Bichhin｜港邊惜別

佇遮，食過上好食、上鮮（tshiⁿ）ê日本壽司、濟濟項日本料理；當然，抑是台灣菜khah慣勢。去過真濟所在tshit-thô；佇2度ê天氣食明治冰淇淋、佇半暝12點0度以下泡露天風呂（溫泉），佇日本人ê厝過年、食"年越飯"，mā攏是毋捌有ê美好ê經驗。

總是，上tsiap做ê代誌是食家己煮ê台灣菜、包明仔載ê便當；食飽屈佇"こたつ"（華語號作暖桌，台語應該會當號作烘爐桌仔^^）邊仔，ná看電視ná讀冊。Kap濟濟iáu佇台灣拍拼ê鄉親朋友比起來，現此時ê我，thang算是生命中間，心情會當上"清閒"ê日子。

彼日，甚物攏無煮，tsū 3項醬菜配飯。1項是美虹姐（賴青松in某）家己做ê、佇guán出國進前送guán ê酒釀豆乳（真正足甘、足好食）；1項是日語學校班上ê韓國人送guán ê、in老母家己做ê韓國泡菜（日本人做ê正經袂比tsit）；koh 1項是去上野買ê台灣鹹鴨蛋。

這就是上kài幸福ê滋味：）

真可惜，無法度kā彼工ê月光hip起來，實在足媠。

會記前一陣仔，tī網路看tio̍h台灣新聞mā有講tio̍h微笑月亮；2粒星下跤是微微仔笑ê月娘。結果，guán tī東京，beh去日本老師 in tau食"年越飯"、配"紅白歌合戰"ê路裡，mā有看tio̍h足光足媠ê月娘，不過，koh khah細眉，iah陪伴伊ê，賰1粒星niâ。雖bóng比微笑月亮看起來有khah稀微，mā是hiah-nih光、hiah-nih迷人。

年越飯食了、"跨年"ê彼1刻（台灣時間是11點），guán tī電車站月台內面ê待合室（khah燒）等車，惦惦仔hāⁿ過tsit 1冬。若tshan像teh眠夢。

行轉厝ê路nih，猶原是仝款ê月光kap彼粒星作伙行，不管未來按怎，活tī目(ba̍k)前，就是幸福。

續來ê路，就算tī暗暝中，mā beh像彼日ê月娘，hiah-nih光明。

佇台北ê上尾工，等人、等時間，淡薄仔tsak，淡薄仔毋甘。

房間清kah空空，liâm-mih會kā鎖匙還予台北。猶無法度整理tsit 1冬ê記持，kan-taⁿ是目1睨就過，像tsit-má仝款，無聲無說。

這幾日，有機會騎oo-too-bai（機車），看khah濟台北ê景，媠ê、bái-ê攏無要緊，總是，佇心裡tsiah小可有佮意tsit-ê城市ê感覺，因為khah了解ah，因為，beh離開--a。

後禮拜ê今仔日，就佇東京街頭行踏，向望tsit-ê續來走找ê過程，佮意ê感覺會來了khah早。

台北，さようなら。

活動時間：2008年5月31日下午14:00~17:00 (中部場；台中中山醫學大學)
邀請詩人：江秀鳳、陳胤、陳潔民、康原

活動時間： 2008年6月7日下午14:00~17:00 (南部場；國立台灣文學館)
邀請詩人：黃勁連、陳建成、方耀乾、周華斌

活動時間：2008年6月29日下午14:00~17:00 (北部場；台北NGO會館)
邀請詩人：李勤岸、陳明仁、張芳慈、呂美親
(Guá tī tsia, beh khuànn guá ê lâng tō lâi ooh)

詳細資訊kap報名（網路報名）

...繼續閱讀

　　我一上車，講麻煩到永和，hit-ê計程車司機隨越頭：「你有高雄腔喔！」（我毋是高雄人ah...）。自按呢，話頭就繼續踏落。伊講，駛20幾冬ê車，永過就走車，就趁袂少ah，毋過少年ê時晃蕩，愛tsàm酒家、趁ê隨啉去；這幾冬才有賰寡。伊問我，你敢知是按怎？我講，有家庭ê關係啊！伊應講：按呢你有巧！

