chang暗，十八度C的淡水，已經偎番點矣，更深露重，騎車欲轉去……

清水街，店門chiâu關關落來矣，冷冷清清，應該是歸chuā路暗眠摸較著，想袂到，猶有一個擔仔電火泡仔擱咧焯。

騎過去，一個阿伯徛佇擔仔頭前咧排物件，排啥物？咦？……o·-to·-bái隨翻頭，無來看māi那會使？

「阿伯，hiah暗矣猶未睏？」

「猶未啊！」

停落來詳細一看，正發覺：哇！歸的擔仔位紅紀紀！──紅龜、麵錢、紅圓，這攏大紅的；頭前較kē的即層，壽桃、發粿攏是粉紅仔色的。無相機通hip實在真無采。

「阿伯，即馬太咧賣這？」

「明仔載人天公生欲拜拜啊！」

「『天公生』？『天公生』煞毋是正月初九？！」

「十月十五嘛是天公生。」

「是咱淡水遮的廟正安呢嗎？……」

「一四界嘛安呢。」

真正足久無看著遮的物件矣：

紅龜──毋是紅龜粿喔！紅龜粿是糯米做的，皮黏黏、扁扁一塊包紅豆仔āⁿ彼款；紅龜是麵粉做的，內底包豆沙（se），一粒圓圓，略仔長高長高。

麵錢──我是第一擺看著，造型淡薄仔成紅龜粿，但是是麵粉做的，差不多一公分厚，龜印的表面換用模仔印銅錢的花草。我是看著紙khe仔的邊仔寫「麵錢」，正知即種祭品的名。

紅圓──啊！即馬的紅圓變做hiah細粒，干旦一個拳頭母大……紅圓，竟然變甲chiak古錐……細漢，阮遐的餅仔店做的紅圓攏袂細粒，可能有35C的乳仔hiah大喔……是講，嘛有可能是囡仔人，看啥物攏大。紅圓，造型像查某人的乳仔仝款，我一直認為，是拜拜的食物內面，上sexy的一種。只是，記持當中有「阿母」的感覺、好親像真正會當suh乳仔的大粒紅圓，煞kiu一下束甲變chiak細粒，幾仔排疊做伙，是有幼齒、青春、可愛啦，毋拘，我抑是「戀母」，大粒紅圓看著較滿足。

壽桃──若紅嬰仔的嘴phóe，白白白、幼麵麵一粒，桃仔尾染做粉紅仔色的。

發粿──平常時看著的發粿攏是黃的，神明生的發粿，發粉摻紅花染，發出來變淺淺的紅色。

「阿伯，你這攏去佗割的？」

「去大果菜市割的。」

「走甲台北喔？」

「著啊。賣即幾工仔niā啦，嘛去割花來賣……」

阿伯手kí對對面的亭仔跤，我正看著有一個阿桑坐佇椅古頭仔咧整理花把，向我tìm頭，笑笑。

「阿伯啊你欲踮遮到天光喔？」

「無啦！排排咧，khàm起來，欲來睏矣，這明仔載仔透早欲賣的……」

「毋驚人偷喔？」

「欲偷，做伊去偷……」

今仔載起，阮茨附近的花店嘛排幾仔排彼種拜拜用的花把，看來，有影是一個大日。

真慚愧，我是google了後正知，農曆十月十五是下元節，水官的生日。

chang下晡，一綰朋友去烏來「天邊的家」聚會，chhūa去的囡仔一大陣若放山雞仝款，放予四界走相jiok。

阮即沿的，唯下港來台北讀大學，留佇北部食頭路，下一代已經咧讀幼稚園、國校一二年仔。因為攏佇台北生活，即馬，若欲講無愛予囡仔聽有的代誌，就會用台語。Amy的大漢後生佇學校有上台語課，伊共囡仔鼓勵，叫伊台語好好仔學，安呢，毋正會當偷聽著爸爸媽媽的秘密……。朋友內面，阿慶仔是國小英語師資班出來的，佇台北市教英文，最近為著籌備聖誕節的教學活動，無閒chih-chah。逐家攏面對著欲予囡仔學英文、學才藝的問題，幾歲學較好，去佗學較好，啥物時陣愛放，啥物時陣愛經，誠頭疼……

大概是經過安呢的下晡，即個暗暝，佇稀微的市仔看著遮的紅龜、麵錢、紅圓、發粿，聽著阿伯講「天公生」──正月初九天公生的「天公」，是玉皇大帝；阿伯講的天公生的「天公」，應該是咧講「三界公」、三官大帝：天官賜福，地官赦罪，水官解厄。天、地、水，人原本就是活佇即內面，若是會當透過「水官生日」的祭儀，予咱對「水」有敬畏、有珍惜，敢毋是真好呢。毋拘，阮的下一代，可能會干旦知也萬聖節的金瓜燈佮聖誕節的化妝party，知也耶穌的生日佮騎鹿仔送禮物的老阿公。

