2007-8 月份文章 顯示方式:簡文 | 列表

August 30,2007

【秋天的囝仔】我已經無楓仔葉

逐個愛人仔,lóng是1個囡仔;逐個bat愛過ê愛人仔,lóng是1個死去ê囡仔。時間久久,mā會koh囥tī心肝底層、iáu有寡氣息仔tháu會出來ê所在;tī你無疑誤ê時手伸出來,用像beh討物食ê無辜表情,teh提醒tio̍h kā思念。

秋天又koh beh來,最近定定頭殼內teh唱1條歌:〈秋天的囝仔〉(收tī《秋天的孩子:思念卓奇》專輯,2005)。「狡獪」(káu-kuài)慣勢ê豬頭皮(朱約信)真少唱tsiah-ni̍h「深情」ê歌,為著紀念伊ê好朋友李坤城怹後生;傷心ê爸爸用歡喜ê心情,祝福伊ê囡仔飛去天頂變作天使,永遠kā怹看顧。甘願án-ne想起,有時楓仔葉是訊息,有時風聲是伊teh叫你。

伊beh離開ê時,我送伊1本絕版、真無簡單tsiah買著ê冊《我喜歡這樣想你》(胡 慧玲著),封面是鄭竹梅劃爸爸鄭南榕ê像。「Hō· góa án-ne siūⁿ lí.」我留tsit句話tī冊ni̍h予伊,伊問he什麼意思,我惦惦無話,tī心內kā伊應:「Hō· góa án-ne siūⁿ lí. 當作你mā已經死去,tī siōng美好ê時陣死去。」1個生命死去,就有1個天使出世tī另外1個世界看顧每1蕊暫時孤單、iáu茫茫渺渺ê靈魂。

Án-ne khah好,至少khah好;無koh tsē掛,無koh心疼(thiàⁿ)。Hiah-ê楓仔葉,我lóng有收tio̍h--à,收tio̍h to̍h好--à,我囥tī心內,án-ne tio̍h好--à!秋天的囝仔!我已經無楓仔葉;願你hiah-ni̍h良善。

秋天的囝仔 詞:李坤城,曲、唱:朱約信

...繼續閱讀

Posted by bichhin at 23:55回應(1)引用(0)戀愛夢

August 13,2007

【薛慶煌】Ti日本教台灣話e少年人

薛慶煌

前幾工ti自由時報看tioh tsit-e新聞感覺真歡喜,有tsiah少年e人m-na有語言意識,koh ti外國教台灣話。M知伊是用什麼「課本」教日本人台灣話。(當然,tsit-ma beh找台灣話課本無困難,不過伊是讀「化工」,所以對伊真好奇!)薛慶煌是目前福岡市台灣學生會會長,26歲nia(m-koh,我實在看be出來neh,哈!)伊e笑容真「陽光」,看起來是會tang「做大事」e人。

我會記我ti清華e時bat教tioh 1位自細漢住德國e台僑,伊貼公告講beh找教教台語e人,我就去應徵;伊會曉講中文,伊ka我講,轉來台灣了後,發見be曉講台灣話na像「混不下去」,所以想beh學台語。我hit-tsun其實m知beh用什麼課本教伊台灣話,感覺王育德e冊應該有適合,就用《台語初級》ka教。效果be歹,m-koh真可惜,教無外久,伊人就無留ti新竹,所以無koh教。

Beh koh講e是,tsit-e新聞hoo我想tioh 1960年代,王育德先生ti日本留學e時,ti hia教台灣話、寫台灣史kap台語冊,發行《台灣青年》;1970年代尾期,政治氣氛koh真緊張,國史館館長張炎憲老師ti東京大學留學,ma擔任會長,不過hit-tsun叫「中國同學會」,為tioh beh正名做「台灣同學會」,ma用真濟氣力,總算正名做「台灣同學會」。

時代teh改變,「台灣」e名有khah濟人知,處境ma是真艱苦,tioh-koh繼續拼。總是,有語言意識e人已經無濟,畢竟,政治獨立是一時e,語言、文化e釘根才是久長e。所以,看tioh薛慶煌所做e代誌,實在真歡喜。

...繼續閱讀

Posted by bichhin at 0:17回應(2)引用(0)自由夢

August 4,2007

【說好見面】許俊雅老師kap林慧萍

口試了後,我一直想tioh林慧萍。我e口考教授其中1位是許俊雅老師(而且口試前1工伊生日,實在真失禮。),我真佮意許老師,m-koh一直無機會正式kap許老師熟悉,tu好tsit遍口試拜託伊來鬥相工,對伊完全印象無仝,kui-e翻過(ping-kue)。因為許老師出真濟冊,long是「大部頭」e著作,伊是日本時代台灣小說e「權威」,對新文學kap傳統文學研究long真深入;戰後e文學ma真掌握;伊做學問e態度tsiok「嚴謹」。我long掠準伊是真嚴肅e人,結果,哈哈!伊是tsiok活潑、tsiok古錐、tsiok大方、tsiok謙虛koh笑詼e人。開講e時才發現伊tsiok「好笑」(風趣);後來,送許老師去停車場e時,伊kui路一直講話,tsiok親切,我才想tioh:對neh!伊kap楊翠老師是好朋友!莫怪!哈哈。想tioh林慧萍,因為感覺許老師e氣質kap林慧萍tsiok像(面顱仔是無像,但是long美女),溫純柔軟koh真媠。許老師笑起來e時ma真媠、真溫柔。

