翻箱倒櫃看照片

台北館前路，2008.8



請逐家想一个畫面：ká-sú講，kā cit 塊肥豬肉tàn佇一陣痟狗當中，會是啥物款ê情形？


頂歸工，我著拄著chit-ê狀況，而且，我著是其中一隻痟狗！

hit工下晡才食飽中晝頓，阮「半暝毋愛睏」ê長官ka電話吩咐我去特偵組遐鬥顧。我拄仔到特偵組，著看到大門口有一大陣記者擠做一陣leh翕相。原來是阿扁洗錢疑案其中一个被告吳景茂嘛拄仔到位。



我想講，檢察官無kā吳景茂問兩三點鐘，那有可能放伊出來，我著距佇壁邊看報紙，其他ê人，開講ê開講，發稿ê發稿，啄龜ê啄龜.....逐家ê心情攏放鬆落來歇睏。才過半點鐘久，距佇車道邊仔ê一个同業突然間大聲喝(hoah)：「出來了！」我霧煞煞，毋知影發生啥物待誌，報紙tàn掉，相機隨時拿起來，著縱過去翕相。



原來是吳景茂，那會遮緊著出來！逐家攏hō突然間出現ê吳景茂拍著驚，才想著愛趕緊縱過去翕相！




伊毋願接受訪問，伊才離開特偵組，咻一leh，著干旦用飛ê，走hō記者迮(jiok)。伊親像一塊肥豬肉hō人tàn佇一陣痟狗當中，縱過來ê記者那來那濟，伊突然間越頭，倒頭走！我拼死老命衝過去，想袂到，伊毋管館前路面頂滿滿是駛kah真緊ê車，按呢著ka衝過去。一大陣抓狂ê記者嘛按呢衝過去，險險a著hō車撞著！



著按呢，吳景茂hām一大陣對佇後壁，親像痟狗ê著佇館前路走相迮！我佇伊ê面頭前一面翕相，一面倒退擄，毋拘，伊一時仔走正手爿，一時仔縱倒手爿，我走50公尺著無伊ê法，真喘，迮袂到啊！伊縱到南陽街，已經攏無記者迮到伊，伊閣拼性命leh縱，看起來足驚惶！



即歸工，我一直leh想hit工hām吳景茂佇館前路走相迮即層待誌。



伊毋接受訪問，現場ê記者敢有法度尊重伊毋接受訪問ê權利？現場ê記者敢有可能hō伊順順利利ui特偵組行出來？hit工，吳景茂ê腳手真好，無一个記者迮會著伊，伊毋免hō記者凌遲；ká-sú講hit工，特偵組有先放風聲講伊beh出來，特偵組所有大大小小ê出口，一定攏hō記者堵著，連一隻蚊仔著免想beh飛出去，伊毋願接受訪問，我實在毋敢想，he會是啥物慘烈ê狀況！



佇全民公審扁洗錢疑案ê時陣講「被告人權」，我是討皮疼；毋拘，hit工hām吳景茂佇館前路走相迮，hō我感覺咱離人權國家iah閣有真遠！真遠ê路愛行！



我嘛是糟蹋人權ê共犯，罪過啊，罪過！










痟狗連線，


按快門過生活，我是人頭


華語對譯，



請大家想像一個畫面：假如說，把一塊肥豬肉丟進一群瘋狗之中，會是什麼樣的情形呢？


前幾天，我就遇到這個狀況，而且，我就是其中一隻瘋狗！


那天中午才剛吃飽飯，我那「半夜不睡覺」的長官就電話吩咐我幫忙守特偵組。我才剛到特偵組，就看到大門口有一大群記者擠成一團在拍照。原來是阿扁洗錢疑案其中一個被告吳景茂也剛到。


我想，檢察官不有把吳景茂偵訊兩三個鐘頭，那有可能放他出來，於是，我就蹲在牆角看報紙，其他的人，聊天的聊天，發稿的發稿，打瞌睡的打瞌睡.....大家的心情都放鬆下來休息。才過半個鐘頭，蹲在車道邊的一個同業突然大聲喊：「出來了！」我一頭霧水，不知發生什麼事情，本能的把報紙丟掉，立刻抓起相機就衝過去拍照。


原來是吳景茂，怎麼這麼快就出來！大家都被突然間出現的吳景茂給嚇了一大跳，才回過神來衝過去拍照！


他不願接受訪問，他才離開特偵組，咻一下，就好像用飛的，跑給記者追。吳景茂就好像是一塊被人丟進瘋狗中的肥豬肉，追上來的記者越來越多，他突然間轉頭，掉頭就跑！我拼死老命追過去，想不到，他不顧館前路上滿滿都是開得很快的車子，就這樣衝過去。一大陣抓狂的記者也跟著衝過去，差點就被車子撞到！


吳景茂和一大群跟在後頭，好像瘋狗的記者，就這樣在館前路上演追逐戰！我在他的面前一面拍照，一面倒退跑，不過，他一下子走右手邊跑，一下子又衝到左手邊，我跑50公尺就沒力了，很喘，很喘，追不到啊！他一路衝到南陽街，都已經遠遠的甩開記者了，依舊像跑百米賽，用整個生命加速再衝，看起來很驚惶！


這幾天，我一直在想那天和吳景茂在館前路上追逐戰這件事。


他不接受訪問，現場的記者可以尊重他不接受訪問的權利嗎？現場的記者有可能讓他順順利利的從特偵組走出來嗎？那天，吳景茂的手腳很敏捷，沒有一個記者追得到他，他不用遭受記者的凌遲；如果說那天，特偵組先放風聲說他要出來了，特偵組所有大大小小的出口，一定都會被記者堵死，連一隻蚊子都別想飛出來，他拒絕受訪，我實在不敢想像那會是何等慘烈的下場！


在全民公審扁洗錢疑案的氣氛中「被告人權」，我簡直討打；不過，那天和吳景茂在館前路上追逐戰，卻讓我感覺我們離人權國家還有很遠！很遠的路要走！


我也是糟蹋人權的共犯，罪過啊，罪過！