　　才幾工無轉台北，就袂適應。濕kah像啥物物件鬱佇遐tháu袂出去e款式。司機ná駛ná講，台北就是án-ne，規年thàng天攏teh落雨，阮早toh慣勢ah！

　　到ah！暫住e所在。冷ki-ki ê台北。無法度佮意，有一日，定著袂koh需要伊、上好量早離開ê空間。

　　想起過年轉去厝裡彼幾工，佇叔伯阿兄in兜泡荼，瓜子剝一晡去ah，天無烏陰，mā袂感覺hip，恟恟日頭光暗去，哥哥講，「啊！雲koh 壓/押(ah)落來ah！」

　　想起過年轉去厝裡彼幾工，姑婆來厝裡坐，講阿媽古早ê故事，講啥物人心酸ê時tshîng在去找伊tháu，koh講kah咳喉（khek-âu，哽咽）。

　　想起過年轉去厝裡彼幾工，親tsiânn濟濟轉來佇闊闊ê埕斗teh擠燒(kheh-sio)。足久無看ê人，我一時袂赴出嘴，毋閣怹攏相爭目睭金金相(siòng)，講我變無仝ah！

　　有啥物變ah？敢koh有啥物無變？有啥物永遠袂變？變ê敢會khah好？定定我mā目睭金金kā相：你猶原koh是一個囡仔，無變。

　　想起過年轉去厝裡彼幾工，暗時有khah寒，總是，欲晝仔，會有日頭照佇目前，毋免僥疑，伊就直接nng入心內。

　　Tsia，逐不時看著ê，是室內ê日頭，可比彼台人工ê烘爐，溫暖佇身軀，suah無法度燒熱入去心肝芛仔內面。

2008/02/14

口試了後，我一直想tioh林慧萍。我e口考教授其中1位是許俊雅老師（而且口試前1工伊生日，實在真失禮。），我真佮意許老師，m-koh一直無機會正式kap許老師熟悉，tu好tsit遍口試拜託伊來鬥相工，對伊完全印象無仝，kui-e翻過（ping-kue）。因為許老師出真濟冊，long是「大部頭」e著作，伊是日本時代台灣小說e「權威」，對新文學kap傳統文學研究long真深入；戰後e文學ma真掌握；伊做學問e態度tsiok「嚴謹」。我long掠準伊是真嚴肅e人，結果，哈哈！伊是tsiok活潑、tsiok古錐、tsiok大方、tsiok謙虛koh笑詼e人。開講e時才發現伊tsiok「好笑」（風趣）；後來，送許老師去停車場e時，伊kui路一直講話，tsiok親切，我才想tioh：對neh！伊kap楊翠老師是好朋友！莫怪！哈哈。想tioh林慧萍，因為感覺許老師e氣質kap林慧萍tsiok像（面顱仔是無像，但是long美女），溫純柔軟koh真媠。許老師笑起來e時ma真媠、真溫柔。

昨昏ma tu好轉tioh電視「國光幫幫忙」訪問林慧萍（其實我不是很關心國家大事、對政治也沒什麼興趣，大家別老是誤解，哈！我最常看的節目是吳淡如、謝震武的「今晚誰當家」。呵），知影伊beh辦演唱會a，而且，林慧萍雖然看起來溫純，ma是真「大而化之」e人，講話氣質真好，m-koh ma真好笑。我就koh想tioh許俊雅老師啊，哈：）雖然我無算是林慧萍e歌迷，（5年級e才是聽伊e歌大漢年代e吧？我6年級喔），m-koh阮同學知影我興聽台語歌（這位同學妳很久沒有和我聯絡了，要自覺一點唷。），進前bat寄tsit首〈春風若來〉，實在真好聽！歌詞聽起來淡薄仔苦苦，m-koh歌聲kap音樂long真「舒服」！（ma像許老師予人e印象，真溫暖。）

