February 4,2012
一人一路
油墨略仔殕殕的數目字，加湠幾仔頁去，看著煞若生菇。講是「洗簿仔」，實情是愈洗愈烏。平常時仔罕得提簿仔來洗，橫直就是彼幾千箍仔、幾千箍仔咧加（稿費），一千、兩千咧減（日用），有時幾百箍仔咧轉出（網購），錢水出出入入攏用滴的，大滴細滴的精差爾爾，寄金簿免啥洗，完全「點滴在心頭」。難得這回，台灣文學獎的獎金入數，有......真想欲講「一『港』錢水」流入來，毋過毋著，「港」是有源頭、會一直貢貢流的；閣想講，敢會當講是「一『桶』錢水」？但是人華語咧講「第一桶金」，一桶是一百萬呢，咱連人半桶閣半桶都綴袂著，差遠咧。
一港？一桶？一khat？一觳(khok)？......公報社的編輯來批恭喜我得獎，而且，希望我會當共創作的心情佮讀者分享──我想我是共「『創作』的心情」佮「『得獎』的心情」捎顛倒反去矣，一直牢佇彼兩觳錢水的歡喜佮感慨裡。
...繼續閱讀February 2,2012
Facebook 2012.01
平洋頂，直直直的鄉道，應該就是較早糖廠的鐵枝路拆起來的。舊版的戶外生活地圖，糖廠鐵路的路線，一逝一逝若人去手術，割皮刣肉才閣紩(thīnn)合起來的痕。鐵枝路拆起來，變點仔膠路的鄉道，放線好離離的皮肉，袂閣再流糖膏，向望毋通泏(tsuh)苦汁就好。放線好離離的皮肉，袂閣再流糖膏，向望毋通泏(tsuh)苦汁就好。
平原上，直直直的鄉道，應該就是以前糖廠的鐵路拆起來的。舊版的戶外生活地圖，糖廠鐵路的路線，一道一道像人去手術，割皮殺肉才再縫合起來的痕。鐵路拆起來，變柏油路的鄉道，放線好全了的皮肉，不會再流糖膏，盼望不要泌苦汁就好。
January 25,2012
請予大樹好食睏
Tshiánn hōo tuā-tshiū hó tsia̍h khùn
 |
舊年12月去台南領獎，國家文學館頭前的湯德章紀念公園，圓環仔圍一輪的彼幾欉樹仔，樹箍下爿節攏已經特別用金紙包起來矣──為著過年過節的氣氛，毋知從當時開始，流行佇樹仔頂掛聖誕燈，一點一點的燈仔火，若天星落落來牢佇樹絡(tshiū-le)，確實真好看。近來，大都市小鄉鎮嘛佮人仝款，愈來愈gâu粧，愈粧愈工夫，樹仔頂的聖誕燈，毋是干焦吊咧、披咧、掛咧爾，定定是對樹箍纏咧，纏甲密密密，就親像替樹仔穿一軀非常合軀、專門欲展身材的珠寶衣。
彼工，湯德章紀念公園的樹仔，電火珠仔已經掛起去矣，樹箍專工用金紙包，可能是想欲有框金包銀的效果，是講，彼樹皮愛規個外月翕佇紙內底，毋知會得過未。
阮潮州鎮的三角公園仔，角色嘛差不多像台南的湯德章紀念公園按呢，是佇市中心、路中央的一塊公園，毋過，府城人閒閒無代誌可能袂散步過車路入去「民生綠園」行踏；阮潮州的三角公園仔無仝，伊毋若是一塊「予人撋(nuá)做三角飯丸型」的「圓環仔」，嘛是阮自做囡仔攏會去樂陶、真真正正的公園仔(一定愛加「仔」哦，伊只有245坪！)。阮的三角公園仔雖然有夠細，但是足有份量，因為，佇遮呢細塊的小所在，就有一欉老茄苳，另外的欖仁樹、樟樹嘛攏誠大欉。三角公園仔的老茄苳，應該會當做潮州鎮的鎮樹，我攏會足想欲去共摸、共抱，好好仔欣賞伊，結果，伊嘛佮台灣其他佇市中心的樹仔仝款，身軀予人纏甲一條一條。公園仔內的樟樹，嘛是電線像旋藤，毋知縛偌久矣，樹仔繼續咧大，電線已經繃甲絚絚絚，強欲煏斷煞煏袂斷，自然力佮人為力咧相咬，誠激烈。
