＝＝＝＝＝＝＝＝＝＝＝＝＝＝＝＝＝＝＝＝
若住khah北爿leh，凡勢著ài離開--a。3月11號，猶（iáu）佇東京，猶suè厝佇學校附近。彼日，發生東日本大地動。Tú好來厝ni̍h修理瓦斯配線ê阿伯講，in早就慣勢地動，m̄-koh hiah大ê地動，是伊住東京60冬來頭1擺tn̄g著。續來，電視tō直直播送東北地區海漲ê畫面，無腳ê海漲tuì遠遠ê彼爿來，無人知伊會走hiah緊，住海邊ê人lóng bē赴走閃。Koh ná像電影，濟濟車kap厝，1時á就tuè烏烏糊糊ê海水ká入海底。Ia̍h guán外口，扑火車ê聲mā彈（tân）kah tsiok趕狂，聽講都心幾lō間有餐廳ê大樓火燒。Koh無外久，連媒體亦無法度掩khàm核電廠ê原子爐已經爆炸、熱度降bē落來、煙直直tsìng懸ê消息。過轉日，講降溫用ê汙染水mā擋bē落來，ta̍uh-ta̍uh流入大海……。
4月初，櫻花仝款hiah-nih媠，今年逐家人ài「自肅」，賞櫻ê人無過去hiah濟。
佇不安內底
佇驚惶內底，佇不安內底。雖然學校離災區猶tsiok遠，濟濟歐美ê學生tō無koh來，本底4月欲入學ê，mā lóng辦休學，留學生ê宿舍，有1半是空間（khang-king）。是講，guán學校ê台灣留學生lóng koh轉來繼續學業，離台灣khah近mā有，koh來是m̄甘離開，總是，至少無直接ê威脅。彼日了後，逐工猶不時會搖，心肝亦tuè leh浮起沉落，尤其伊若撿半暝來，就hoō人愈bē定著。大地動kàu-taⁿ滿5個月，電視亦定定會報導災區重建ê情形，但是濟濟地區輻射量siuⁿ懸，厝好好mā已經bē-tàng koh住人，住民被逼疏開，遠離in扑算1世人欲安身ê所在。代誌khah平靜liáu，政府允准集體轉去厝內提物件，不過in隨人著穿kah ná太空人仝款，包kah密周周坐遊覽車回鄉；時間是限佇2點鐘內，有ê人規氣啥物lóng無提，taⁿ佇厝前厝後ná掖種ná下願，ǹg望過往ê親人有歇涼ê樹蔭（ńg），mā祈求有1日會當koh轉來故鄉。
東京ê水、食物（tsia̍h-mi̍h）、日常物資猶算穩定。M̄-koh政府愈講無問題，就愈hông活佇不安內底。媒體會定時播送關東各地區ê輻射值，特別強調東京地區無hiah懸，但是連koh khah南爿ê神奈川縣ia̍h是千葉縣ê菜蔬，亦檢出超過標準ê輻射量。海洋kap天，khah闊mā相liâm，輻射塵會tuè風飛過富士山，放射物質kám bē tuè海水流tuì四界去？
災難1個月後，4月11號，高圓寺ê反核遊行，講有1萬5千人。袂少人掛嘴掩（Tshuì-am；口罩）出來。
Lóng流tuì海底去ah
為著降溫倒入去原子爐ê水，濟濟lóng流落海底ah。附近ê漁民受逼遷徏，無法度koh討海掠魚，in鍛鍊規世人ê本領像hông斬斷仝款；亦有濟濟東北ê肉牛出貨受禁，bē-tit出貨ê牛，著ài全部處理tàn-sat，牛農ê寄託亦tuè leh hông毀掉。失業人口直直增加，bē少人ê艱苦無té tháu，孤不衷著自我了斷。起造核電廠hoō日本ê經濟加倍成長，但是ài付出ê代價，已經m̄是當初按算會到ê；taⁿ tsit-má mā是為著日本ê經濟、為著趕緊復興，災區以外ê人亦真緊tō恢復士農工商。居酒屋ê海產、sa-si-mih（生魚片），猶原hiah-nih鮮（tshiⁿ）；超級市場ê菜蔬果子，災區貨照排，逐家mā照買。實在兩難，貨無銷扑損，食食lueh koh著說服家己安全。
M̄-nā汙染水，真實，mā lóng hông拼tuì海底去ah。大地動kàu-taⁿ滿5個月，總算有愈來愈濟日本人對核電廠ê安全產生僥疑，全國亦舉辦幾nā遍大規模ê反核遊行，但是不管按怎遊行，主流報紙無欲報導，準有，亦是細kai角á。電視頂ê議論猶原一再保證核電廠ê安全，強調會出tsiah大ê代誌，lóng是「想定外」（無法度按算tio̍h ê）。有歷史學家徛出來，講in佇彼座爆炸ê電廠欲起進前，就kā東京電力提醒史冊bat記錄hia發生過大海漲，淹死tsiaⁿ千人。東電有規phâng ê官僚做後táu，聲嗽kài大、面mā bē紅，講「nā逐項想kah齊tsn̂g，啥物代誌就lóng無法度做ah！」。政府mā無才調反對核電廠，在野黨更加bē追究責任，因為全部ê核電廠lóng是tsit-má ê在野黨－長期間執政ê自民黨1間1間起起來ê。
過轉工ê新聞，已經予東京都都長ê選舉結果佔kah滇滇，遊行ê消息lóng無報。
(繼續閱讀...)]]>
） 
），但黃明志本人的「演技」（請仔細看他的眼神）實在自然到超讚。多看幾次，我可能要胃穿孔了。哈哈。 