Bichhin｜港邊惜別

気分転換

除非是自細漢就佇多語ê環境生活，若無，青春已經過一半去ah，tsiah重新學1個新語言，其實真正是「艱苦代」。

雖bóng對日語毋是無趣味，iā抱著 1款想beh koh khah了解阿公阿媽彼代ê心情teh倚近tsit-ê語境，總是，頭殼不時會 tùn-teⁿ，定定想代誌會有相phah電ê症頭發生。（就是台語mā寫bē出來，中文mā會變做講bē好...）我學日語ê狀況koh是「半自發」ê，咱若去kā想「跨語」ê世代hiah-ê老台灣人，怹無願意，iā著受環境所逼來轉換頭殼內ê符號，行過怹後半生。自按呢，濟濟人心內ê聲音壓佇深深ê所在，家己mā掀袂起來。實在真可惜，泛勢有外濟美麗ê故事，家己愛叫家己放袂記。

我iā有tsit款心情。濟濟代誌愛叫家己先放袂記。來日本1冬ah，uì完全聽無、講無、寫無，到最近，總算tsiah tauh-tauh發現家己會用日語思考、寫日文ê時毋免逐時需要先用中文iah是台語先講1遍、寫1遍tsiah翻做日文，已經tauh-tauh會當用日語寫。雖然iáu是kài「àu」，頑張っています。

「気分転換」ê意思是，換心情。最近，創1個日文ê blog，kā家己平常ê文章貼起lih bóng分享。若有會曉日語ê台灣朋友，mā歡迎相kap討論，若有日本朋友看著，mā歡迎指正。「森は静まり返ってた」，有閒來坐。

幸福ê滋味

佇遮，食過上好食、上鮮（tshiⁿ）ê日本壽司、濟濟項日本料理；當然，抑是台灣菜khah慣勢。去過真濟所在tshit-thô；佇2度ê天氣食明治冰淇淋、佇半暝12點0度以下泡露天風呂（溫泉），佇日本人ê厝過年、食"年越飯"，mā攏是毋捌有ê美好ê經驗。

總是，上tsiap做ê代誌是食家己煮ê台灣菜、包明仔載ê便當；食飽屈佇"こたつ"（華語號作暖桌，台語應該會當號作烘爐桌仔^^）邊仔，ná看電視ná讀冊。Kap濟濟iáu佇台灣拍拼ê鄉親朋友比起來，現此時ê我，thang算是生命中間，心情會當上"清閒"ê日子。

彼日，甚物攏無煮，tsū 3項醬菜配飯。1項是美虹姐（賴青松in某）家己做ê、佇guán出國進前送guán ê酒釀豆乳（真正足甘、足好食）；1項是日語學校班上ê韓國人送guán ê、in老母家己做ê韓國泡菜（日本人做ê正經袂比tsit）；koh 1項是去上野買ê台灣鹹鴨蛋。

這就是上kài幸福ê滋味：）

東京ê月光

真可惜，無法度kā彼工ê月光hip起來，實在足媠。

會記前一陣仔，tī網路看tio̍h台灣新聞mā有講tio̍h微笑月亮；2粒星下跤是微微仔笑ê月娘。結果，guán tī東京，beh去日本老師 in tau食"年越飯"、配"紅白歌合戰"ê路裡，mā有看tio̍h足光足媠ê月娘，不過，koh khah細眉，iah陪伴伊ê，賰1粒星niâ。雖bóng比微笑月亮看起來有khah稀微，mā是hiah-nih光、hiah-nih迷人。

年越飯食了、"跨年"ê彼1刻（台灣時間是11點），guán tī電車站月台內面ê待合室（khah燒）等車，惦惦仔hāⁿ過tsit 1冬。若tshan像teh眠夢。