寫鎮長信箱去反映，無幾工，回批來，「感謝您的寶貴意見，本案列入重要建議，將予以審酌辦理，謝謝您。」我毋知是毋是愛相信、愛等待。今仔日，騎車踅去北勢廍，經過三星里活動中心，門口雙爿面的樟樹真懸大，樹勢足媠──只是想袂到，電火珠仔的電線毋是用纏的爾，是細支釘仔一支一支釘，共線路固定起來──看彼伸懸起去的樹型，若像雙手攑起來咧喝「我投降！我投降！」。這兩欉大欉樟仔，照講是堂堂將才的格，煞變兩个戰輸受刑的敗兵。這馬嘛足流行向樹仔拍光，電火燒燙燙著規暝，樹仔攏無通好好仔睏，好好仔行氣，實在誠酷刑。講來，這算是無心之過，咱人徛佇咱人的角度咧決代誌，就是會按呢，而且，出發點一定是好意的，欲予咱的環境較光、較媠、較有氣氛，欲予逐个過節歡喜，無人是存歹心咧佈置公園佮社區，只是較無替樹仔設想甲齊著。
在咱台灣民間，樹仔食老會變做神，一个庄頭、一个地方有一欉有神格的老樹，是無價之寶。我想起，民間信仰內底，神像攏愛用規塊柴落去刻，袂當有一支釘仔──像按呢對「神」、對「木」的敬意(傳統 / 禁忌)，若是會當推展到對一欉活活的樹嘛有這份心，毋知有偌好。
January 11,2012
國家因我而大尾
(攝影 張良一)
看著彼支「站上你家的頂樓……」的MV，彼若我，「站上我家的頂樓」，實在足想欲跳落去。
MV的標題號做「國家因你而偉大」，但是，免講到「國家」，小小一个「地方」，一點仔都無能力「因我而偉大」。
選前三工，一定欲共淡水這支煙銅管貼出來。
這是徛佇淡水圖書館頭前的天橋頂，看淡水河觀音山的相片（感謝攝影師良一兄），這條天橋，逐工放學時間有足濟國小的學生囡仔會經過，逐工，拍開目睭欣賞家己的家鄉，若是欲培養一位有目有心的好國民，這應該是真重要的生活經驗。佇淡水圖書館精心設計的室外閱覽區，會當看著倒爿──1930年代淡水鎮的地標，淡水長老教會的尖塔；斡過正爿欲看河看海──21世紀淡水區的新地標，這支大卵鳥，開咱的稅金九千外萬，破壞景緻，刺目，無美感，也毋是為著交通便利、為著區民福利，到底是為著啥物？
舞這齣，佮「夢想家」仝級數的！「夢想家」演兩暝就煞，夢幻泡影，至少袂傷著遐濟人的目睭。這間「淡水藝術工坊」，這支大煙筒，會一直插佇遮，與觀音山、淡水河同在，看著這支，敢有人猶喝會出「詩美之鄕、文化小區」？佮這支相對看，敢有人會自然歡喜想欲唱歌？……啥物美感是客觀的、在人的，愛耍觀念的人做恁去諍，共這支大煙筒管印佇杯仔、印佇筆記簿，有人欲買我才輸你。
這支煙筒管，是2011年二月落成啟用的「淡水藝術工坊」，周錫瑋任內的政績，台北縣城鄉發展局扞頭的案，九典建築師事務所設計的作品──就像醫療過失，本來只是愛媠嬈尻川欲美容的淡水，開錢予這綰人一下手醫醫死（風景是有性命、是會活會死的！風景是祖先仔放的公共財！），無人道歉，無人下臺，無人提出誠意看會當按怎彌補。
「國家因我而偉大」，抑是「國家因我而大尾」？無力者的選前哭呻（khàu-tshan）〜 臺灣，已經賰無幾位好山水通堪得按呢予人糟蹋！
...繼續閱讀