許俊雅老師簡介：台灣台南人。國立台灣師範大學國文研究所博士，現任該校國文學系教授。致力於台灣文學研究，曾獲巫永福文學評論獎。著有《日據時期台灣小說研究》、《台灣文學散論》、《台灣文學論－從現代到當代》；編選《無語的春天：二二八小說選》等數十本書。

 說好見面2007林慧萍演唱會

...繼續閱讀

阮弟弟慣勢上暝班進前kap我開講幾句，tsit張相片是我口試了後幾na日teh修改論文，因為注神ti 1個思考面頂，無啥tshap伊，伊就theh相機邊仔sng，趁我無注意e時ka我hip e。這是阮弟弟e表現方式，替我留記持e方式。

去 台北做khang-khue其實考慮kai久，直直反起反倒，佳哉新e頭家kap新e室友long對我真好，隨時等我家己想清楚，做出最後e決定。所以， tu畢業我就有1個頭路、1間房間tsuan 好等我；無什麼lang縫，生命e腳步行be tsiok急，m-koh接續kah真順序。考慮真久e原因主要是「捨不得」。M是「m 甘」，是「放be落」。這2項代誌無仝，「m甘」是心理上e，「放be落」是行事上e。Tsit層代誌其實m是tsiah-nih簡單，因為某1個程度來 講，「捨不得」若像是1款「美德」，tsit-e莫名其妙e社會e「不成文規定」。

Tsit幾工beh開始「打包」，iau-boe開始 款e時，teh想講beh tsah什麼、無beh tsah什麼，hiong-hiong有1種其實會凍long免款e想法，只要ka tsah筆記電腦捾leh，1個「背包」phaiN leh就會使行！譬如講，我真愛冊（看冊、印冊、買冊），相片後面tsiah e冊是kan-taN是tsit間房間e其中1部分。原本我想講，搬去台北beh ka所有e冊ma寄去lih，後來想想leh，ma免，住「台灣分館」附近，koh需要tsah冊mah？當然，這long是後來e心理建設。

Ka 口試初稿寄出去hit日，hiong-hiong感覺tsiok空，m是tshun殼，就是脫1領皮e款式！He是我m-bat有e感覺，不過無維持 kai久，睏1醒起來就過。永早，beh離開厝e時，會「m甘」，tsit-ma完全be；be m甘，ma be放be落；m是無感情，是接受家己生命e型態teh改變e事實。這是學真久e代誌：「捨得」，阮弟弟教我真久、我tsiah學會曉e代誌；an- ne，什麼 long會是新e、好e開始。（M-koh，tsit遍離開厝，我siong「捨不得」e，suah是阮弟弟。）

所以，我會tsah啥去台北？除了NB，幾本感覺有意義e冊，koh有1箱CD。後來，對我來講，「聲」比什麼koh khah重要。（koh，戴耳機：讀冊、寫物件e時，一直long慣勢「有聲」，1款證明存在e方式。面頂e相片應該是teh聽張睿銓。嘻嘻。）

（雅智、張睿銓、美親；其實....我掠準彼工阿弟仔會去...........） 

會記2004年熱天，我tī宿舍一直聽tsit條歌、聽kui工lóng bē siān（厭倦）；ná聽koh會想beh跳舞。Hit-tsūn iáu是「新聞台」時代，無像tsit-má有「YouTube」thang隨時看MTV，所以tī宿舍看kah kài爽，mā bē-tàng kap弟弟作伙看，實在真可惜。（因為細漢ê時，阮媽媽mā是叫我阿醜，阮弟弟是人人lóng叫伊「緣投仔」～，聽tio̍h tsit條歌感覺夭壽「貼切」koh親切，哈。相片是2002年tī阮厝客廳, by Chi-ki. Hit-tsūn我iáu無近視neh ^^）2007年熱天，koh聽tsit條歌，感覺mā是tsiok古錐、tsiok好聽～（若像in仝款，過30歲mā koh有tsit款「赤子之心」，實在tsiok好～～）

