荒蕪別坵穡

花欉密接，映望逐蕊新芛　　
攏會使自在開展春天
澄清的露水含著光
虔誠聚集佇葉心
無意故彼個透早遐呢早
日頭出了比永過赤焱

諸羅城南，油彩還袂繪出風景
散徛的作實人、厝鳥仔、被單
有時雨水沃澹棕簑
廟口予過路人暫歇
嘉義街外，定著有所在藏一蕊目睭
欲看透殖民統治，直直畫去
電火柱、路燈、警察
好天時隨風飄起的短衫……
天頂定定是佮土跤遙遙相望

佇畫冊一角，生份的文字
像壁癌仝款，記憶我的印象
霧霧茫茫的1947年春天
你手無閣夯輕巧的彩筆
煞揹著五角形沉重的白柴牌
色水袂凍隨意湠開
一時間凝作憤怒的眼神
嘉義人目睭金金看向熟悉的你
你亦目睭金金看向每一位
熟悉的嘉義街景
噴水池與車頭連作一線
巡一輪了後，油光已經無法度閣
反射你的浪漫佮熱情

花欉密接，攏在陣陣槍聲中萎去
紛飛的柴枝找無時節
殘體刻印佇城中予人行踏
澄清的露水含著光
煞予無底的蠅蠓吸礁
彼暝遐呢仔長
嘉義人當作是一場惡夢

（圖：陳澄波自畫像）