覺得牠的名字很有趣，所以想要唱牠。在我們台灣，夜鷹有「台灣夜鷹」和「普通夜鷹」兩種，「台灣夜鷹」的台語名字叫「石磯仔」（tsioh-ki-á），白天都歇在溪埔。夜鷹的名字有一個「鷹」字，但是不是猛禽，只是愛吃蚊仔、蛾……這種容易被誤會的名字，就像鯊魚裡的大憨鯊（豆腐鯊）一樣，一樣都是「鯊」，可是性情很溫馴。

句4──「貓頭鷹」，造型很奇妙的鳥，不知是不是貓沒事愛抓鳥、作弄鳥、吃鳥……上帝要牠們和好，命牠們成為一體，變成貓頭鷹？

句5──「暗眠摸」，我們從小就有一個說法，叫做「暗眠摸山貓」，後面的「山貓」加強前面「暗眠摸」的程度，很有趣的用法。

句6──「khok-khok」要怎麼解釋呢？聽到「khok-khok」這個詞，我就會想到一隻馬，khok-khok、khok-khok向前行，而且是卡通。這首詞有兩個地方用到「khok-khok」：「khok-khok等」、「khok-khok跟」，我只能勉強翻譯成「一直等」、「一直跟」。這個「khok-khok」，最有名的一句例句就是「人講你不聽，鬼牽khok-khok行」，哎，這還是要卡通才畫得出來……

句9──「面仔花花」，阿凱兄建議我用「面仔貓貓」，其實，我也知道「貓貓」的意思較對，不過，為了要押韻啊！我想，有人說，滿面全豆花，那也是「花」，就給她「花」下去吧。這句「妳的面仔那花花」，是指我們看到月亮的時候，表面不是都有一些黑影？月娘姐仔沒保養，「黑色素沉澱」的意思啦。

句10──「床母做記號」，「床母」是台灣民間專門在保佑嬰兒的神明，「床母做記號」就是胎記，因為床母要保佑很多紅嬰，大家都長得一樣可愛，有做記號較好認〜〜這是從阿嬤的阿嬤傳下來的故事和解釋。第一段有「蚊母」，第二段有「床母」，其實，台語還有其他很多「母」，譬如：「拳頭母」、「蝨母」……

句13──「ng嘓雞」就是捉迷藏。因為現在樓房很多，人走啊走，月亮有時被遮住沒看見，有時沒遮住就又出現，人與月娘之間，像在捉迷藏。

句14──「一路khook-khook跟」，人走路，月娘真的會跟喔，不過，現在可能沒什麼機會感覺到這個現象。現在寫東西，心中有時居然會有自動檢查機制：為什麼是「媽媽」在跟、不是「爸爸」？愛唱媽媽就媽媽，愛唱爸爸就爸爸，別吵。

以上，「詞責自負」，再一次感謝阿凱兄抽空抓包抓漏、提意見，也感謝Heruler的CD。