荒蕪別坵穡

會記大學tī東海ê時，修過2門kap「女性」有關係ê課，1門課名中國傳統婦女地位，m̄-koh講真濟台灣舊底kap現代查某人ê處境。期末了後，老師建議góan koh去修楊翠老師ê婦女文學，自án-ne，開始讀tio̍h所謂ê女性文學，mā才知影女性原住民作家利格拉樂．阿烏(女烏)ê創作kap原住民「正名」運動，以及族群、認同轉向ê議題，但是hit-chūn我iáu m̄知sím-mi̍h是台灣文學，當然，mā無可能有sím-mi̍h語言意識。

想起來，hit-má讀「文學」ê態度kài天真kài無憂悶，mā kài無掛礙。就算chit-má讀研究所，ke bat 1寡女性主義ê論述kap文學作品，我原在無hiah深刻ê感觸。Tī編輯hit段時間，kap阿惠（陳豐惠）聯繫真chia̍p（頻繁），我看伊作代誌ê態度，téng真負責、細膩斟酌（仔細），總是抱tio̍h滿滿ê熱情teh chhiâu-chhek（籌策）所有ê事工，伊真有耐性、意志kài強，雖bóng三不五時會躊躇，總是，為tio̍h理想，伊tn̄g-tio̍h khah大ê困難mā徛真chāi。

我看tio̍h 1寡查某人有chiok濟優點，m̄-koh有tang-chūn正經比查甫人khah無自信，事事項項lóng tio̍h問khah濟人ê意見、khah相信所謂ê學者、倚靠看起來ná像khah有「高度」ê智識分子，真驚所做ê決定無法度予人滿意，直直想beh做到siōng好。其實怹所做ê比hiah-ê人khah有價值、khah有影響，koh khah予一般人接納，而且khah有力量chiâⁿ作久長ê流傳；chhêng-chāi是查甫人注意bē-tio̍h ê、無耐心等待成果所以早早放棄ê代誌。

講起來是憨直，mā是查某人hông被動灌注ê思想kap所展現ê固定形象。因為長久以來，社會中對性別ê看待有差異，除了工具，iáu是工具。所謂「工具」，不只是tī「身體」物質化ê層次，koh有事工性ê分配。巧ê查某人用身軀結合頭殼，換取看會tio̍h ê地位kap物質來裝扮出另外1款身軀ê價值；khah無巧ê查某人m̄是智慧siūⁿ少，是對「身軀」khah無hiah gâu利用kap寶惜，怹kā身軀khng3 tī「實」ê窟仔ni̍h，beh用1款「充滿」證明家治ê存在，怹tī事工完成了後，就算是真簡單ê代誌，亦bē感覺空虛。

Hit日，我聽tio̍h阿惠略--á講起1段傷心、m̄-koh真平靜、無任何怨慼ê過去，替伊m̄甘，mā替伊感覺光榮；koh tī某1個半暝，我耳機掛leh，聽阿惠10冬前ê作品《海風、渡鳥、眠夢》，我感覺伊是1個憨直ê查某人，憨直m̄是憨，是kā別人注定予伊ê運命，用伊比別人khah堅定ê意志，轉作別款愈有靭性ê力量，來成就無仝高度、屬tī伊家治mā屬tī濟濟人ê價值。因為伊憨直，所以tng伊人生tú-tio̍h濟濟著磨kap掛礙，對伊來講lóng是性命中，美麗果實ê必要體質kap補給養份。

會tàng講，chit遍「女性ê台語小說」順利舉辦發表會，特別是《虱目仔ê滋味》ê催生kap後置作業，阿惠自頭至尾投入siōng無人看tio̍h、m̄-koh siōng重要ê付出。除了清文，我想beh kā阿惠講，「查某人，咱做到--à！」咱beh án-ne kā咱所熟悉、生份ê人講，用咱生成溫柔ê聲音；雖bóng咱行向所ng3望ê腳步有khah慢，總是，伊lóng會到。

2006/11/21 

桂花巷

吳念真詞　陳揚曲　潘麗麗唱

想我一生的運命　親像風吹打斷線

隨風浮沈無依偎　這山飄浪過彼山

一旦落土犁頭看　只存枝骨身已爛　啊……只存枝骨身已爛 

花蕊較壞嘛開一擺　偏偏春風等袂來

只要根頭猶原在　毋驚怕枝葉受風颱

誰知花等人採　已經霜降日落西　啊……已經霜降日落西 

風吹身驅桂花命　若來想起心就痛

恩怨如煙皆當散　禍福當作天註定

往事何必越頭看　甲伊當作夢一般　啊……甲伊當作夢一般

－－－－－－－－－－－－－－－－－－－－－－－－

ps.潘麗麗唱「低頭」，原應是「lê頭 」。