逐個愛人仔，lóng是1個囡仔；逐個bat愛過ê愛人仔，lóng是1個死去ê囡仔。時間久久，mā會koh囥tī心肝底層、iáu有寡氣息仔tháu會出來ê所在；tī你無疑誤ê時手伸出來，用像beh討物食ê無辜表情，teh提醒tio̍h kā思念。

秋天又koh beh來，最近定定頭殼內teh唱1條歌：〈秋天的囝仔〉（收tī《秋天的孩子：思念卓奇》專輯，2005）。「狡獪」（káu-kuài）慣勢ê豬頭皮（朱約信）真少唱tsiah-ni̍h「深情」ê歌，為著紀念伊ê好朋友李坤城怹後生；傷心ê爸爸用歡喜ê心情，祝福伊ê囡仔飛去天頂變作天使，永遠kā怹看顧。甘願án-ne想起，有時楓仔葉是訊息，有時風聲是伊teh叫你。

伊beh離開ê時，我送伊1本絕版、真無簡單tsiah買著ê冊《我喜歡這樣想你》（胡 慧玲著），封面是鄭竹梅劃爸爸鄭南榕ê像。「Hō· góa án-ne siūⁿ lí.」我留tsit句話tī冊ni̍h予伊，伊問he什麼意思，我惦惦無話，tī心內kā伊應：「Hō· góa án-ne siūⁿ lí. 當作你mā已經死去，tī siōng美好ê時陣死去。」1個生命死去，就有1個天使出世tī另外1個世界看顧每1蕊暫時孤單、iáu茫茫渺渺ê靈魂。

Án-ne khah好，至少khah好；無koh tsē掛，無koh心疼（thiàⁿ）。Hiah-ê楓仔葉，我lóng有收tio̍h--à，收tio̍h to̍h好--à，我囥tī心內，án-ne tio̍h好--à！秋天的囝仔！我已經無楓仔葉；願你hiah-ni̍h良善。

秋天的囝仔　詞：李坤城，曲、唱：朱約信

Tse應該是黃乙玲ê歌其中我siōng kah意ê 1條，感覺1條簡單ê歌詞，背後有1段美麗ê故事，hūan勢會tàng寫出1齣劇本、1部小說、1首長長ê詩。最近teh看1寡白話字詩歌，作者是1位老阿媽，號作卓緞（1901-），百外歲--a，iáu tòa tī花蓮，身體tsiânn勇健，囝孫lóng tī身邊陪伴。Bóng看bóng想1寡問題，耳孔邊soah lóng會無張持浮黃乙玲tsit條歌出來，「無字ê情批」。 

報紙lóng講卓阿媽m̄-bat字，竟然會曉寫詩唱歌、o-ló上帝，其實，阿媽是用教會白話字（POJ，台語羅馬字）寫詩，透過白話字書寫，真自然tio̍h kā伊心內ê歡喜、疼惜吟出來。 

Teh聽「無字ê情批」ê時，總是會想講，無beh phah開情批ê阿媽，定tio̍h mā像卓緞阿媽仝款，m̄-bat漢字，m̄-koh伊bat白話字，bat真濟代誌、有真濟智慧；對萬項代誌看會透、無計較。 

Mā有可能寫「無字ê情批」ê阿公，是用白話字寫ê，只是阿媽看無。總是，阿媽ê感情hē tsiok深，無beh phah開情批是因為驚受傷、無beh接受任何ê可能；m̄-koh經過tsiânn濟年了後，tsiah有法度真正m̄免phah開hit張情批。 

我家己iáu無像阿媽hiah「在」ê智慧，會tàng面對決定結束ê情義，不過，總算ta̍uh-ta̍uh會tàng無去phah開1寡物件，kan-tann tio̍h kā秘密iōng全部ê白話字寫tī另外1個所在。無定tio̍h真久以後，家己變作1個阿媽ê時，有人phah開hiah-ê秘密，希望怹bē講「阿媽m̄-bat字」， 而且會講，hiah-ê秘密，hiah-ni̍h媠。