昨昏ma tu好轉tioh電視「國光幫幫忙」訪問林慧萍(其實我不是很關心國家大事、對政治也沒什麼興趣,大家別老是誤解,哈!我最常看的節目是吳淡如、謝震武的「今晚誰當家」。呵),知影伊beh辦演唱會a,而且,林慧萍雖然看起來溫純,ma是真「大而化之」e人,講話氣質真好,m-koh ma真好笑。我就koh想tioh許俊雅老師啊,哈:)雖然我無算是林慧萍e歌迷,(5年級e才是聽伊e歌大漢年代e吧?我6年級喔),m-koh阮同學知影我興聽台語歌(這位同學妳很久沒有和我聯絡了,要自覺一點唷。),進前bat寄tsit首〈春風若來〉,實在真好聽!歌詞聽起來淡薄仔苦苦,m-koh歌聲kap音樂long真「舒服」!(ma像許老師予人e印象,真溫暖。)

許俊雅老師簡介:台灣台南人。國立台灣師範大學國文研究所博士,現任該校國文學系教授。致力於台灣文學研究,曾獲巫永福文學評論獎。著有《日據時期台灣小說研究》、《台灣文學散論》、《台灣文學論-從現代到當代》;編選《無語的春天:二二八小說選》等數十本書。

 說好見面2007林慧萍演唱會

...繼續閱讀

Posted by bichhin at 3:17回應(4)引用(0)青春夢

August 2,2007

捨得:弟弟教我真久ê代誌

無法顯示錯誤的圖片「http://b0.rimg.tw/bichhin2007/5ed708bf.jpg」

阮弟弟慣勢上暝班進前kap我開講幾句,tsit張相片是我口試了後幾na日teh修改論文,因為注神ti 1個思考面頂,無啥tshap伊,伊就theh相機邊仔sng,趁我無注意e時ka我hip e。這是阮弟弟e表現方式,替我留記持e方式。

去 台北做khang-khue其實考慮kai久,直直反起反倒,佳哉新e頭家kap新e室友long對我真好,隨時等我家己想清楚,做出最後e決定。所以, tu畢業我就有1個頭路、1間房間tsuan 好等我;無什麼lang縫,生命e腳步行be tsiok急,m-koh接續kah真順序。考慮真久e原因主要是「捨不得」。M是「m 甘」,是「放be落」。這2項代誌無仝,「m甘」是心理上e,「放be落」是行事上e。Tsit層代誌其實m是tsiah-nih簡單,因為某1個程度來 講,「捨不得」若像是1款「美德」,tsit-e莫名其妙e社會e「不成文規定」。

Tsit幾工beh開始「打包」,iau-boe開始 款e時,teh想講beh tsah什麼、無beh tsah什麼,hiong-hiong有1種其實會凍long免款e想法,只要ka tsah筆記電腦捾leh,1個「背包」phaiN leh就會使行!譬如講,我真愛冊(看冊、印冊、買冊),相片後面tsiah e冊是kan-taN是tsit間房間e其中1部分。原本我想講,搬去台北beh ka所有e冊ma寄去lih,後來想想leh,ma免,住「台灣分館」附近,koh需要tsah冊mah?當然,這long是後來e心理建設。

Ka 口試初稿寄出去hit日,hiong-hiong感覺tsiok空,m是tshun殼,就是脫1領皮e款式!He是我m-bat有e感覺,不過無維持 kai久,睏1醒起來就過。永早,beh離開厝e時,會「m甘」,tsit-ma完全be;be m甘,ma be放be落;m是無感情,是接受家己生命e型態teh改變e事實。這是學真久e代誌:「捨得」,阮弟弟教我真久、我tsiah學會曉e代誌;an- ne,什麼 long會是新e、好e開始。(M-koh,tsit遍離開厝,我siong「捨不得」e,suah是阮弟弟。)

所以,我會tsah啥去台北?除了NB,幾本感覺有意義e冊,koh有1箱CD。後來,對我來講,「聲」比什麼koh khah重要。(koh,戴耳機:讀冊、寫物件e時,一直long慣勢「有聲」,1款證明存在e方式。面頂e相片應該是teh聽張睿銓。嘻嘻。)

(雅智、張睿銓、美親;其實....我掠準彼工阿弟仔會去...........) 


Posted by bichhin at 1:36回應(0)引用(0)青春夢
 [1]