行轉厝ê路nih，猶原是仝款ê月光kap彼粒星作伙行，不管未來按怎，活tī目(ba̍k)前，就是幸福。

續來ê路，就算tī暗暝中，mā beh像彼日ê月娘，hiah-nih光明。

佇台北ê上尾工

佇台北ê上尾工，等人、等時間，淡薄仔tsak，淡薄仔毋甘。

房間清kah空空，liâm-mih會kā鎖匙還予台北。猶無法度整理tsit 1冬ê記持，kan-taⁿ是目1睨就過，像tsit-má仝款，無聲無說。

這幾日，有機會騎oo-too-bai（機車），看khah濟台北ê景，媠ê、bái-ê攏無要緊，總是，佇心裡tsiah小可有佮意tsit-ê城市ê感覺，因為khah了解ah，因為，beh離開--a。

後禮拜ê今仔日，就佇東京街頭行踏，向望tsit-ê續來走找ê過程，佮意ê感覺會來了khah早。

台北，さようなら。

【筆記】賴和相關

5月初8，轉去清華分享賴和音樂專輯《河》ê相關議題，彼日講kah siuⁿ過頭嚴肅，真害。去進前有做一寡小小ê筆記，kap彼日現場講ê其實無kài相關，不過，mā是貼佇tsia kap大家分享。

＝＝＝＝

咱逐人平凡，親像賴和。Huān勢賴和只是留落一款「態度」，無張持續變作咱ê「典範」；表示，咱失去ê實在太濟。Kiám-chhái歸佇，咱攏一直活踮一個破病ê社會，病因出佇無正常ê國家體制。日本時代猶有詩醫賴和，咱ê時代續加愈濟治袂完全ê絕症。所以定著，咱需要tshiau出愈濟平凡ê人，親像秦得參這款小人物、親像月光內面ê農民群像，這是賴和留予咱ê濟濟啟示之一。

《河》對guán來講，毋若是「取暖」若定。無法度直接改變社會，著先用社會改變、反省咱家己，《河》是仲介，將咱（賴河彼代人、咱這代人；咱、社會）串連作伙；就算真細，伊欲聚集，成作一股力量，直直tu向彼个「病因」。咱共同ê「症頭」可能袂好，至少咱著知，伊是啥物；咱身軀有啥物傷，beh按怎佇「傷痕」內底，用正面ê態度，去找著咱ê時代，生命ê希望。

一段林茂生ê譯文

下底tsit段話，是佇1933年4月ê《台灣教會公報》（第577期，頁10）看著。彼篇散文是林茂生所寫，〈數念過去ê人〉。伊uì伊ê米國朋友Walter A. Taylor，寫予怹過往ê細囝ê文翻譯作台語，講「ài予凡若流目屎猶未ta ê人，看了受安慰。」

看著這幾句話，koh有彼人所寫ê，感覺心情不止平靜。定著咱自少年就會tàng看生死ê事khah輕，就若受著磨，亦袂hiah-nih艱苦。

貼彼个原文kap林茂生ê台譯，kap大家分享：

It is not meet for us to judge God’s way.
And if he calls a child it is because He needs him.
Some live long and never learn.
Some are called early, because they have finished their training.
There is work to do beyond the sky, work that the Architect of Space wants done by children.
That’s why he asks them to come early, that may fit themselves for higher work.

人欲判斷上帝所行ê事，是無合宜。伊若是有召囡仔轉去伊兜，是因為伊有欠用伊。
有人食長歲壽，也攏無學半項。有人khah早受召，是因為伊已經受訓練清楚。
佇天裡彼爿猶原有工thang做。彼个工是即个宇宙建築ê大師傅，ài囡仔去鬥做。
因為按呢，伊chiah召囡仔khah早轉去；ài予in備辦來合彼个khah高尚ê工程。 (繼續閱讀...)

2008 台灣母語詩人大會

活動時間：2008年5月31日下午14:00~17:00 (中部場；台中中山醫學大學)
邀請詩人：江秀鳳、陳胤、陳潔民、康原

活動時間： 2008年6月7日下午14:00~17:00 (南部場；國立台灣文學館)
邀請詩人：黃勁連、陳建成、方耀乾、周華斌

活動時間：2008年6月29日下午14:00~17:00 (北部場；台北NGO會館)
邀請詩人：李勤岸、陳明仁、張芳慈、呂美親
(Guá tī tsia, beh khuànn guá ê lâng tō lâi ooh)

詳細資訊kap報名（網路報名）

(繼續閱讀...)