Bichhin｜港邊惜別

Tsā-hng，kā tsit寡舊ê剪報、講義、批信（尤其批夭壽tsē）、日記、雜記簿仔、社團DIY ê海報、宣傳單，1疊1疊hia̍t-kak（丟掉），過程中不時teh想，我ná像lóng bē m̄甘。其實，會，tsiok tsē物件beh tàn掉，lóng tsiok m̄甘。特別是社團ê物件，提tī手，koh是「青春正盛」ê氣味，lóng無退。Koh有幾nā張「情詩」（而且字lóng tsiok媠），看tio̍h愛笑，因為m̄是學弟，tō是比我khah細漢。是teh按怎？總是，橫直，生命本來tō是án-ne，有ê物件留lo̍h來，khah輸囥tī心內；有ê nngē beh la̍k-tiâu-tiâu（握緊），顛倒無jú緊。所以，感覺用bē tio̍h ê，tō提去「回收」，tsiah-ê，lóng是「紙類」。原來，「成長」ê分類，是「紙類」。

了後，猶原無想beh讀冊，又koh睏bē去，開始整理「thàng-sù」（衣櫥），kā tsiok tsē衫mā kā「hiau hiau出來」（翻掀出來），「款」做kui堆，按算mā beh「回收」。Tī「thàng-sù」ê下底屜（thuah）看tio̍h 1項物件，hōo我看tsiok久。是阿媽hōo我ê珍珠phiu̍ah鍊（項鍊）。

阿媽hōo我ê珍珠phu̍ah鍊（項鍊），若無記m̄對，是伊60歲生日ê時，阿姑送伊ê，已經10幾冬有--a。進前，阿媽偷偷提來送我，m̄-koh我彼陣細漢，感覺phu̍ah鍊siunn「老氣」，無想beh掛，tō先收起來。但是koh m̄敢hōo媽媽看tio̍h，因為媽媽kap阿媽ê關係無kài好，媽媽總是無愛hōo我去找阿媽、無愛我提阿媽ê物件，自按呢，我kā phu̍ah鍊藏tī「thàng-sù」siōng下底屜。後來搬厝，我mā kā囥tiàm「新thàng-sù」siōng下底屜。 

大學、研究所lóng tī外口讀，轉來mā khah無去「tshiau」、無去「píng」（翻箱倒櫃），一直到tann。看tio̍h「珍珠phu̍ah鍊」iáu-koh白白光光，m̄-koh，疼我ê阿媽tī幾冬前，已經過身。Kui-ê暗時，頭殼內lóng是阿媽。出世到讀「io-tsí-ián」（幼稚園），我lóng是阿公阿媽tshūa，lóng kap in睏。Khah早beh睏進前，阿媽有時teh等阿公轉來，伊lóng會唱1條歌hōo我聽，伊講伊會曉講日本話、唱日本歌，講日頭若落山，放學--a，人kap鳥仔lóng愛轉來厝--a。所以伊ta̍k暝會唱tsit條歌hōo我聽，〈夕焼け小焼け〉， 這mā是我學會曉ê第一條日本歌。 

彼條「珍珠phu̍ah鍊」tsiok媠，我tsit-má掛起來，mā比細漢ê時掛，有khah媠款。我mā轉來厝--a，像阿媽講ê，「日頭若落山，放學--a，人kap鳥仔lóng愛轉來厝--a。」

Khui chit-e sin-siu, si ui-tioh koh khah bi-ho e bi-lai.（開這個新岫，是為著koh較美好e未來。）Chia beh iong goa u-chit-tiam-a chhiⁿ-hun,（Chia beh用我有一點仔生份，）m-koh koh hiah-nih sek-sai e gi-gian,（m-koh koh遐呢熟悉e語言，）ki-lok goa siong chhim-khek kap hi-bang e sim-cheng.（記錄我上深刻kap希望e心情。）I-au , kui 10 ni i-au, na u lang mng khi, si an-choaⁿ e “an-ne”,（以後，幾10年以後，若有人問起，是按怎"安呢"，）goa kho-leng ma bo ki-hoe ke-soeh,（我有可能嘛無機會解釋，）m-koh, goa e ti leng-goa chit-e sou-chai bi-bi-a chhio,（m-koh，我會ti另外一個所在微微仔笑，）kong, “Long si ui-tioh ai e ian-kou”.（講，"攏是為著愛e緣故"。）

“Long si ui-tioh ai e ian-kou”（"攏是為著愛e緣故"）Chit-ma tioh beh khai-si chun-pi.（Chit-ma著beh開始準備。）Ti chia e sia khah che pi-bit e taichi,
（Ti chia會寫較濟秘密e代誌，）ma hi-bang etang khoaⁿ tioh "ì-gōa" e pi-bit:)（嘛希望會凍看著"意外"的秘密。^^）