2007-10 月份文章 顯示方式:簡文 | 列表

October 28,2007

我ê碩論摘要

小女子ê碩論題目是「日本時代台語小說研究」,若有趣味ê朋友會凍去清華大學博碩士全文系統,keyin我ê名(呂美親),或者是「日本時代台語小說研究」就thang看PDF檔全文。請指教。(Beh看台語羅馬字,download台語字型,會khah好勢喔。)
===================
摘要

日本時代e台灣人處tī傳統kap現代社會交接ê過渡時期,雖bóng日本官方推sak國語政策,koh當時來自所謂「祖國」ê中國白話文chiâⁿ作潮流,致使日本時代ê台灣文學有bē少日文kap中國白話文作品;m̄-koh因為多數住民iáu處tī「台灣話」語境內底,所以mā自然產生濟濟台語文學,包括台灣人ê傳統漢詩、歌仔冊、民間歌謠、散文、小說、戲齣劇本等等。「日本時代台語小說研究」探討日本時代「台灣話文」無標準化ê種種困著內面,án-chóaⁿ成就出屬tī無仝階層ê台灣人ê「台語小說」。

比較起詩kap散文,台語小說會tàng承載當時phong-phài、真實koh活骨ê語言,咱tī伊所納入ê時代複雜性、愈曠闊歷史面相,看tio̍h kap過去討論台灣文學ê時濟濟無siāng ê歷史觀照。目前日本時代出土ê小說,白話字ê部分包括教會公報中tī 1910年代刊載ê短篇小說、賴仁聲kap鄭溪泮tī 1920年代出版ê長篇小說;漢字ê部分有新文學運動期間蔡秋桐、楊逵、賴和ê台灣話文小說,許丙丁kap鄭坤五以淺白文言所寫ê傳統小說mā陸續tī 1930、1940年代出版。作者無濟,小說文本篇數mā有限,m̄-koh咱tī chiah-ê小說中,看tio̍h宗教家ê人道精神、常民視野、西方文明ê介入;智識分子ê認同轉向、民族主義hâm社會主義ê書寫實踐;甚至有區域性ê在地神話kap集體性ê歷史記憶teh重新起造。Thang講日本時代台語小說因為有無仝價值觀ê書寫系統,已經創作出真多元豐富ê書寫觀點。

透過文本研究、ùi khah久長ê歷史意義來看,台語文學tī戰前留lo̍h 2個文字書寫傳統:西方基督教chah來ê白話字傳統、漢文化(儒教為主)ê漢字傳統;雖然當時影響程度lóng有限,mā khah屬tī分別進行ê狀況,但是,亦有相當ê推廣kap結合。Chit「2個傳統」tī戰後初期正式kap作伙,對戰後台語文(學)發展,有無法度議量ê現象kap真大ê力量,chiâⁿ作現時「漢羅」書寫系統累積ê文學成績,koh影響客語文學、原住民文學因為漢字無法度完全傳達chiah-ê語言ê讀音kap內涵,mā有漢羅合寫ê趨勢,hō·多語族ê台灣文學ke愈有真正多音開闊ê未來。「日本時代台語小說研究」以siōng傳統ê分析方式解說文本,ng望hō·「台語文學」研究有1個khah歷史tek ê思考根據,mā提供「台灣文學」有khah新ê價值參考kap美學判斷。

關鍵詞日本時代、台語文學、台語小說、台灣話、漢字、羅馬字、白話字、台灣話文、漢羅、賴仁聲、鄭溪泮、蔡秋桐、楊逵、賴和、許丙丁、鄭坤五。

Posted by bichhin at 12:10回應(0)引用(0)自由夢

October 25,2007

【grotesque】月餅面


這是風颱天(1006)hit日透早坐車ui台北去台中e中山醫學大學,ti研討會會場hip e,笑kah真自然(teh聽詩人陳明仁先生紹介我,伊講kah稍khua 「hàm」),m-koh因為是公共場合,be笑kah過頭「痟」,若無,平常時笑long無teh「節」(tsat) e。所以真kah意tsit張相片。(Bouchin hip e.)

到taN已經有2遍評論論文e經驗,tak遍評suah,long感覺淡薄後悔,雖然ma感覺家已應該是「不失幽默」,m-koh ma「不失機車」,有時仔koh tsiok「機車」。(評得太苛、太兇。)Bouchin幫我hip e另外幾張相片,我家己看long想beh ka相片內面e人「tsàm」。

頂一遍評論文是ti靜宜大學(6月),hit日ma是風颱天,沙鹿火車頭koh淹水。聲邦去ka我載e時,沙鹿e水tu退suah,土跤long是黃土色。Hit-tsun teh趕論文,聲邦一看tioh我就講,「喔!變瘦啊變瘦啊!m-koh面nah koh是肉餅面?哈!」(hit遍ma評kah tsiok「機車」...事後long驚發表人tsiok受傷...)

對啊!nah會按呢?面永遠tsiah大!正面像肉餅,側面像月餅:)

Posted by bichhin at 1:44回應(1)引用(0)grotesque

October 24,2007

【grotesque】瘋、歹勢。

這是今仔暗時,房間門鎖起來,聲音開盡磅,耳機掛leh,teh聽e歌。
〈瘋〉-阿弟仔 (現場版)

koh有另外一條, 〈歹勢〉(我無讀冊)-也是阿弟仔

這是我長那麼大,第一次很想抽菸。 2007/10/24

...繼續閱讀

Posted by bichhin at 21:05回應(0)引用(0)grotesque
 [1]