農曆十月十五（2006/12/5），水官生日，若有心，咱看是去河頂的大橋、溪仔邊的埠岸、甚至是一條臭水溝仔邊嘛好──徛一時仔，向無人替伊廣告的水官大帝祝壽一下吧。　



…………………………………………………………………………………………

【華語對譯】水官過生日

昨晚，十八度C的淡水，已經要一點了，更深露重，騎車要回去……

清水街，店門全關下來了，冷冷清清，應該是整條暗矇矇才對，想不到，還有一個攤子電燈泡還亮著。

騎過去，一個阿伯站在攤子前面在排東西，排什麼？咦？……摩托車馬上掉頭，沒來看看怎麼可以？

「阿伯，那麼晚了還沒睡？」

「還沒啊！」

停下來詳細一看，才發覺：哇！整個攤位紅吱吱！──紅龜、麵錢、紅圓，這都大紅的；前面較低的這層，壽桃、發粿都是粉紅色的。沒相機可拍實在太可惜。

「阿伯，現在怎麼在賣這？」

「明天人家天公生要拜拜啊！」

「『天公生』？『天公生』不是正月初九嗎？！」

「十月十五也是天公生。」

「是我們淡水這裡的廟才這樣嗎？……」

「到處都這樣。」

真的好久沒看到這些東西了：

紅龜──不是紅龜粿喔！紅龜粿是糯米做的，皮黏黏、扁扁一塊包紅豆仔餡那種；紅龜是麵粉做的，裡面包豆沙，一粒圓圓，稍稍橢圓橢圓。

麵錢──我是第一次看到，造型有點像紅龜粿，但是是麵粉做的，差不多一公分厚，龜印的表面換用模子印銅錢的花草。我是看到紙盒子邊邊寫「麵錢」，才知這種祭品的名字。

紅圓──啊！現在的紅圓變做那麼小粒，只有一個拳頭母大……紅圓，竟然變得這麼古錐……小時候，我們那裡的餅店做的紅圓都不小，可能有35C的乳房那麼大喔……是說，也有可能是小孩子，看什麼都大。紅圓，造型像女人的乳房一樣，我一直認為，是拜拜的食物裡面，最sexy的一種。只是，記憶中有「阿母」的感覺、好像真的可以吸到奶的大粒紅圓，卻縮一下束得變這麼小粒，好幾排疊在一起，是有幼齒、青春、可愛啦，不過，我還是「戀母」，大粒紅圓看起來較滿足。

壽桃──像紅嬰仔的臉頰，白白白、幼綿綿一粒，桃子底部染做粉紅仔色的。

發粿──平時看到的發粿都是黃的，神明生日的發粿，發粉摻紅花染，發出來變淺淺的紅色。

「阿伯，你這都去哪裡批的？」

「去大果菜市批的。」

「跑到台北喔？」

「對啊。賣這幾天而已啦，也去批花來賣……」

阿伯手指向對面的亭仔腳，我才看到有一個阿桑坐在矮凳子上在整理花把，對我點頭，笑笑。

「阿伯啊你要在這裡到天亮喔？」

「沒啦！排一排，蓋起來，要來睡了，這明天一大早要賣的……」

「不怕人偷喔？」

「要偷，讓他去偷……」

今天早上，我家附近的花店也排好幾排那種拜拜用的花把，看來，真的是一個大日子。

真慚愧，我是google之後才知，農曆十月十五是下元節，水官的生日。

昨天下午，一掛朋友去烏來「天邊的家」聚會，帶去的孩子一大群像放山雞一樣，放著讓他們到處相追逐。

我們這一沿的，從南部來台北讀大學，留在北部工作，下一代已經在讀幼稚園、國小一二年級了。因為都在台北生活，現在，如果要說不要讓孩子聽懂的事情，就會用台語。Amy的大兒子在學校有上台語課，她鼓勵孩子，要他台語好好學，這樣，才可以偷聽得懂爸爸媽媽的秘密……。朋友裡面，阿慶仔是國小英語師資班出來的，在台北市教英文，最近為了籌備聖誕節的教學活動，很忙碌。大家都面對到要讓孩子學英文、學才藝的問題，幾歲學較好，去那裡學較好，什麼時候要放鬆，什麼時候要要求，很頭疼……

大概是經過這樣的下午，這個夜晚，在稀微的市場看到這些紅龜、麵錢、紅圓、發粿，聽到阿伯講「天公生」──正月初九天公生的「天公」，是玉皇大帝；阿伯說的天公生的「天公」，應該是在說「三界公」、三官大帝：天官賜福，地官赦罪，水官解厄。天、地、水，人原本就是活在這裡面，若是可以透過「水官生日」的祭儀，讓我們對「水」有敬畏、有珍惜，豈不是很好呢。不過，我們的下一代，可能會只知道萬聖節的南瓜燈和聖誕節的化妝party，知道耶穌的生日和騎糜鹿送禮物的老阿公。

農曆十月十五（2006/12/5），水官生日，若有心，我們看是去河頂的大橋、溪邊的堤防、甚至是一條臭水溝邊邊也好──站一會兒，向無人替他廣告的水官大帝祝壽一下吧。