Chū-án-ne, góa piàn-chò chi̍t-ê am-khàm chin chē pì-bi̍t(秘密) ê lâng. Chi̍t-hāng goân-in sī té chin chē lâng ê pì-bi̍t, put-chì sī sin-piⁿ ê pêng-iú, koh ū chē-chē iáu bô ki-hōe hông khoàⁿ-tio̍h ê bûn-jī, kó·-chá-lâng ê pì-bi̍t; koh-nā sin-piⁿ ê lâng, khah chē sī chi̍t-kóa sīu-siong ê sim-chêng, sīu-tio̍h só·-ūi “Chèng-gī”(正義) ê lâng siong-hāi ê sim-chêng, hiah-ê kì-tì tī in chit-sì-lâng lóng hú-bē-tiāu, tī góa mā sī. Tio̍h chhiūⁿ sè-hàn lâu-lo̍h ê to-hûn(刀痕), bē-thiànⁿ, ū chi̍t-ji̍t, kì-tì gîa khí-lâi, ná chhiūⁿ ū sî-kan ê hoe̍h tiām-tiām teh lâu.  

Chêng chi̍t-chām khòaⁿ Rollo May ê “The Courage to Creat” (創造的勇氣),  che-sī ū chi̍t-piàn khì Lâm-chng (南庄) chhōe chi̍t-ê gē-sut-ka Sèng Chèng-tek (盛正德), i ū sía-kòe chi̍t-pún chheh, hō·-chò《以畫療傷：一位藝術家的憂鬱之旅》 , góa chin pòe-ho̍k i ê ióng-khì kap i chin iù-lō· (細膩) ê sim-kéng. Hit-ji̍t tī in chhù khoàⁿ Eleni Karaindrou(安哲羅普洛斯) ê “Eternity and a Day” (Éng-oán ê chi̍t-kang; 永遠的一天) , tú-hó Sèng lāu-su kóng khí Rollo May(羅洛‧梅) chit-ê sim-lí tī-liâu-su (心理治療師), tio̍h-sī án-ne, góa chiah-ē khì khoàⁿ Rollo May e chheh. Liáu-aū góa koh khì khòaⁿ　Sèng lāu-su sàng góa ê oē-chheh (畫冊) , lāi-bīn ū i ín-iōng Rollo May ê ōe : 「有創造力的人最特別的地方，是他們能與焦慮一起生活，他們甚至願意付出很高的代價，如身陷不安全感、過度敏感與無招架之力的困境，只是為了獲得『神性的瘋狂』這項禮物。他們看到『非有』時，不會跑開，反而要上前遭遇它，與它搏鬥，強迫它產生出『有』。」góa mā kā chit-kù-oē sàng hō·「Thiⁿ-sài」(天使).  

Chòe-kīn mā lóng teh khòaⁿ　i ê chheh, chin-chhiūⁿ sī “Power and Innocence : a search for the source of violence”(權力與無知). kî-tiong siōng kah-ì ê sī “Love and Will” (愛與意志)  i ùi chi̍t-khóan o·-àm kap kong-bêng tang-tiong, iōng chin lí-sèng koh kám-sèng ê chhiú-hoat khí ké-soeh lâng ê jio̍k-tiám án-choáⁿ sán-seng, hō· lí ke chin liáu-kái ka-kī, hō· lán ê Aì kap Ì-chì bē in-ūi sî-tāi ê hun-liat soah thiah-lī, hō· lâng tī tiông-sin jīn-sek Aì kap Ì-chì ê tiong-kan, chìn-chi̍t-pō· koh chhòng-chō chhut lēng-gōa chi̍t khóan sin koh chiàⁿ-bīn, liāu-sióng bē kàu, chin tōa ê le̍k-liōng.

Lâng pún-lâi tio̍h ū o·-àm ê chi̍t-bīn, ū chin chē pì-bi̍t, éng-éng sī m̄-káⁿ bīn-tùi khah chē. In-ūi sèⁿ-mīa éng-éng tio̍h(必須) / tio̍h-sī(就是) chiah-nih bí-hó, in-ūi iáu koh siūⁿ beh kái-piàn, in-ūi kài-chío koh khak-tēng ka-kī ê sèⁿ-mīa iáu-ū ióng-khì, jia̍t-chêng iáu-bōe sio liáu, koh ū khùi-lat tùi hi-bāng ê hong-hiòng kiâⁿ khì, chai-iáⁿ chiām-sî bô hoat-tō· kái-piàn, mō·-tio̍h tūi-lo̍h ê gûi-hiám, chū-án-ne, ka-kī mā piàn-chò chiok chē pì-bit, tû-khì tī pì-bit tiong koh khah jīn-sek ka-kī, mā teh ha̍k-si̍p kā pì-bi̍t lâu-tī sim-koaⁿ lāi.

