Bichhin｜港邊惜別

Tse應該是黃乙玲ê歌其中我siōng kah意ê 1條，感覺1條簡單ê歌詞，背後有1段美麗ê故事，hūan勢會tàng寫出1齣劇本、1部小說、1首長長ê詩。最近teh看1寡白話字詩歌，作者是1位老阿媽，號作卓緞（1901-），百外歲--a，iáu tòa tī花蓮，身體tsiânn勇健，囝孫lóng tī身邊陪伴。Bóng看bóng想1寡問題，耳孔邊soah lóng會無張持浮黃乙玲tsit條歌出來，「無字ê情批」。 

報紙lóng講卓阿媽m̄-bat字，竟然會曉寫詩唱歌、o-ló上帝，其實，阿媽是用教會白話字（POJ，台語羅馬字）寫詩，透過白話字書寫，真自然tio̍h kā伊心內ê歡喜、疼惜吟出來。 

Teh聽「無字ê情批」ê時，總是會想講，無beh phah開情批ê阿媽，定tio̍h mā像卓緞阿媽仝款，m̄-bat漢字，m̄-koh伊bat白話字，bat真濟代誌、有真濟智慧；對萬項代誌看會透、無計較。 

Mā有可能寫「無字ê情批」ê阿公，是用白話字寫ê，只是阿媽看無。總是，阿媽ê感情hē tsiok深，無beh phah開情批是因為驚受傷、無beh接受任何ê可能；m̄-koh經過tsiânn濟年了後，tsiah有法度真正m̄免phah開hit張情批。 

我家己iáu無像阿媽hiah「在」ê智慧，會tàng面對決定結束ê情義，不過，總算ta̍uh-ta̍uh會tàng無去phah開1寡物件，kan-tann tio̍h kā秘密iōng全部ê白話字寫tī另外1個所在。無定tio̍h真久以後，家己變作1個阿媽ê時，有人phah開hiah-ê秘密，希望怹bē講「阿媽m̄-bat字」， 而且會講，hiah-ê秘密，hiah-ni̍h媠。

黃乙玲〈無字的情批〉

作詞：許常德     作曲：游鴻明 

阿媽m̄-bat識字，但是伊bat真濟ê代誌；

伊講閃電是天ê鎖匙，鎖匙phah開有雨水。
阿媽m̄-bat字，但是有1張情批寫hōo伊；

經過幾10年m̄-bat拆開，伊講寫字不如相思。

我愛ê伊beh來離開，伊講孤單siōng適合伊；
無留半字tio̍h斷了過去，m̄甘心付出為伊哮kui瞑。
我愛ê伊beh來離開，伊講孤單siōng適合伊；
山盟海誓iā失去意義，情批lóng無字癡心變青暝。
我kā阿媽問，阿媽ê情批是寫siánn-mi̍h；

伊講情人beh愛無勇氣，才來用字騙情義。

我愛ê伊beh來離開，伊講孤單siōng適合伊；
無留半字tio̍h斷了過去，m̄甘心付出為伊哮kui瞑。
我愛ê伊beh來離開，伊講孤單siōng適合伊；
山盟海誓iā失去意義，情批lóng無字癡心變青暝。
我kā阿媽問，阿媽ê情批是寫siánn-mi̍h；

伊講情人beh愛無勇氣，才來用字騙情義；
伊講情人beh愛無勇氣，才來用字騙分開。