尤 其了後對「台美人」(Taiwanese American)有khah濟了解，tsit kui冬愈來愈佮意聽麻吉ê歌，聽in ê台語會注意腔口，有保留台中腔，koh有厚烈ê台美腔：）另外，根據我ê觀察kap訪問結果，「台美人第2代」其實有2種，1種是講華語，雖然父母mā 有台灣意識，但是爸爸媽媽感覺華語是趨勢、khah普遍，所以囡仔去上ê是mā中文學校；若是第2代講台語，比例上稍khúa khah少，父母ê台灣意識khah堅定，才會kan-tann教囡仔台語，無教華語。黃立成、黃立行in就是第2種，所以歌詞內面講：細漢就愛台灣- -a（不過，mtv有，mp3就無tsit句。）。（當然，hit-tsūn愈濟是所謂ê外省人第2代去，所以父母愈無可能教囡仔台語。In hit-tsūn mā m̄是叫「台美人」，是叫「華僑」--ABC）.....來聽歌，心涼脾肚開^^，koh，麻吉另外1條「台灣之子」tsiok讚喔。

...繼續閱讀

因為1寡需要ê關係，去chhōe進前寫過ê台語散文，我寫ê台語散文真少真少，chit篇是我tú學台文ê時所寫ê，練習ê作品，koh提出來讀，感覺淡薄歹勢，不過，mā會tàng kap逐家分享，所以chit-má kā改作「漢羅」，無定著恁mā會tàng開始「練習」--a o̍·h。

--------------------------------------------------

由林正盛所導演ê電影《天馬茶房》內面，ta̍k-ê siōng會記得to̍h是片尾hit句：「未來還是一直來，一直來…」，尤其對chit句話總有1種茫茫渺渺、淒慘悲涼ê感覺，ná親像家己ê「運命」m̄是掌握tī家己ê手底，放hō·「命運」ê腳步，1步1步，行到to̍h位算to̍h位，自án-ne過1世人。〈幸福進行曲〉tio̍h ia̍h-bōe唱soah，槍聲tio̍h爆破所有ê希望；雖然，男主角阿進（林強演）tio̍h槍了後，喙底還teh唸講「bē使放棄…」，「天馬茶房」戲soah，看戲ê人，目屎拭拭leh，猶koh是茫茫渺渺面對「未來」。

Chit齣電影，除了講tio̍h日本時代尾期，因為大東亞戰爭，定定「tân水螺」（拉警報），使台灣人不時to̍h leh驚惶、避難，無法度過tio̍h原本自在ê日子；亦講tio̍h「光復」了後，台灣人kā「三民主義，吾黨所宗」－－所謂ê「國歌」唱作「sā麵煮麵，穩當妥當」ê「心聲」、koh kā「青天、白日、滿地紅」ê「國旗」面頂，hit粒刺目ê日頭畫去西pêng等等，hiah-ê hō·人感覺m̄知beh哭ia̍h是beh笑ê代誌；更加將「二二八」ê引火線，歐巴桑林江邁hō·查洋菸ê「長官」彈死hit幕演出來，然後，kan-taⁿ用字幕phah出台灣受過幾lo̍h ê外來政權統治，二二八了後，台灣tio̍h進入40冬ê戒嚴時期，螢幕變黑，「未來」to̍h án-ne一直來。事實上咱真濟人，早tio̍h kā「歷史」放bē記得，ng3望kā幸福寄託tī「未來」，kám講，幸福to̍h真正會「來」？

