荒蕪別坵穡

今仔日去kā看。一開始兩個人話攏囤嚨喉。管（kóng）插佇伊虛弱ê鼻孔。急診室ê病人chat-thóng-thóng，老ê有較濟。急診室彼款無「生」ê味，ná像按算好toh一個先行（kiâⁿ）；對面彼款無流通、不時khê痰ê聲，ná像teh應號碼牌，出力soah無奈。Mā有可能我對病院無好感，kan-taⁿ感覺怹只是teh等。我畢竟毋是chiah有耐性。

當然，伊只是siān（沒精神），人生本tō瘦，bōe有啥麼問題，應當隨時thang出院，元氣才koh補轉來就好。Iãh護士，少年ê護士hoan勢亦是因為按呢，致使一身軀白mā已經無像天使。Kā問病況，puh出一大綰術語ná像早tō背好等你，毋知beh講予誰聽？只是一個極(kek)專業ê工作者。

「妳不要一直縮嘛！」

「因，因為ē疼。」

「妳一直往後我怎麼貼呢？」

今仔日去kā看。想著阿嬤。幾nä年前，bōe記佇toh一個加護病房，歸身軀kiu（縮）kah，一支面mau-mau（凹陷）像beh予骨頭吸入去，予我掠準看著一個生份人。表姐夫tah我ê肩胛，講，「不要哭，阿嬤看了會難過。這就是人生。」彼陣，我猶無hiah大漢。連問「『這就是人生』是什麼意思」攏bōe曉。

今仔日去ka看。伊毋是我ê親人，soah予我想著足濟足濟。

「按呢，彼層代誌就準拄soah敢好？mài勉強。」我kā講。

「Chhìn-chhái（隨便）啦。」伊笑笑。

「Iãh無，等妳轉去厝了後，看情形才講。」我親像mā有一點仔kiu-kiu。

伊問我，kap伊敢koh有作伙，我hàiⁿ頭。伊講，kā我騙，我講，真ê。伊無koh應，表情soah像teh責備，ná像我做啥麼錯誤ê決定。（我，我，想想leh，ná tō 解說啥？）

伊叫怹查某囝chhah伊去便所ê時，chhun我一個人佇hia，大概十分鐘，頭殼內所有ê物件攏清清明明，mā攏暗暗花花。想著Pala，想著ma-ma，想著阿公阿嬤，想著舊厝、想著宿舍，想著來病院ê時經過ê地下道，老相片ê時間黑白寫，想著一寡強beh跋入崩崁ê信念，想，koh會凍按怎？

彼陣阿嬤hiông-hiông倒落ê時，我koh體會böe出表姐夫講ê，「這就是人生。」Chit-má，ùi急診室出來，短短ê時間，想著chiah濟，捷運頭前koh遇著進前我ka問路、彼個坐輪椅、賣雜物、笑笑kä我說謝，講祝我平安ê人。我總算知影啥麼號作「這就是人生」。急診室內，某一塊眠床，就會凍看thàng所有一切，樂觀ê、悲觀ê，其實攏仝款。啥麼攏準算，啥麼tō算bē準。（(sím-mih lóng chún sng, sím-mih tō sng bē chún.什麼都算數，什麼都算不準。也能引申為，如果太認真，那妳真的很笨。）表姐夫講ê，這就是人生。

黃舒駿唱ê：〈想著妳就心酸酸〉（廖輝英原著，公視「輾轉紅蓮」片尾曲）。我特別佮意彼句：「人生已經無夠用，為何艱苦ná會chiah-nih長？毋是妳kap我teh無緣份，he是緣份找無咱ê門。」

Chit首歌beh予佇急診室ê伊。怹查某囝kap彼個護士，koh有我，年紀差不多頂下歲，應該，mā攏仝款吧！人生正經無夠用。

2006/08/05 

〈想著妳就心酸酸〉詞曲唱：黃舒駿

今夜ê雨紛紛，是按怎無beh睏？

妳明明知影chit-ê時陣，是妳teh擾亂阮青春。

人生已經無夠用，為何艱苦ná會chiah-nih長？

毋是妳kap我teh無緣份，he是緣份找無咱ê門。 

想著妳tō心酸酸，我ê愛情toh地囥？

暝暝等待天光，天光以後mā是無人問。

想著妳tō心酸酸，我ê苦戀真可恨，

心事攏家己吞，幸福永遠攏算bē準，算bē準。

建議用mozilla瀏灠，安裝「Taiwanese Package」軟體，看較濟台語文：）