Koa̍t-tēng 1 hāng tāi-chì su-iàu chin tōa ê ióng-khì. Chit-chām-á lóng tī tiûⁿ-tû ê chōng-hóng lāi-bīn. Hit-khóan chêng-hêng tia̍t-pia̍t tī 1 ê lâng ê sî-chūn koh jú chām-gâm (more than嚴重). Ū tang-sî, ná chhiūⁿ teh siūⁿ sím-mi̍̍h, soah koh thâu-khak bē tín bē tāng. Tùi 1 ê kāu bîn-bāng, put-sî ài iōng su-khó chèng-bêng chûn-chāi ê lâng lâi kóng, khang-khang ê kám-kak khó-pí sī sí, ū-hûn bô thé. Tiûⁿ-tû ē hāi sí chit-ê lâng, chhíu-tōaⁿ sī hō· i bô-hoat-tō· su-sióng.

Tú thak tio̍h 1 pún Hui-chiu ê sío-soat, Ben Okri sía ê The Famished Road (飢餓之路) ,(王維東譯序) lāi-bīn 1 kù ōe chiok chhim-khek: Ài pí sí khah oh tit. (愛比死更難) Hit-kù ōe chhut tùi chú-kak ê papa ê chhùi-ni̍h. In-ūi tĪ hit-ê kok-tō·, chha-put-to “Sàn-chhiah”(貧窮) sī sìⁿ-mīa ê choân-pō·, beh “Sí” chin kán-tan, beh kiù chit-ê kāu-pēⁿ ê gín-á tio̍h ài ū chin tōa ê “Ài”, in-ūi  “Ài” kà lâng tio̍h iōng-chīn khùi-lat hù-chhut i̍t-chheh, bô-lūn tāi-kè, si̍t-chāi khùn-lân.

Che kap góa ê chōng-hóng ū sím-mi̍h khan-liân? Ū, in-ūi kám-kak ka-kī bô “Ióng-khì” thoat-lī siong-pi, kìⁿ-chāi i teh “chìu”(腐蝕) ka-kī ê jia̍t-chêng kap su-khó.

Ài pí sí khah oh tit. Sàn-chhiah ê lâng bô hoat-tō· soán-tek in ê chhú-kéng, in tio̍h-bôa ê kan-taⁿ sī sin-khu, ia̍h lán leh? Ū lâng kóng, “Siōng tōa ê Sàn-chhiah sī Tham”(貪婪是最大的貧窮), tio̍h-bôa ê nā m̄-sī sin-khu, mā pí sí khah oh kòe.

The Famished Road chit khai-sí án-ne sía: 一開始有條河。後來河變成了路，路再向整個世界四處延伸。因為曾經是河的緣故，路老是餓著肚子。Chiok súi. Che sī chit pún Mô·-hoān sía-si̍t (Magic realism) ê Hui-chiu sió-soat, iōng sîn-kòai ê sía-hoat khau-sé (irony) Si̍t-bîn, sía chhut hit-tè O·-sek thó·-tē ê Kim-sek hi-bāng ê sío-soat. Chin si-ì (詩意), mā in-ūi su-liām ê iân-kò·, chin chē bûn-jī thak-khí-lâi lóng chhiūⁿ teh thak À-chêng sío-soat ê sim-chiâⁿ.

Ū 1-ji̍t hām ti-ti kóng tio̍h ma-ma, ōe-kù tang-tiong, hoat-hian ka-kī kong chhut chit-kù-ōe: góa kám-kak ma-ma sit-khì “ài lâng” ê lêng-lek. Kóng soah, góa tī sim-lāi chhiak 1 tîo, nah ē án-ne? ná ē án-ne? góa mā chiok kiaⁿ ū 1 ji̍t ka-kī mā piàn án-ne. Aū-lâi, koh iōng chit-khóan siūⁿ-hoat sòe-hok ka-kī: Chí-sī iáu-bô lī-khui siong-pi ê “Ióng-khì”. (猶無離開傷悲的勇氣）