講起台灣ê歷史，實在hō·人感覺真沉重，新1代ê少年人若聽著老1輩ê人teh講chiah-ê代誌，m̄是hiàⁿ頭，著是ia̍t手，講過去tio̍h過去liáu à！咱tio̍h-ài看「未來」chiah有希望！其實，chit齣電影，hō·我感動ê所在chiâⁿ濟，其中有1幕我印象特別深：男主角阿進用「台語」ná寫ná唸hit張回hō·女主角阿玉（蕭淑慎演）ê批，伊講：「暖玉，真歡喜收tio̍h汝ê批，南部ê春天無像台北hiah-ni̍h寒…人有時chūn會受tio̍h環境ê束縛，1寡代誌無法度改變，tio̍h親像講每1個人1出世，出世tī sím-mi̍h款ê家庭，有sím-mi̍h款ê父母，出世作台灣人作日本人還是作中國人，這lóng m̄是咱會sái決定ê，1出世tio̍h註定好好。」目屎m̄知東時tio̍h ùi目睭內1循1循流lo̍h來，ká-ná家己mā有hit種身不由己ê遺憾，m̄-koh，kap怹比起來，我應該算是1個幸福ê人chiah對，至少，我活tī 1個太平ê時代；然後，我聽著1首koh 1首，少年人感覺「俗」（sông），我soah是感覺真親切ê歌，he是較早阿公阿媽真愛唱ê：「滿面春風」、「丟丟銅」、「港邊惜別」…。
...繼續閱讀

我今仔日kā手機ê「來電答鈴」koh換1條歌。我是hit款無啥「形於色」ê人（當然，mā是看情形。有當時mā kài直，kā想法表現出來了，lóng會家己tsiok bē爽，感覺家己tsiok白目。）

M̄知逐家lóng按怎「換心情」？「換心情」大部份lóng是想beh kā歹ê心情換掉，（其實to̍h是kā注神súa去別位，mái hōo家己tī無爽快ê情境ni̍h愈hap愈深。）永過我若想beh換心情，m̄是去電頭鬃（電hōo真奇怪，可比有1遍是電「爆炸頭」，若無to̍h是ka頭毛（ka hōo kài短）。

頭毛是1招，koh來to̍h是買物件，錢kā開開leh，像kā無好ê心晟tháu-tháu leh，有新衫、新ê保養品，「起毛」ke真好。Iáu-koh 1項是會hām朋友作伙去做ê：to̍h是去「KTV」唱hōo歡喜，「kainn-kainn」（呼喊、發洩）leh，直接koh siak-phah（乾脆）。

Tsit 2冬，我khah少按呢作--a，錢lóng開tī買冊khah濟，頭毛mā bē愛koh像khah早tsiah作怪，（ká-ná自研究所以來，m̄-bat khiû毛過--a），koh發現1個「經濟實惠」ê「花小錢，換心情」（下載費15，月租30）ê方法，to̍h是「來電答鈴」。M̄-nā省錢，koh有「KTV」ê效果（莫名其妙ê移情作用）。

自開始用來電答鈴到tann，我換tsiok濟歌--a，曲風無一定，m̄-koh差不多lóng台語歌。伍佰、秀蘭瑪雅、江蕙、林強……。

昨昏kā活動辦了--a，koh beh進入性命中另外1個重要ê坎站，感覺會使koh來換1個心情。最近真kah意江蕙tī新專輯《搏杯》（江蕙部落格）內面1條歌：〈愛哭的時陣〉。曲真溫柔詞真媠，「思念親像九月雲，罩tī故鄉小山崙，你若想我，m̄-thang通teh黃昏，he是我，上愛哭ê時陣」。淡薄--á悲傷，m̄-koh意境實在有媠tio̍h。Tú出無外久ê專輯to̍h有來電答鈴，正經是有效率ê社會：） 

「愛哭ê時陣」，哈！親像細漢阮媽媽定定kā我罵罵leh，tsiah teh笑我愛哭。大漢了ke真活潑（tio̍h用 「重力加速度」ê公式去算倍數），mā khah罕得tī人面頭前哮。M̄-koh其實猶原真愛哭，媽媽講ê，iáu是lóng無改變。

M̄知恁lóng按怎換心情，換1個「pih-tsah」（合適、俐落）ê心情？

2007/03/26

...繼續閱讀